ನವದೆಹಲಿ: ಪಶ್ಚಿಮ ಏಷ್ಯಾದಲ್ಲಿನ ಭೀಕರ ಸಂಘರ್ಷದಿಂದಾಗಿ ಸ್ಥಗಿತಗೊಂಡಿದ್ದ ಭಾರತ ಮತ್ತು ದೋಹಾ ನಡುವಿನ ವಿಮಾನ ಸಂಚಾರವು ನಾಳೆಯಿಂದ (ಮೇ 1, 2026) ಪೂರ್ಣ ಪ್ರಮಾಣದಲ್ಲಿ ಆರಂಭವಾಗಲಿದೆ. ಈ ಕುರಿತು ದೋಹಾದಲ್ಲಿರುವ ಭಾರತೀಯ ರಾಯಭಾರ ಕಚೇರಿಯು ಅಧಿಕೃತ ಪ್ರಕಟಣೆ ಹೊರಡಿಸಿದ್ದು, ಸಂಘರ್ಷದ ಕಾರಣದಿಂದಾಗಿ ಕಳೆದ ಎರಡು ತಿಂಗಳುಗಳಿಂದ ಅನುಭವಿಸುತ್ತಿದ್ದ ಪ್ರಯಾಣದ ಸಂಕಷ್ಟಕ್ಕೆ ಈಗ ತೆರೆ ಬೀಳಲಿದೆ.
ಏರ್ ಇಂಡಿಯಾ (Air India), ಏರ್ ಇಂಡಿಯಾ ಎಕ್ಸ್ಪ್ರೆಸ್ ಮತ್ತು ಇಂಡಿಗೋ (IndiGo) ಸಂಸ್ಥೆಗಳು ದೋಹಾ ಮತ್ತು ಭಾರತದ ಪ್ರಮುಖ ನಗರಗಳ ನಡುವೆ ತಮ್ಮ ಸೇವೆಯನ್ನು ಪುನರಾರಂಭಿಸಲಿವೆ.
ಫೆಬ್ರವರಿ 28 ರಂದು ಆರಂಭವಾದ ಪ್ರಾದೇಶಿಕ ಯುದ್ಧದಿಂದಾಗಿ ಖತಾರ್ ವಾಯುಪ್ರದೇಶವನ್ನು ವಾಣಿಜ್ಯ ವಿಮಾನಗಳಿಗೆ ಮುಚ್ಚಲಾಗಿತ್ತು. ಈಗ ಇಸ್ಲಾಮಾಬಾದ್ನಲ್ಲಿ ನಡೆದ ಮಾತುಕತೆಯ ಫಲವಾಗಿ ಏರ್ಪಡಿಸಿರುವ ತಾತ್ಕಾಲಿಕ ಕದನ ವಿರಾಮದಿಂದಾಗಿ ವಿಮಾನ ಹಾರಾಟಕ್ಕೆ ಹಸಿರು ನಿಶಾನೆ ಸಿಕ್ಕಿದೆ.
ಇಂಡಿಗೋ ಸಂಸ್ಥೆಯು ದೆಹಲಿ, ಮುಂಬೈ, ಬೆಂಗಳೂರು, ಚೆನ್ನೈ, ಹೈದರಾಬಾದ್, ಕೊಚ್ಚಿ ಮತ್ತು ಕಣ್ಣೂರು ಸೇರಿದಂತೆ ಒಟ್ಟು 7 ನಗರಗಳಿಂದ ವಾರಕ್ಕೆ 60ಕ್ಕೂ ಹೆಚ್ಚು ವಿಮಾನಗಳನ್ನು ಕಾರ್ಯಾಚರಣೆ ಮಾಡುವುದಾಗಿ ತಿಳಿಸಿದೆ.
