ಮುಂಬೈ: ಭಾರತದ ಪ್ರತಿಷ್ಠಿತ ಉದ್ಯಮ ಸಮೂಹಗಳಲ್ಲಿ ಒಂದಾದ ‘ಗೋದ್ರೇಜ್ ಇಂಡಸ್ಟ್ರೀಸ್ ಗ್ರೂಪ್’ (GIG) ತನ್ನ ನಾಯಕತ್ವದಲ್ಲಿ ಮಹತ್ವದ ಬದಲಾವಣೆಯನ್ನು ಘೋಷಿಸಿದೆ. ಪ್ರಸ್ತುತ ಅಧ್ಯಕ್ಷರಾಗಿರುವ ನಾದಿರ್ ಗೋದ್ರೇಜ್ ಅವರು ಆಗಸ್ಟ್ 2026ರಲ್ಲಿ ನಿವೃತ್ತರಾಗಲಿದ್ದು, ಅವರ ಉತ್ತರಾಧಿಕಾರಿಯಾಗಿ ಪಿರೋಜ್ಶಾ ಗೋದ್ರೇಜ್ ಅಧಿಕಾರ ವಹಿಸಿಕೊಳ್ಳಲಿದ್ದಾರೆ.
2026ರ ಆಗಸ್ಟ್ 14 ರಿಂದ ಜಾರಿಗೆ ಬರುವಂತೆ ಪಿರೋಜ್ಶಾ ಗೋದ್ರೇಜ್ ಅವರು ಸಮೂಹದ ಅಧ್ಯಕ್ಷರಾಗಿ ಜವಾಬ್ದಾರಿ ವಹಿಸಿಕೊಳ್ಳಲಿದ್ದಾರೆ.
ಸುಮಾರು ನಾಲ್ಕು ದಶಕಗಳ ಕಾಲ ಸಂಸ್ಥೆಯನ್ನು ಮುನ್ನಡೆಸಿದ 75 ವರ್ಷದ ನಾದಿರ್ ಗೋದ್ರೇಜ್ ಅವರು ನಿವೃತ್ತಿಯ ನಂತರ ‘ಚೇರ್ಮನ್ ಎಮೆರಿಟಸ್’ (ಗೌರವಾನ್ವಿತ ಅಧ್ಯಕ್ಷರು) ಆಗಿ ಮುಂದುವರಿಯಲಿದ್ದಾರೆ.
ಯುವ ನಾಯಕತ್ವಕ್ಕೆ ಮಣೆ: ಆದಿ ಗೋದ್ರೇಜ್ ಅವರ ಪುತ್ರರಾಗಿರುವ ಪಿರೋಜ್ಶಾ (45), ಈಗಾಗಲೇ ಗೋದ್ರೇಜ್ ಪ್ರಾಪರ್ಟೀಸ್ ಅನ್ನು ಯಶಸ್ವಿಯಾಗಿ ಮುನ್ನಡೆಸಿದ ಅನುಭವ ಹೊಂದಿದ್ದಾರೆ.
ನಾದಿರ್ ಗೋದ್ರೇಜ್ ಅವರ ಪುತ್ರ ಬುರ್ಜಿಸ್ ಗೋದ್ರೇಜ್ ಅವರಿಗೆ ‘ಗೋದ್ರೇಜ್ ಆಗ್ರೋವೆಟ್’ನ ಅಧ್ಯಕ್ಷ ಪಟ್ಟ ನೀಡಲಾಗಿದೆ. ಈ ಮೂಲಕ ಗೋದ್ರೇಜ್ ಸಮೂಹವು ತನ್ನ ಮುಂದಿನ ಪೀಳಿಗೆಯ ನಾಯಕರಿಗೆ ಅಧಿಕಾರವನ್ನು ಹಸ್ತಾಂತರಿಸುವ ಪ್ರಕ್ರಿಯೆಯನ್ನು ಪೂರ್ಣಗೊಳಿಸಿದಂತಾಗಿದೆ.
