ನವದೆಹಲಿ: ಧಾರ್ಮಿಕ ವಿವಾದಗಳನ್ನು ಬಗೆಹರಿಸುವಲ್ಲಿ ದಶಕಗಳಿಂದ ಬಳಸಲಾಗುತ್ತಿರುವ ‘ಅಗತ್ಯ ಧಾರ್ಮಿಕ ಆಚರಣೆ’ (ERP) ಸಿದ್ಧಾಂತದ ಔಚಿತ್ಯವನ್ನು ಗುರುವಾರ ಸುಪ್ರೀಂ ಕೋರ್ಟ್ ಪ್ರಶ್ನಿಸಿದೆ. ಶಬರಿಮಲೆ ಪ್ರಕರಣಕ್ಕೆ ಸಂಬಂಧಿಸಿದ ಕಾನೂನು ವಿಚಾರಣೆಯ ಅಂತಿಮ ದಿನದಂದು ಒಂಬತ್ತು ನ್ಯಾಯಾಧೀಶರ ಸಾಂವಿಧಾನಿಕ ಪೀಠವು ಈ ಮಹತ್ವದ ಅವಲೋಕನಗಳನ್ನು ಮಾಡಿದೆ.
ಒಂದು ಧರ್ಮದಲ್ಲಿ ಯಾವುದು ‘ಅಗತ್ಯ’ ಮತ್ತು ಯಾವುದು ಅಲ್ಲ ಎಂದು ನಿರ್ಧರಿಸುವ ಈ ‘ERP’ ಸಿದ್ಧಾಂತವು ಕೇವಲ ಆಯ್ದ ಆಚರಣೆಗಳಿಗೆ ಮಾತ್ರ ಪ್ರಾಮುಖ್ಯತೆ ನೀಡಿ ಉಳಿದವುಗಳನ್ನು ಕಡೆಗಣಿಸಬಹುದು. ಇದು ಒಂದು ರೀತಿಯಲ್ಲಿ ‘ಉನ್ನತ ವರ್ಗದ’ (Elitist) ಸಿದ್ಧಾಂತವಾಗಬಹುದು ಎಂದು ನ್ಯಾಯಮೂರ್ತಿ ಸೂರ್ಯಕಾಂತ್ ನೇತೃತ್ವದ ಪೀಠ ಅಭಿಪ್ರಾಯಪಟ್ಟಿದೆ.
ಅಮಿಕಸ್ ಕ್ಯೂರಿ (ನ್ಯಾಯಾಲಯದ ಸಹಾಯಕ) ಕೆ. ಪರಮೇಶ್ವರ್ ವಾದ ಮಂಡಿಸಿ, “ಒಬ್ಬ ವ್ಯಕ್ತಿಯ ಆಧ್ಯಾತ್ಮಿಕ ಅನ್ವೇಷಣೆಯು ಸಂವಿಧಾನದ 21ನೇ ವಿಧಿಯಡಿ (ಜೀವಿಸುವ ಹಕ್ಕು) ಬರುತ್ತದೆ. ಧಾರ್ಮಿಕ ಆಚರಣೆಗಳನ್ನು ಕಸಿದುಕೊಳ್ಳುವುದು ವ್ಯಕ್ತಿಯ ಅಸ್ಮಿತೆಗೆ ಧಕ್ಕೆ ತಂದಂತೆ” ಎಂದರು.
ನ್ಯಾಯಮೂರ್ತಿ ನಾಗರತ್ನ ಅವರು, “ERP ಸಿದ್ಧಾಂತವನ್ನು ಒಂದು ಆಚರಣೆಯು ಧಾರ್ಮಿಕವೋ ಅಥವಾ ಲೌಕಿಕವೋ (Secular) ಎಂದು ಗುರುತಿಸಲು ಬಳಸಬಹುದೇ ಹೊರತು, ಅದು ಧಾರ್ಮಿಕವಲ್ಲ ಎಂದು ಹೇಳಿ ರಕ್ಷಣೆಯನ್ನು ನಿರಾಕರಿಸಲು ಬಳಸಬಾರದು” ಎಂದು ಹೇಳಿದರು.
