ಅಮೆರಿಕದ ವರ್ಜೀನಿಯಾದ ಸೂಪರ್ಮಾರ್ಕೆಟ್ನಲ್ಲಿ ನಡೆದ ದರೋಡೆಯ ಶಂಕಿತ ಪ್ರಕರಣವೊಂದರಲ್ಲಿ ಗುಜರಾತ್ನ 45 ವರ್ಷದ ಭಾರತೀಯ ಮಹಿಳೆಯೊಬ್ಬರು ಗುಂಡೇಟಿನಿಂದ ಸಾವನ್ನಪ್ಪಿದ್ದಾರೆ.
ಎನ್ಡಿಟಿವಿ ವರದಿಯ ಪ್ರಕಾರ, ಮೃತಪಟ್ಟ ಮಹಿಳೆಯನ್ನು ಮೇಘನಾಬೆನ್ ಪಟೇಲ್ ಎಂದು ಗುರುತಿಸಲಾಗಿದ್ದು, ಅವರು ಕಳೆದ 10 ವರ್ಷಗಳಿಂದ ಆ ಸೂಪರ್ಮಾರ್ಕೆಟ್ನಲ್ಲಿ ಕೆಲಸ ಮಾಡುತ್ತಿದ್ದರು.
ಘಟನೆಯ ಮಾಹಿತಿ ಪಡೆದ ತಕ್ಷಣ ಸ್ಥಳೀಯ ಪೊಲೀಸರು ಸ್ಥಳಕ್ಕೆ ಧಾವಿಸಿ, ಆ ಪ್ರದೇಶವನ್ನು ಸೀಲ್ ಮಾಡಿ ತನಿಖೆಯನ್ನು ಆರಂಭಿಸಿದ್ದಾರೆ. ದಾಳಿಕೋರನನ್ನು ಪತ್ತೆ ಹಚ್ಚಿ ಬಂಧಿಸಲು ವಿಶೇಷ ತಂಡಗಳನ್ನು ರಚಿಸಲಾಗಿದೆ ಎಂದು ವರದಿಯಾಗಿದೆ.
ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಿರುವ ಘಟನೆಯ ವಿಡಿಯೋದಲ್ಲಿ, ಪ್ರಾಣಿಗಳ ಚರ್ಮದ ವಿನ್ಯಾಸದ (animal-print) ಪ್ಯಾಂಟ್, ಫುಲ್ ಸ್ಲೀವ್ ಜಾಕೆಟ್, ಕೈಗವಸು ಮತ್ತು ಮುಖಗವಸು ಧರಿಸಿದ ವ್ಯಕ್ತಿಯೊಬ್ಬ ಸೂಪರ್ಮಾರ್ಕೆಟ್ಗೆ ಪ್ರವೇಶಿಸುವುದು ಕಂಡುಬರುತ್ತದೆ.
ಆ ವ್ಯಕ್ತಿ ಮೇಘನಾಬೆನ್ ಅವರೊಂದಿಗೆ ಮಾತನಾಡುತ್ತಾ, ಗ್ರಾಹಕನಂತೆ ನಟಿಸುತ್ತಾನೆ. ಸ್ವಲ್ಪ ಸಮಯದ ನಂತರ, ಅವನು ತನ್ನ ಕೈಗಳನ್ನು ಜೇಬಿನಲ್ಲಿ ಹಾಕಿ, ಕೌಂಟರ್ ಮುಂದೆ ಬಂದು ಜಾಕೆಟ್ನಿಂದ ಬಂದೂಕನ್ನು ತೆಗೆಯುತ್ತಾನೆ.
ವಿಡಿಯೋದಲ್ಲಿ ದಾಳಿಕೋರನು ಮೇಘನಾಬೆನ್ ಅವರಿಗೆ ಎರಡು ಬಾರಿ ಗುಂಡು ಹಾರಿಸುವುದು ಕಂಡುಬರುತ್ತದೆ, ತಕ್ಷಣ ಅವರು ನೆಲಕ್ಕೆ ಕುಸಿಯುತ್ತಾರೆ. ನಂತರ ಆತ ಕೌಂಟರ್ ಹಾರಿ ಬಂದು ಮತ್ತೊಂದು ಗುಂಡು ಹಾರಿಸಿ ಅಲ್ಲಿಂದ ಪರಾರಿಯಾಗುತ್ತಾನೆ. ಈ ವಿಡಿಯೋದ ಸತ್ಯಾಸತ್ಯತೆಯನ್ನು ಸ್ವತಂತ್ರವಾಗಿ ಪರಿಶೀಲಿಸಲಾಗಿಲ್ಲ.
ಯಾರು ಈ ಮೇಘನಾಬೆನ್ ಪಟೇಲ್?
ದೈನಿಕ್ ಜಾಗರಣ್ ವರದಿಯ ಪ್ರಕಾರ, ಮೇಘನಾಬೆನ್ ಪಟೇಲ್ ಅವರು ಗುಜರಾತ್ನ ಮೆಹ್ಸಾನಾ ಜಿಲ್ಲೆಯ ಬಿಜಾಪುರ ತಾಲೂಕಿನ ಜಂತ್ರಾಲ್ ಗ್ರಾಮದವರು. ಅವರು ಪತಿ ಉಪೇಂದ್ರಭಾಯ್ ಪಟೇಲ್, ಮಗಳು ನಕ್ಷಿ ಮತ್ತು ಮಗ ಸ್ಮಿತ್ ಅವರನ್ನು ಅಗಲಿದ್ದಾರೆ. ಅವರ ತಂದೆ ತಾಯಿ ಕರ್ಸನ್ಭಾಯ್ ಮತ್ತು ಕಪಿಲಾಬೆನ್ ಜಂತ್ರಾಲ್ ಗ್ರಾಮದಲ್ಲಿ ವಾಸವಾಗಿದ್ದಾರೆ. ಗ್ರಾಮಸ್ಥರ ಪ್ರಕಾರ, ಮೇಘನಾಬೆನ್ ತುಂಬಾ ಪ್ರೀತಿಯ ಮತ್ತು ಸರಳ ಸ್ವಭಾವದ ಮಹಿಳೆಯಾಗಿದ್ದರು.
ಅಮೆರಿಕದಲ್ಲಿ ಭಾರತೀಯರ ಮೇಲೆ ನಡೆದಿರುವ ಇತ್ತೀಚಿನ ದಾಳಿಗಳ ಸರಣಿಯಲ್ಲಿ ಇದು ಒಂದಾಗಿದೆ. ಈ ವರ್ಷದ ಮಾರ್ಚ್ನಲ್ಲಿ, 22 ವರ್ಷದ ಚೇತಕ್ ಎಂಬ ಭಾರತೀಯ ಯುವಕನನ್ನೂ ಅಮೆರಿಕದಲ್ಲಿ ಗುಂಡಿಕ್ಕಿ ಕೊಲೆ ಮಾಡಲಾಗಿತ್ತು.
