ವಾಷಿಂಗ್ಟನ್: ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ತಮ್ಮ ನೇರ ಮತ್ತು ವಿವಾದಾತ್ಮಕ ಹೇಳಿಕೆಗಳಿಂದಲೇ ಸದಾ ಸುದ್ದಿಯಲ್ಲಿರುವವರು. ಇದೀಗ ಅವರು ನೀಡಿರುವ ಮತ್ತೊಂದು ಹೇಳಿಕೆ ಜಾಗತಿಕ ಮಟ್ಟದಲ್ಲಿ ಭಾರಿ ಚರ್ಚೆಗೆ ಗ್ರಾಸವಾಗಿದೆ. “ನಾನು ಯಶಸ್ವಿ ವ್ಯಕ್ತಿಗಳನ್ನು ದ್ವೇಷಿಸುತ್ತೇನೆ, ನನಗೆ ಸೋತವರ (Losers) ಜೊತೆ ಕಾಲ ಕಳೆಯುವುದೇ ಹೆಚ್ಚು ಇಷ್ಟ” ಎಂದು ಹೇಳುವ ಮೂಲಕ ಟ್ರಂಪ್ ಎಲ್ಲರನ್ನೂ ಅಚ್ಚರಿಗೊಳಿಸಿದ್ದಾರೆ.
ತಮ್ಮ ಮನಸ್ಥಿತಿಯ ಬಗ್ಗೆ ಮುಕ್ತವಾಗಿ ಮಾತನಾಡಿರುವ ಅವರು, ತಮಗಿಂತ ಕಡಿಮೆ ಸಾಧನೆ ಮಾಡಿದವರ ಅಥವಾ ಸೋತವರ ಮಧ್ಯೆ ಇದ್ದಾಗ ತಮಗೆ ಹೆಚ್ಚಿನ ಆತ್ಮವಿಶ್ವಾಸ ಮತ್ತು ಆರಾಮದಾಯಕ ಅನುಭವವಾಗುತ್ತದೆ ಎಂಬರ್ಥದಲ್ಲಿ ಮಾತನಾಡಿದ್ದಾರೆ.
“ನಾನು ಯಶಸ್ವಿ ವ್ಯಕ್ತಿಗಳನ್ನು ಇಷ್ಟಪಡುವುದಿಲ್ಲ. ನಾನು ಯಾವಾಗಲೂ ಸೋತವರ ಜೊತೆ ಇರಲು ಬಯಸುತ್ತೇನೆ, ಆಗಲೇ ನನಗೆ ಹೆಚ್ಚು ಉತ್ತಮ ಭಾವನೆ ಮೂಡುತ್ತದೆ” ಎಂದು ಟ್ರಂಪ್ ಮಾರ್ಮಿಕವಾಗಿ ನುಡಿದಿದ್ದಾರೆ. ತಮಗಿಂತ ಹೆಚ್ಚು ಪ್ರಭಾವಶಾಲಿ ಅಥವಾ ಯಶಸ್ವಿ ವ್ಯಕ್ತಿಗಳಿದ್ದಾಗ ಉಂಟಾಗುವ ಸ್ಪರ್ಧಾತ್ಮಕ ಒತ್ತಡಕ್ಕಿಂತ, ಸೋತವರ ಮಧ್ಯೆ ಇದ್ದಾಗ ಸಿಗುವ ‘ಶ್ರೇಷ್ಠತೆಯ ಭಾವ’ ತಮಗೆ ಇಷ್ಟ ಎಂಬುದು ಅವರ ಮಾತಿನ ಹಿಂದಿನ ಉದ್ದೇಶ ಎನ್ನಲಾಗಿದೆ.
ಟ್ರಂಪ್ ಅವರ ಈ ಹೇಳಿಕೆ ಹೊರಬೀಳುತ್ತಿದ್ದಂತೆ ಪರ-ವಿರೋಧದ ಚರ್ಚೆಗಳು ಆರಂಭವಾಗಿವೆ. ಕೆಲವರು ಇದನ್ನು ಅವರ ‘ಹಾಸ್ಯ ಪ್ರವೃತ್ತಿ’ ಎಂದರೆ, ಇನ್ನು ಕೆಲವರು ಇದು ಅವರ ‘ಅಹಂಕಾರದ ಪರಮಾವಧಿ’ ಎಂದು ಟೀಕಿಸುತ್ತಿದ್ದಾರೆ.
