ಬೆಂಗಳೂರು: ಪಶ್ಚಿಮ ಏಷ್ಯಾದಲ್ಲಿ ಉಂಟಾಗಿರುವ ಯುದ್ಧದ ಉದ್ವಿಗ್ನತೆಯಿಂದಾಗಿ ಜಾಗತಿಕವಾಗಿ ತೈಲ ಮತ್ತು ಅನಿಲ ಪೂರೈಕೆಯಲ್ಲಿ ಏರುಪೇರಾಗುತ್ತಿದೆ. ಇದರ ಬಿಸಿ ಭಾರತದ ಅಡುಗೆ ಮನೆಗಳಿಗೂ ತಟ್ಟುವ ಸಾಧ್ಯತೆ ಇದೆ. ಇಂತಹ ಸಮಯದಲ್ಲಿ, ನಿಮ್ಮ ಮನೆಯ ಗ್ಯಾಸ್ ಸಿಲಿಂಡರ್ ಎಷ್ಟು ದಿನ ಬರಬಹುದು ಮತ್ತು ಅಡುಗೆ ಮಾಡುವಾಗ ಎಷ್ಟು ಅನಿಲ ಖರ್ಚಾಗುತ್ತದೆ ಎಂಬ ನಿಖರ ಮಾಹಿತಿ ತಿಳಿದಿರುವುದು ಬಹಳ ಮುಖ್ಯ.
ಸಾಮಾನ್ಯವಾಗಿ ಭಾರತದ ಮನೆಗಳಲ್ಲಿ 14.2 ಕೆಜಿ ತೂಕದ LPG ಸಿಲಿಂಡರ್ ಬಳಸಲಾಗುತ್ತದೆ. ಒಂದು ಕೆಜಿ LPG ಸುಮಾರು 46.1 ಮೆಗಾಜೌಲ್ಸ್ (MJ) ಶಕ್ತಿಯನ್ನು ಹೊಂದಿರುತ್ತದೆ. ಹಾಗಾದರೆ, ನಾವು ಸ್ಟವ್ ಹಚ್ಚಿದಾಗ ಅದು ಎಷ್ಟು ಖಾಲಿಯಾಗುತ್ತದೆ? ಇಲ್ಲಿದೆ ಅದರ ಕಂಪ್ಲೀಟ್ ಡಿಟೈಲ್ಸ್.
ಗಂಟೆಗೆ ಎಷ್ಟು ಗ್ಯಾಸ್ ಬಳಕೆಯಾಗುತ್ತದೆ?
ಸಾಮಾನ್ಯವಾಗಿ ನಾವು ಬಳಸುವ ಗ್ಯಾಸ್ ಸ್ಟವ್ನ ಒಂದು ಬರ್ನರ್ ಒಂದು ಗಂಟೆಗೆ ಅಂದಾಜು 7 MJ ಶಕ್ತಿಯನ್ನು ಬಳಸುತ್ತದೆ. ಈ ಲೆಕ್ಕಾಚಾರವನ್ನು ಗಮನಿಸಿದರೆ:
ಒಂದು ಬರ್ನರ್ ಬಳಸಿದರೆ: ಗಂಟೆಗೆ ಸುಮಾರು 0.15 ಕೆಜಿ ಗ್ಯಾಸ್ ಖರ್ಚಾಗುತ್ತದೆ.
ಎರಡು ಬರ್ನರ್ ಏಕಕಾಲಕ್ಕೆ ಬಳಸಿದರೆ: ಗಂಟೆಗೆ ಸುಮಾರು 14 MJ ಅಂದರೆ 0.30 ಕೆಜಿ ಗ್ಯಾಸ್ ಬಳಕೆಯಾಗುತ್ತದೆ.
ಸಿಲಿಂಡರ್ ಆಯಸ್ಸು: ಇದೇ ವೇಗದಲ್ಲಿ ಸತತವಾಗಿ ಅಡುಗೆ ಮಾಡಿದರೆ, 14.2 ಕೆಜಿಯ ಒಂದು ಸಿಲಿಂಡರ್ ಸುಮಾರು 46 ಗಂಟೆಗಳ ಕಾಲ ಬರಬಹುದು.
ನಿಮ್ಮ ಮನೆಯ ಗ್ಯಾಸ್ ಬಳಕೆಯನ್ನು ನೀವೇ ಲೆಕ್ಕ ಹಾಕಿ!
ನಿಮ್ಮ ಮನೆಯಲ್ಲಿರುವ ಗೀಜರ್ ಅಥವಾ ಸ್ಟವ್ ಎಷ್ಟು ಗ್ಯಾಸ್ ಕುಡಿಯುತ್ತದೆ ಎಂದು ತಿಳಿಯಲು ಈ ಸೂತ್ರ ಬಳಸಿ:
ರೇಟಿಂಗ್ ಗಮನಿಸಿ: ಉಪಕರಣದ ಮೇಲಿರುವ kW ರೇಟಿಂಗ್ ಅನ್ನು 3.6 ರಿಂದ ಗುಣಿಸಿ (ಉದಾಹರಣೆಗೆ 5 kW ಗೀಜರ್ ಇದ್ದರೆ: 5×3.6=18 MJ/hr).
ಶಕ್ತಿಯಿಂದ ಭಾಗಿಸಿ: ಬಂದ ಉತ್ತರವನ್ನು 46.1 ರಿಂದ ಭಾಗಿಸಿದರೆ ಒಂದು ಗಂಟೆಗೆ ಎಷ್ಟು ಕೆಜಿ ಖರ್ಚಾಗುತ್ತದೆ ಎಂದು ತಿಳಿಯುತ್ತದೆ (18÷46.1=0.39 ಕೆಜಿ/ಗಂಟೆಗೆ).
ಒಟ್ಟು ಲೆಕ್ಕ: ಸಿಲಿಂಡರ್ ತೂಕವನ್ನು (14.2 ಕೆಜಿ) ಈ ಉತ್ತರದಿಂದ ಭಾಗಿಸಿದರೆ ಅದು ಎಷ್ಟು ಗಂಟೆ ಬಾಳಿಕೆ ಬರುತ್ತದೆ ಎಂಬುದು ತಿಳಿಯುತ್ತದೆ.
ಗ್ಯಾಸ್ ಉಳಿಸಲು ಇಲ್ಲಿವೆ ಸರಳ ಟಿಪ್ಸ್:
ಸಿಲಿಂಡರ್ ದೀರ್ಘಕಾಲ ಬರಬೇಕೆಂದರೆ ಈ ಕ್ರಮಗಳನ್ನು ಅನುಸರಿಸಿ:
ಪಾತ್ರೆ ಮುಚ್ಚಿಡಿ: ಅಡುಗೆ ಮಾಡುವಾಗ ಪಾತ್ರೆಯ ಮೇಲೆ ಮುಚ್ಚಳವಿಟ್ಟರೆ ಶಾಖ ವ್ಯರ್ಥವಾಗುವುದಿಲ್ಲ.
ನೆನೆಸಿಡಿ: ಬೇಳೆಕಾಳುಗಳನ್ನು ಬೇಯಿಸುವ ಮೊದಲು ನೀರಿನಲ್ಲಿ ನೆನೆಸಿಟ್ಟರೆ ಅವು ಬೇಗನೆ ಬೇಯುತ್ತವೆ.
ಕಡಿಮೆ ಉರಿ (Simmer): ಆಹಾರ ಕುದಿಯಲು ಆರಂಭಿಸಿದ ನಂತರ ಉರಿಯನ್ನು ಕಡಿಮೆ ಮಾಡಿ.
ಬರ್ನರ್ ಸ್ವಚ್ಛತೆ: ಬರ್ನರ್ ರಂಧ್ರಗಳು ಬ್ಲಾಕ್ ಆಗಿದ್ದರೆ ಗ್ಯಾಸ್ ವ್ಯರ್ಥವಾಗುತ್ತದೆ, ಆದ್ದರಿಂದ ಆಗಾಗ್ಗೆ ಸ್ವಚ್ಛಗೊಳಿಸಿ.
ಸಣ್ಣ ಬರ್ನರ್ ಬಳಸಿ: ದೊಡ್ಡ ಬರ್ನರ್ಗಿಂತ ಸಣ್ಣ ಬರ್ನರ್ ಬಳಕೆಯು ಅನಿಲ ಉಳಿತಾಯಕ್ಕೆ ಸಹಕಾರಿ.
ಯುದ್ಧದ ಸಂದರ್ಭದಲ್ಲಿ ಇಂಧನ ಉಳಿತಾಯವು ಕೇವಲ ಹಣ ಉಳಿತಾಯವಷ್ಟೇ ಅಲ್ಲ, ದೇಶದ ಸಂಪನ್ಮೂಲ ರಕ್ಷಣೆಗೂ ಸಹಕಾರಿಯಾಗಿದೆ.
