ಲಾಹೋರ್: ದಶಕಗಳ ಇತಿಹಾಸ ಮತ್ತು ಕಹಿ ನೆನಪುಗಳ ನಡುವೆ ಪಾಕಿಸ್ತಾನದ ಸಾಂಸ್ಕೃತಿಕ ರಾಜಧಾನಿ ಲಾಹೋರ್ನಲ್ಲಿ ಮಹತ್ತರವಾದ ಸಾಂಸ್ಕೃತಿಕ ಬದಲಾವಣೆಯೊಂದು ಸಂಭವಿಸಿದೆ. ವಿಭಜನೆಯ ನಂತರ ಬದಲಾಗಿದ್ದ ಲಾಹೋರ್ ನಗರದ ಐತಿಹಾಸಿಕ ಸ್ಥಳಗಳು, ರಸ್ತೆಗಳು ಮತ್ತು ಚೌಕಗಳಿಗೆ ಬರೋಬ್ಬರಿ 79 ವರ್ಷಗಳ ನಂತರ ಮತ್ತೆ ಹಿಂದೂ, ಸಿಖ್ ಹಾಗೂ ಬ್ರಿಟಿಷ್ ಕಾಲದ ಹಳೆಯ ಹೆಸರುಗಳನ್ನೇ ಮರುನಾಮಕರಣ (Restore) ಮಾಡಲು ಪಾಕಿಸ್ತಾನ ಸರ್ಕಾರ ನಿರ್ಧರಿಸಿದೆ. ಈ ಮೂಲಕ ಲಾಹೋರ್ನ ಮೂಲ ಇತಿಹಾಸ ಮತ್ತು ಬಹುಸಂಸ್ಕೃತಿಯ ಪರಂಪರೆಯನ್ನು ಮರಳಿ ತರಲಾಗುತ್ತಿದೆ.
ಇಂಟರ್ನೆಟ್ ಮತ್ತು ಜಾಗತಿಕ ವಲಯದಲ್ಲಿ ಈ ನಿರ್ಧಾರಕ್ಕೆ “ಹಳೇ ಲಾಹೋರ್ ಮರಳಿ ಬಂದಿದೆ” (Old Lahore Is Back) ಎಂಬ ಶ್ಲಾಘನೆಗಳು ವ್ಯಕ್ತವಾಗುತ್ತಿವೆ.
ವಿಭಜನೆಯ ಮುನ್ನ ಹಿಂದೂ ಮತ್ತು ಸಿಖ್ ನಾಯಕರ, ಕ್ರಾಂತಿಕಾರಿಗಳ ಹಾಗೂ ಬ್ರಿಟಿಷ್ ಇತಿಹಾಸದ ನೆನಪಿನಲ್ಲಿದ್ದ ನೂರಾರು ರಸ್ತೆ ಮತ್ತು ಸ್ಥಳಗಳ ಹೆಸರುಗಳನ್ನು ಸ್ವಾತಂತ್ರ್ಯದ ಬಳಿಕ ಇಸ್ಲಾಮೀಕರಣಗೊಳಿಸಲಾಗಿತ್ತು. ಈಗ ಅಂತಹ ಪ್ರಮುಖ ಸ್ಥಳಗಳಿಗೆ ಹಳೆಯ ಮೂಲ ಹೆಸರುಗಳನ್ನೇ ಮರುನಾಮಕರಣ ಮಾಡಲಾಗುತ್ತಿದೆ.
ಪರಂಪರೆ ರಕ್ಷಣೆಗೆ ಮುಂದಾದ ಸರ್ಕಾರ: ಲಾಹೋರ್ನ ಜಿಲ್ಲಾಡಳಿತ ಮತ್ತು ಸಾಂಸ್ಕೃತಿಕ ಇಲಾಖೆಯು ಜಂಟಿಯಾಗಿ ಈ ನಿರ್ಧಾರ ಕೈಗೊಂಡಿದ್ದು, ನಗರದ ವೈವಿಧ್ಯಮಯ ಇತಿಹಾಸವನ್ನು ಪ್ರವಾಸಿಗರಿಗೆ ಮತ್ತು ಮುಂದಿನ ಪೀಳಿಗೆಗೆ ಪರಿಚಯಿಸುವುದು ಇದರ ಮುಖ್ಯ ಉದ್ದೇಶವಾಗಿದೆ.
ಪಾಕಿಸ್ತಾನ ಸರ್ಕಾರದ ಈ ಅನಿರೀಕ್ಷಿತ ಮತ್ತು ಸೌಹಾರ್ದಯುತ ನಡೆಗೆ ಭಾರತ ಸೇರಿದಂತೆ ವಿಶ್ವಾದ್ಯಂತ ಇರುವ ಸಿಖ್ ಮತ್ತು ಹಿಂದೂ ಸಮುದಾಯಗಳಿಂದ ವ್ಯಾಪಕ ಪ್ರಶಂಸೆ ವ್ಯಕ್ತವಾಗುತ್ತಿದ್ದು, ಇದು ಉಭಯ ದೇಶಗಳ ನಡುವಿನ ಸಾಂಸ್ಕೃತಿಕ ಸಂಬಂಧಕ್ಕೆ ಹೊಸ ಆಯಾಮ ನೀಡುವ ಸಾಧ್ಯತೆ ಇದೆ.
