ನಾಸಾ ವಿಜ್ಞಾನಿ ಭೂಮಿಗೆ ತಣ್ಣನೆಯ ಎಚ್ಚರಿಕೆ ನೀಡಿದ್ದಾರೆ. ಗ್ರಹಗಳ ರಕ್ಷಣಾ ತಜ್ಞರು 15,000 ಪತ್ತೆಯಾಗದ ಭೂಮಿಯ ಹತ್ತಿರದ ಕ್ಷುದ್ರಗ್ರಹಗಳ ವಿರುದ್ಧ ರಕ್ಷಿಸಲು ಭೂಮಿಗೆ ಯಾವುದೇ ಮಾರ್ಗವಿಲ್ಲ ಎಂದು ಹೇಳಿದರು, ಇವೆಲ್ಲವೂ ಇಡೀ ನಗರವನ್ನು ಅಳಿಸಿಹಾಕುವ ಸಾಮರ್ಥ್ಯವನ್ನು ಹೊಂದಿವೆ.
ಡೈಲಿ ಸ್ಟಾರ್ ವರದಿಯ ಪ್ರಕಾರ, ನಾಸಾದ ಪ್ಲಾನೆಟರಿ ಡಿಫೆನ್ಸ್ ಅಧಿಕಾರಿ ಕೆಲ್ಲಿ ಫಾಸ್ಟ್ ಅವರು, “ನಮಗೆ ತಿಳಿಯದಂತೆ ಅಡಗಿರುವ ಕ್ಷುದ್ರಗ್ರಹಗಳು ನನ್ನ ನಿದ್ದೆಗೆಡಿಸಿವೆ” ಎಂದು ಕಳವಳ ವ್ಯಕ್ತಪಡಿಸಿದ್ದಾರೆ.
ಅತ್ಯಂತ ದೊಡ್ಡ ಗಾತ್ರದ ಕ್ಷುದ್ರಗ್ರಹಗಳು ಅವರಿಗೇನೂ ಅಷ್ಟಾಗಿ ಆತಂಕ ತಂದಿಲ್ಲ, ಏಕೆಂದರೆ ಅವು “ಎಲ್ಲಿವೆ” ಎಂಬುದು ವಿಜ್ಞಾನಿಗಳಿಗೆ ತಿಳಿದಿದೆ. ಅದೇ ರೀತಿ, ಸಣ್ಣ ಗಾತ್ರದ ಶಿಲೆಗಳು ನಿರಂತರವಾಗಿ ಭೂಮಿಗೆ ಅಪ್ಪಳಿಸುತ್ತಲೇ ಇರುತ್ತವೆ, ಅವುಗಳಿಂದ ಯಾವುದೇ ಅಪಾಯವಿಲ್ಲ. ಆದರೆ, ಸುಮಾರು 500 ಅಡಿ (150 ಮೀಟರ್) ಗಾತ್ರದ ಕ್ಷುದ್ರಗ್ರಹಗಳೇ ಈಗ ದೊಡ್ಡ ಸಮಸ್ಯೆಯಾಗಿವೆ. ಇವು ಎಷ್ಟೇ ಪ್ರಯತ್ನಿಸಿದರೂ ವಿಜ್ಞಾನಿಗಳ ಕಣ್ಣಿಗೆ ಬೀಳದಷ್ಟು ಸಣ್ಣದಾಗಿವೆ, ಆದರೆ ಒಂದು ನಗರವನ್ನೇ ಧ್ವಂಸಮಾಡುವಷ್ಟು ದೊಡ್ಡದಾಗಿವೆ.
ಲಂಡನ್ನ ‘ದಿ ಟೈಮ್ಸ್’ ಪತ್ರಿಕೆಯ ಪ್ರಕಾರ, ಇಂತಹ ಮಧ್ಯಮ ಗಾತ್ರದ ಕ್ಷುದ್ರಗ್ರಹಗಳನ್ನು ‘ಸಿಟಿ-ಕಿಲ್ಲರ್ಸ್’ (ನಗರ ಭಕ್ಷಕರು) ಎಂದು ಕರೆಯಲಾಗುತ್ತಿದ್ದು, ಇವು ಒಂದು ಇಡೀ ಪ್ರದೇಶವನ್ನೇ ನಾಶಮಾಡುವ ಶಕ್ತಿ ಹೊಂದಿವೆ.
‘ಸಿಟಿ-ಕಿಲ್ಲರ್’ ಕ್ಷುದ್ರಗ್ರಹಗಳ ಬಗ್ಗೆ ತಿಳಿಯಬೇಕಾದ ಅಂಶಗಳು:
* ಕೆಲ್ಲಿ ಫಾಸ್ಟ್ ಅವರ ಪ್ರಕಾರ, ಭೂಮಿಯ ಸಮೀಪ ಇಂತಹ ಸುಮಾರು 25,000 ಕ್ಷುದ್ರಗ್ರಹಗಳು ಹಾದು ಹೋಗುತ್ತಿವೆ. ಆದರೆ ನಮಗೆ ಅವುಗಳಲ್ಲಿ ಕೇವಲ 40% ಮಾತ್ರ ಎಲ್ಲಿವೆ ಎಂಬುದು ತಿಳಿದಿದೆ.
* “ಅತ್ಯುತ್ತಮ ದೂರದರ್ಶಕಗಳಿದ್ದರೂ (Telescopes)” ಇವುಗಳನ್ನು ಪತ್ತೆ ಹಚ್ಚುವುದು ಕಷ್ಟ. ಏಕೆಂದರೆ ಇವು ಸೂರ್ಯನ ಸುತ್ತ ಭೂಮಿಯ ಜೊತೆಗೇ ಸಾಗುವುದರಿಂದ, ಅವುಗಳ ಮೇಲೆ ಸೂರ್ಯನ ಬೆಳಕು ಪ್ರತಿಫಲಿಸುವುದಿಲ್ಲ. ಇದರಿಂದಾಗಿ ಅವು ಕತ್ತಲೆಯಲ್ಲಿ ಅಡಗಿರುತ್ತವೆ.
ಪರಿಹಾರವೇನು?
ಈ ಸವಾಲನ್ನು ಎದುರಿಸಲು ವಿಜ್ಞಾನಿಗಳು ಮುಂದಿನ ವರ್ಷ ‘ನಿಯರ್-ಅರ್ಥ್ ಆಬ್ಜೆಕ್ಟ್ ಸರ್ವೇಯರ್ ಸ್ಪೇಸ್ ಟೆಲಿಸ್ಕೋಪ್’ (NEO Surveyor) ಅನ್ನು ಉಡಾವಣೆ ಮಾಡಲು ಯೋಜಿಸಿದ್ದಾರೆ. ಇದು ‘ಥರ್ಮಲ್ ಸಿಗ್ನೇಚರ್’ (ಶಾಖದ ಗುರುತು) ಬಳಸಿ ಕತ್ತಲೆಯಲ್ಲಿ ಅಡಗಿರುವ ಕ್ಷುದ್ರಗ್ರಹಗಳನ್ನು ಪತ್ತೆ ಮಾಡುತ್ತದೆ.
“ಕ್ಷುದ್ರಗ್ರಹಗಳು ನಮ್ಮನ್ನು ಹುಡುಕುವ ಮುನ್ನವೇ ನಾವು ಅವುಗಳನ್ನು ಪತ್ತೆ ಹಚ್ಚಬೇಕು” ಎಂದು ಫಾಸ್ಟ್ ಹೇಳಿದ್ದಾರೆ. ಆದರೆ, ಕೇವಲ ಪತ್ತೆ ಹಚ್ಚುವುದು ಸಮಸ್ಯೆಯ ಅರ್ಧ ಭಾಗವಷ್ಟೇ. ಪ್ರಸ್ತುತ ಮಾನವನ ಬಳಿ ಇಂತಹ ಕ್ಷುದ್ರಗ್ರಹಗಳನ್ನು ತಡೆಯಲು ಬೇಕಾದ ‘ರಕ್ಷಣಾ ವ್ಯವಸ್ಥೆ’ ಇಲ್ಲ.
ನಾಸಾದ ಡಾರ್ಟ್ (DART) ಯೋಜನೆಯ ಮುಖ್ಯಸ್ಥೆ ನ್ಯಾನ್ಸಿ ಚಾಬೋಟ್ ಅವರ ಪ್ರಕಾರ, “ಇಂತಹ ಕ್ಷುದ್ರಗ್ರಹಗಳ ಹಾದಿ ತಪ್ಪಿಸಲು ನಮ್ಮ ಬಳಿ ಈಗ ಯಾವುದೇ ಸಕ್ರಿಯ ವ್ಯವಸ್ಥೆಯಿಲ್ಲ.” 2022 ರಲ್ಲಿ ನಾಸಾ ಒಂದು ನೌಕೆಯನ್ನು ಕ್ಷುದ್ರಗ್ರಹಕ್ಕೆ ಅಪ್ಪಳಿಸಿ ಅದರ ಹಾದಿ ಬದಲಿಸುವ ಪರೀಕ್ಷೆ (DART Mission) ನಡೆಸಿ ಯಶಸ್ವಿಯಾಗಿತ್ತು. ಆದರೆ, ತುರ್ತು ಸಮಯದಲ್ಲಿ ಬಳಸಲು ಸಿದ್ಧವಿರುವ ‘ಡಿಫ್ಲೆಕ್ಟರ್ ನೌಕೆಗಳು’ ನಮ್ಮ ಬಳಿ ಸದ್ಯಕ್ಕೆ ಇಲ್ಲ ಎಂದು ಅವರು ಎಚ್ಚರಿಸಿದ್ದಾರೆ. ಹಣಕಾಸಿನ ಕೊರತೆಯಿಂದಾಗಿ ಇಂತಹ ರಕ್ಷಣಾ ವ್ಯವಸ್ಥೆಗಳನ್ನು ನಾವು ‘ಸ್ಟ್ಯಾಂಡ್ಬೈ’ನಲ್ಲಿ ಇಟ್ಟುಕೊಳ್ಳಲು ಸಾಧ್ಯವಾಗುತ್ತಿಲ್ಲ ಎಂದು ಅವರು ಬೇಸರ ವ್ಯಕ್ತಪಡಿಸಿದ್ದಾರೆ.
ಈ ನಡುವೆ, ‘YR4’ ಎಂಬ ಕ್ಷುದ್ರಗ್ರಹದ ಬಗ್ಗೆ ಭಯ ಶುರುವಾಗಿದೆ. 2024 ರಿಂದ ವಿಜ್ಞಾನಿಗಳ ಕಣ್ಣಲ್ಲಿರುವ ಇದು, 2032 ರಲ್ಲಿ ಭೂಮಿಗೆ ಅಪ್ಪಳಿಸುವ 4% ಸಾಧ್ಯತೆಯನ್ನು ಹೊಂದಿದೆ.
