ಪ್ರಯಾಗ್ರಾಜ್:ಮಗುವು ಮದ್ಯಪಾನಿ ಮತ್ತು ಮಾನಸಿಕವಾಗಿ ಅಸ್ವಸ್ಥಳಾಗಿದ್ದಾಳೆ ಎಂಬ ಪತಿಯ ವಾದವನ್ನು ತಿರಸ್ಕರಿಸಿದ ಅಲಹಾಬಾದ್ ಹೈಕೋರ್ಟ್, ಒಂದು ವರ್ಷದ ಮಗುವಿನ ಪಾಲನೆಯ ಹಕ್ಕನ್ನು (Custody) ತಾಯಿಗೆ ನೀಡಿದೆ. ಐದು ವರ್ಷಕ್ಕಿಂತ ಕಡಿಮೆ ವಯಸ್ಸಿನ ಮಗುವಿನ ದೈಹಿಕ ಮತ್ತು ಭಾವನಾತ್ಮಕ ಬೆಳವಣಿಗೆಗೆ ತಾಯಿಯ ಸಾಮೀಪ್ಯ ಅತ್ಯಗತ್ಯ ಎಂದು ನ್ಯಾಯಾಲಯ ಅಭಿಪ್ರಾಯಪಟ್ಟಿದೆ.
ನ್ಯಾಯಮೂರ್ತಿ ಸಂದೀಪ್ ಜೈನ್ ಅವರಿದ್ದ ಏಕಸದಸ್ಯ ಪೀಠವು ಏಪ್ರಿಲ್ 30ರಂದು ನೀಡಿದ ಆದೇಶದಲ್ಲಿ ಹೀಗೆ ಹೇಳಿದೆ:
ತಾಯಿಯ ಪಾತ್ರ ಅನನ್ಯ: “ಮಗುವಿನ ಬೆಳವಣಿಗೆಯ ಆರಂಭಿಕ ಹಂತದಲ್ಲಿ ಪೌಷ್ಟಿಕಾಂಶ, ಭಾವನಾತ್ಮಕ ಮತ್ತು ವಿಕಸನದ ಅಗತ್ಯಗಳನ್ನು ತಾಯಿ ಅತ್ಯುತ್ತಮವಾಗಿ ಪೂರೈಸಬಲ್ಲಳು. ತಂದೆಯ ಪಾತ್ರ ಮುಖ್ಯವಾದರೂ, ಜೈವಿಕ ಮತ್ತು ಪಾಲನೆಯ ದೃಷ್ಟಿಯಿಂದ ತಾಯಿಯೇ ಮಗುವಿಗೆ ಸುರಕ್ಷಿತ ಸ್ಥಾನ.”
ಹಿಂದೂ ಅಪ್ರಾಪ್ತ ವಯಸ್ಕ ಮತ್ತು ಪಾಲಕತ್ವ ಕಾಯ್ದೆಯ ಅಡಿಯಲ್ಲಿ, ಸಾಮಾನ್ಯವಾಗಿ ಐದು ವರ್ಷದೊಳಗಿನ ಮಗುವಿನ ಪಾಲನೆಯನ್ನು ತಾಯಿಗೇ ವಹಿಸಬೇಕು ಎಂದು ನ್ಯಾಯಾಲಯ ನೆನಪಿಸಿದೆ.
ಅರ್ಜಿದಾರ ಮಹಿಳೆಯು ಡಿಸೆಂಬರ್ 2023 ರಲ್ಲಿ ವಿವಾಹವಾಗಿದ್ದರು ಮತ್ತು ಆಗಸ್ಟ್ 2024 ರಲ್ಲಿ ಮಗುವಿಗೆ ಜನ್ಮ ನೀಡಿದ್ದರು. ವರದಕ್ಷಿಣೆ ಕಿರುಕುಳದ ಕಾರಣ ದಂಪತಿಗಳು ಪ್ರತ್ಯೇಕವಾಗಿ ವಾಸಿಸುತ್ತಿದ್ದರು.
ಜೌನ್ಪುರದಲ್ಲಿ ಪೊಲೀಸ್ ಕಾನ್ಸ್ಟೇಬಲ್ ಆಗಿರುವ ಪತಿ, ಕಳೆದ ವರ್ಷ ಆಗಸ್ಟ್ನಲ್ಲಿ ಮಗುವನ್ನು ಬಲವಂತವಾಗಿ ಕಿತ್ತುಕೊಂಡು ಹೋಗಿದ್ದ ಎನ್ನಲಾಗಿದೆ.
ಸೆಪ್ಟೆಂಬರ್ 2025 ರಲ್ಲಿ ಮಕ್ಕಳ ಕಲ್ಯಾಣ ಸಮಿತಿ (CWC) ನೀಡಿದ ಆದೇಶವನ್ನೂ ಪತಿ ಉಲ್ಲಂಘಿಸಿದ್ದರು. ಈ ಕಾರಣಕ್ಕಾಗಿ ಜೌನ್ಪುರ ಎಸ್ಪಿ ಅವರು ಮಾರ್ಚ್ನಲ್ಲಿ ಈ ಕಾನ್ಸ್ಟೇಬಲ್ನನ್ನು ಅಮಾನತುಗೊಳಿಸಿದ್ದರು.
ತನ್ನ ಪತ್ನಿ ಕೇವಲ 12ನೇ ತರಗತಿ ಓದಿದ್ದಾಳೆ, ಅವಳಿಗೆ ಆದಾಯವಿಲ್ಲ ಮತ್ತು ಅವಳು ಮದ್ಯಪಾನಿ ಹಾಗೂ ಮಾನಸಿಕವಾಗಿ ಅಸ್ಥಿರ ಎಂದು ಪತಿ ವಾದಿಸಿದ್ದ. ಇದಕ್ಕೆ ಪುರಾವೆಯಾಗಿ ಕೆಲವು ವೈದ್ಯಕೀಯ ಚೀಟಿಗಳನ್ನು (Prescriptions) ಸಲ್ಲಿಸಿದ್ದ. ವೈದ್ಯಕೀಯ ಚೀಟಿಗಳನ್ನು ಪರಿಶೀಲಿಸಿದ ನ್ಯಾಯಾಲಯ, ಅದರಲ್ಲಿ ಮಹಿಳೆಗೆ ಹೊಟ್ಟೆನೋವು ಇದೆ ಮತ್ತು ಖಾರ ತಿನ್ನಬಾರದು ಎಂದು ಮಾತ್ರ ಬರೆಯಲಾಗಿದೆ ಹೊರತು, ಅವಳು ಮದ್ಯಪಾನಿ ಅಥವಾ ಮಾನಸಿಕ ಅಸ್ವಸ್ಥೆ ಎಂದು ಎಲ್ಲಿಯೂ ಉಲ್ಲೇಖಿಸಿಲ್ಲ ಎಂದು ಸ್ಪಷ್ಟಪಡಿಸಿತು.
