ನವದೆಹಲಿ: ಜಾಗತಿಕವಾಗಿ ಅತಿ ಹೆಚ್ಚು ಉದ್ವಿಗ್ನಗೊಂಡಿರುವ ಹಾರ್ಮುಜ್ ಜಲಸಂಧಿಯಲ್ಲಿ (Strait of Hormuz) ನಡೆದ ಗುಂಡಿನ ಚಕಮಕಿಯಲ್ಲಿ ಭಾರತೀಯ ಹಡಗು ಸಿಬ್ಬಂದಿಯೊಬ್ಬರು ಬಲಿಯಾಗಿದ್ದಾರೆ. ಯೆಮೆನ್ನತ್ತ ಸಾಗುತ್ತಿದ್ದ ಹಡಗು ಎರಡು ಕಡೆಯ ಸಶಸ್ತ್ರ ಪಡೆಗಳ ನಡುವಿನ ದಾಳಿಗೆ (Crossfire) ಸಿಲುಕಿದಾಗ ಈ ದುರಂತ ಸಂಭವಿಸಿದೆ.
ಅಲ್ ಫೈಜ್ ನೂರ್ ಸುಲೈಮಾನಿ’ (Al Faize Noor Suleimani) ಎಂಬ ಹಡಗಿನಲ್ಲಿದ್ದ 18 ಸಿಬ್ಬಂದಿಗಳಲ್ಲಿ ಒಬ್ಬರಾದ ಕೆರ್ ಎಂಬುವವರು, ಹಡಗಿನ ಮೇಲೆ ನಡೆದ “ಗುಂಡಿನ ಚಕಮಕಿ” (crossfire) ನಡುವೆ ಸಿಲುಕಿ ಮೃತಪಟ್ಟಿದ್ದಾರೆ ಎಂದು ಮೂಲಗಳು ಖಚಿತಪಡಿಸಿವೆ.
ಈ ಕುರಿತು ದುಬೈನಲ್ಲಿರುವ ಭಾರತೀಯ ರಾಯಭಾರ ಕಚೇರಿಯು ‘X’ (ಟ್ವಿಟರ್) ನಲ್ಲಿ ಪೋಸ್ಟ್ ಮಾಡಿದ್ದು: “ಸಮುದ್ರದಲ್ಲಿ ನಡೆದ ದುರದೃಷ್ಟಕರ ಘಟನೆಯಲ್ಲಿ ಭಾರತೀಯ ಸಿಬ್ಬಂದಿಯೊಬ್ಬರು ಸಾವನ್ನಪ್ಪಿರುವುದು ನಮಗೆ ತೀವ್ರ ದುಃಖ ತಂದಿದೆ. ರಾಯಭಾರ ಕಚೇರಿಯು ಹಡಗಿನ ಮಾಲೀಕರೊಂದಿಗೆ ಸಂಪರ್ಕದಲ್ಲಿದ್ದು, ಹೆಚ್ಚಿನ ವಿವರಗಳನ್ನು ಪಡೆದುಕೊಳ್ಳುತ್ತಿದೆ. ಈ ವಿಷಯದಲ್ಲಿ ಸಾಧ್ಯವಿರುವ ಎಲ್ಲಾ ನೆರವನ್ನು ಆದ್ಯತೆಯ ಮೇಲೆ ನೀಡಲಾಗುವುದು. ನಮ್ಮ ಆಳವಾದ ಸಂತಾಪಗಳು,” ಎಂದು ತಿಳಿಸಿದೆ.
ಇಂಡಿಯನ್ ಸೇಲಿಂಗ್ ವೆಸೆಲ್ಸ್ ಅಸೋಸಿಯೇಷನ್ನ ಪ್ರಧಾನ ಕಾರ್ಯದರ್ಶಿ ಆಡಮ್ ಭಾಯಾ ಅವರು ‘ದಿ ಇಂಡಿಯನ್ ಎಕ್ಸ್ಪ್ರೆಸ್’ಗೆ ಮಾಹಿತಿ ನೀಡಿದ್ದು, ಹಡಗು “ಹಾರ್ಮುಜ್ ಜಲಸಂಧಿಯನ್ನು ದಾಟುತ್ತಿದ್ದಾಗ” ಈ ಘಟನೆ ಸಂಭವಿಸಿದೆ ಎಂದು ಹೇಳಿದ್ದಾರೆ. ಅಮೀನ್ ಸಲೇಮಾಮದ್ ಸುಂಭಾನಿಯಾ ಹಡಗಿನ ಕ್ಯಾಪ್ಟನ್ ಆಗಿದ್ದರು ಮತ್ತು ಕೆರ್ ಅವರು ಘಟನೆಯ ಸಮಯದಲ್ಲಿ “ಇಂಜಿನ್ ರೂಮ್ ಬಳಿ” ಇದ್ದರು.
ದುಬೈನಲ್ಲಿರುವ ಭಾರತೀಯ ರಾಯಭಾರ ಕಚೇರಿಗೆ ಪತ್ರ ಬರೆದಿರುವ ಭಾಯಾ, “ಈ ಘಟನೆಯು ನಾವಿಕ ಸಮುದಾಯ ಮತ್ತು ಮೃತರ ಕುಟುಂಬ ಸದಸ್ಯರಲ್ಲಿ ಭಾರಿ ಭಯ ಮತ್ತು ದುಃಖವನ್ನು ಉಂಟುಮಾಡಿದೆ. ಇಂತಹ ಸಂದರ್ಭಗಳಲ್ಲಿ ಅಮಾಯಕ ಭಾರತೀಯ ನಾವಿಕನ ಪ್ರಾಣಹಾನಿಯಾಗಿರುವುದು ತೀವ್ರ ಕಷ್ಟದಾಯಕವಾಗಿದ್ದು, ಸಂಬಂಧಪಟ್ಟ ಅಧಿಕಾರಿಗಳು ಈ ಬಗ್ಗೆ ತುರ್ತು ಗಮನ ಹರಿಸುವ ಅಗತ್ಯವಿದೆ,” ಎಂದು ತಿಳಿಸಿದ್ದಾರೆ.
ಶುಕ್ರವಾರ ಸಂಜೆ 6 ಗಂಟೆಯ ಸುಮಾರಿಗೆ ‘ಪ್ರೇಮ್ ಸಾಗರ್’ ಎಂಬ ಹೆಸರಿನ ಮತ್ತೊಂದು ಹಡಗು ಉಳಿದ 17 ಸಿಬ್ಬಂದಿಗಳನ್ನು ರಕ್ಷಿಸಿ ದುಬೈಗೆ ಕರೆತಂದಿದೆ ಎಂದು ಭಾಯಾ ಹೇಳಿದ್ದಾರೆ.
ಕೆರ್ ಅವರ ಅಂತ್ಯಕ್ರಿಯೆಯನ್ನು ದುಬೈನಲ್ಲಿ ನಡೆಸಲು ಬೆಂಬಲ ನೀಡುವಂತೆ ಮತ್ತು “ಎಲ್ಲಾ ಕಾನೂನು ಹಾಗೂ ರಾಯಭಾರ ಕಚೇರಿಯ ದಾಖಲಾತಿ ಪ್ರಕ್ರಿಯೆಗಳನ್ನು ಸುಗಮಗೊಳಿಸಲು ಮತ್ತು ಬದುಕುಳಿದಿರುವ ಇತರ ಸಿಬ್ಬಂದಿಗಳ ಸುರಕ್ಷತೆಯನ್ನು ಖಚಿತಪಡಿಸಿಕೊಳ್ಳಲು” ಭಾಯಾ ರಾಯಭಾರ ಕಚೇರಿಯನ್ನು ಕೋರಿದ್ದಾರೆ. ಅವರ ಪ್ರಕಾರ, ಹಡಗಿನಲ್ಲಿದ್ದ ಎಲ್ಲರೂ ಭಾರತೀಯರೇ ಆಗಿದ್ದರು.
ಭಾಯಾ ನೀಡಿದ ಮಾಹಿತಿಯ ಪ್ರಕಾರ, ಮೃತ ಕೆರ್ ಅವರು ದ್ವಾರಕಾದ ಜಾಮ್ ಸಲಾಯಾ ಪಟ್ಟಣಕ್ಕೆ ಸೇರಿದವರಾಗಿದ್ದು, ಬುಧವಾರ ಮಧ್ಯಾಹ್ನ ದುಬೈನಿಂದ ಹಡಗಿನಲ್ಲಿ ಪ್ರಯಾಣ ಬೆಳೆಸಿದ್ದರು.
