ನವದೆಹಲಿ: ಭಾರತೀಯರಲ್ಲಿ ಹೃದಯಾಘಾತದ ಲಕ್ಷಣಗಳನ್ನು ಪತ್ತೆಹಚ್ಚಲು ಬಳಸುವ ಅಂತರಾಷ್ಟ್ರೀಯ ಪರೀಕ್ಷಾ ವಿಧಾನಗಳು (Risk Calculators) ತಪ್ಪು ದಾರಿಗೆಳೆಯುತ್ತಿವೆ ಎಂದು ದೆಹಲಿಯ ಜಿಬಿ ಪಂತ್ ಆಸ್ಪತ್ರೆಯ ಸಂಶೋಧಕರು ತಿಳಿಸಿದ್ದಾರೆ. ಮೊದಲ ಬಾರಿ ಹೃದಯಾಘಾತಕ್ಕೆ ಒಳಗಾದ ಸುಮಾರು 5,000 ಭಾರತೀಯ ರೋಗಿಗಳ ದತ್ತಾಂಶವನ್ನು ವಿಶ್ಲೇಷಿಸಿದಾಗ, ಅವರಲ್ಲಿ ಶೇ. 80ರಷ್ಟು ಮಂದಿಯನ್ನು ಈ ಪರೀಕ್ಷೆಗಳು ‘ಕಡಿಮೆ ಅಪಾಯ’ (Low Risk) ಇರುವವರು ಎಂದು ಗುರುತಿಸಿರುವುದು ಬೆಳಕಿಗೆ ಬಂದಿದೆ.
ಜಾಗತಿಕವಾಗಿ ಮಾನ್ಯತೆ ಪಡೆದ ಐದು ಪ್ರಮುಖ ರಿಸ್ಕ್ ಮಾಡೆಲ್ಗಳು ಭಾರತೀಯ ರೋಗಿಗಳಲ್ಲಿ ಅಡಗಿರುವ ಅಪಾಯವನ್ನು ಗುರುತಿಸುವಲ್ಲಿ ಸೋತಿವೆ. ಕೇವಲ ಶೇ. 11 ರಿಂದ 20 ರಷ್ಟು ರೋಗಿಗಳನ್ನು ಮಾತ್ರ ಇವು ಸರಿಯಾಗಿ ‘ಹೆಚ್ಚಿನ ಅಪಾಯ’ ಇರುವವರು ಎಂದು ಗುರುತಿಸಿವೆ.
ಕಡಿಮೆ ವಯಸ್ಸಿನಲ್ಲೇ ಹೃದಯಾಘಾತ: ಪಾಶ್ಚಿಮಾತ್ಯ ದೇಶಗಳಲ್ಲಿ ಹೃದಯಾಘಾತ ಸಾಮಾನ್ಯವಾಗಿ ವೃದ್ಧಾಪ್ಯದಲ್ಲಿ ಕಂಡುಬರುತ್ತದೆ. ಆದರೆ ಭಾರತದಲ್ಲಿ ಈ ಸಂಶೋಧನೆಗೆ ಒಳಗಾದ ರೋಗಿಗಳ ಸರಾಸರಿ ವಯಸ್ಸು ಕೇವಲ 54 ವರ್ಷ. ಇದು ಭಾರತೀಯರಲ್ಲಿ ಹೃದಯ ಸಂಬಂಧಿ ಕಾಯಿಲೆಗಳು ಎಷ್ಟು ಬೇಗ ಆರಂಭವಾಗುತ್ತಿವೆ ಎಂಬುದನ್ನು ತೋರಿಸುತ್ತದೆ.
ಭಾರತೀಯರ ದೇಹದ ತೂಕ ಸಾಮಾನ್ಯವಾಗಿದ್ದರೂ, ಅವರಲ್ಲಿ ಇನ್ಸುಲಿನ್ ಪ್ರತಿರೋಧ (Insulin Resistance) ಮತ್ತು ಕಿಬ್ಬೊಟ್ಟೆಯ ಕೊಬ್ಬು ಹೆಚ್ಚಾಗಿರುತ್ತದೆ. ಪಾಶ್ಚಿಮಾತ್ಯ ಮಾದರಿಗಳು ಕೇವಲ ವಯಸ್ಸು ಮತ್ತು ಎಲ್ಡಿಎಲ್ (LDL) ಕೊಲೆಸ್ಟ್ರಾಲ್ ಮೇಲೆ ಹೆಚ್ಚು ಗಮನ ಹರಿಸುವುದರಿಂದ ಭಾರತೀಯರ ಈ ವಿಶೇಷ ಲಕ್ಷಣಗಳನ್ನು ಕಡೆಗಣಿಸುತ್ತಿವೆ.
ಕೊಲೆಸ್ಟ್ರಾಲ್ ವ್ಯತ್ಯಾಸ: ಭಾರತೀಯರಲ್ಲಿ ಎಲ್ಡಿಎಲ್ (ಕೆಟ್ಟ ಕೊಲೆಸ್ಟ್ರಾಲ್) ಮಟ್ಟ ಅಷ್ಟೊಂದು ಹೆಚ್ಚಿಲ್ಲದಿದ್ದರೂ, ಎಚ್ಡಿಎಲ್ (ಒಳ್ಳೆಯ ಕೊಲೆಸ್ಟ್ರಾಲ್) ಕಡಿಮೆ ಇರುತ್ತದೆ ಮತ್ತು ಟ್ರೈಗ್ಲಿಸರೈಡ್ಗಳು ಹೆಚ್ಚಿರುತ್ತವೆ. ಇದನ್ನು ಹಳೆಯ ಮಾದರಿಗಳು ಅಪಾಯ ಎಂದು ಪರಿಗಣಿಸುವುದಿಲ್ಲ.
ನಿರ್ಲಕ್ಷಿತ ಅಂಶಗಳು: ವಾಯು ಮಾಲಿನ್ಯ, ಮಾನಸಿಕ ಒತ್ತಡ, ವಂಶವಾಹಿ ಲಕ್ಷಣಗಳು ಮತ್ತು ದೀರ್ಘಕಾಲದ ಮೂತ್ರಪಿಂಡದ ಕಾಯಿಲೆಗಳಂತಹ ಅಂಶಗಳನ್ನು ಈ ಜಾಗತಿಕ ಪರೀಕ್ಷೆಗಳು ಗಣನೆಗೆ ತೆಗೆದುಕೊಳ್ಳುತ್ತಿಲ್ಲ.
ಸಕ್ಕರೆ ಕಾಯಿಲೆಯ ಪ್ರಭಾವ: ಭಾರತವನ್ನು ‘ವಿಶ್ವದ ಮಧುಮೇಹ ರಾಜಧಾನಿ’ ಎಂದು ಕರೆಯಲಾಗುತ್ತದೆ. ಮಧುಮೇಹವು ಭಾರತೀಯರಲ್ಲಿ ಹೃದಯಾಘಾತದ ಸಾಧ್ಯತೆಯನ್ನು ದುಪ್ಪಟ್ಟುಗೊಳಿಸುತ್ತಿದ್ದರೂ, ರಿಸ್ಕ್ ಕ್ಯಾಲ್ಕುಲೇಟರ್ಗಳು ಇದನ್ನು ಸರಿಯಾಗಿ ಅಳೆಯುತ್ತಿಲ್ಲ.
