ರೋಮ್ (ಇಟಲಿ): ಅಮೆರಿಕ, ಇಸ್ರೇಲ್ ಮತ್ತು ಇರಾನ್ ನಡುವಿನ ಉಲ್ಬಣಗೊಳ್ಳುತ್ತಿರುವ ಸಂಘರ್ಷವು ಈಗ ಜಾಗತಿಕ ವಿಮಾನಯಾನ ಕ್ಷೇತ್ರದ ಮೇಲೆ ಗಂಭೀರ ಪರಿಣಾಮ ಬೀರಲು ಶುರು ಮಾಡಿದೆ. ಇಂಧನದ ಕೊರತೆಯಿಂದಾಗಿ ಇಟಲಿಯ ನಾಲ್ಕು ಪ್ರಮುಖ ವಿಮಾನ ನಿಲ್ದಾಣಗಳಲ್ಲಿ ವಿಮಾನ ಇಂಧನ ಪೂರೈಕೆಗೆ ಕಟ್ಟುನಿಟ್ಟಿನ ಮಿತಿ (Rationing) ಹೇರಲಾಗಿದೆ ಎಂದು ಇಟಲಿ ಸರ್ಕಾರ ಘೋಷಿಸಿದೆ.
ಮಿಲನ್ ಲಿನೇಟ್ (Milan Linate), ಬೊಲೊಗ್ನಾ (Bologna), ವೆನಿಸ್ (Venice) ಮತ್ತು ಟ್ರೆವಿಸೊ (Treviso) ವಿಮಾನ ನಿಲ್ದಾಣಗಳಲ್ಲಿ ಈ ನಿರ್ಬಂಧ ಜಾರಿಯಲ್ಲಿದೆ.ಸೀಮಿತ ಇಂಧನ ಲಭ್ಯವಿರುವ ಕಾರಣ, ತುರ್ತು ವೈದ್ಯಕೀಯ ವಿಮಾನಗಳು (Air Ambulance), ಸರ್ಕಾರಿ ವಿಮಾನಗಳು ಮತ್ತು 3 ಗಂಟೆಗಿಂತ ಹೆಚ್ಚು ದೂರದ ದೀರ್ಘಾವಧಿ ಪ್ರಯಾಣದ ವಿಮಾನಗಳಿಗೆ ಮಾತ್ರ ಇಂಧನ ಪೂರೈಕೆಯಲ್ಲಿ ಆದ್ಯತೆ ನೀಡಲಾಗುತ್ತಿದೆ.
ಪೈಲಟ್ಗಳು ಮತ್ತು ವಿಮಾನಯಾನ ಸಂಸ್ಥೆಗಳಿಗೆ ಈ ಬಗ್ಗೆ ಅಧಿಕೃತ ‘ನೋಟಮ್’ (NOTAM) ಹೊರಡಿಸಲಾಗಿದ್ದು, ಏಪ್ರಿಲ್ 9 ರವರೆಗೆ ಈ ನಿರ್ಬಂಧ ಮುಂದುವರಿಯುವ ಸಾಧ್ಯತೆ ಇದೆ.
ಇರಾನ್ ಮತ್ತು ಅಮೆರಿಕ ನಡುವಿನ ಸಂಘರ್ಷದಿಂದಾಗಿ ವಿಶ್ವದ ಪ್ರಮುಖ ತೈಲ ಸಾಗಣೆ ಮಾರ್ಗವಾದ ಹಾರ್ಮುಜ್ ಜಲಸಂಧಿಯಲ್ಲಿ ಹಡಗುಗಳ ಸಂಚಾರ ಶೇ. 80ರಷ್ಟು ಕುಸಿದಿದೆ.ಯುರೋಪ್ ರಾಷ್ಟ್ರಗಳು ತಮ್ಮ ಶೇ. 30ರಷ್ಟು ವಿಮಾನ ಇಂಧನಕ್ಕಾಗಿ ಪಶ್ಚಿಮ ಏಷ್ಯಾವನ್ನು ಅವಲಂಬಿಸಿವೆ. ಪೂರೈಕೆ ಕಡಿತಗೊಂಡಿರುವುದರಿಂದ ಸಂಗ್ರಹವಿರುವ ಇಂಧನವನ್ನು ಉಳಿಸಿಕೊಳ್ಳಲು ಇಟಲಿ ಈ ಕ್ರಮ ಕೈಗೊಂಡಿದೆ.
