ನವದೆಹಲಿ: ಅಂಗಡಿ ಅಥವಾ ಸೂಪರ್ ಮಾರ್ಕೆಟ್ಗಳಲ್ಲಿ ನಾವು ಹಣ್ಣುಗಳನ್ನು ಕೊಳ್ಳುವಾಗ ಅವುಗಳ ಮೇಲೆ ಸಣ್ಣ ಸ್ಟಿಕ್ಕರ್ಗಳನ್ನು ನೋಡಿರುತ್ತೇವೆ. ಇವು ಹಣ್ಣಿನ ಗುಣಮಟ್ಟವನ್ನು ಸೂಚಿಸುತ್ತವೆ ಎಂದು ನಾವು ಭಾವಿಸುತ್ತೇವೆ. ಆದರೆ, ಭಾರತೀಯ ಆಹಾರ ಸುರಕ್ಷತೆ ಮತ್ತು ಗುಣಮಟ್ಟ ಪ್ರಾಧಿಕಾರ (FSSAI) ಈಗ ಈ ಬಗ್ಗೆ ಗಂಭೀರ ಎಚ್ಚರಿಕೆ ನೀಡಿದೆ. ಹಣ್ಣುಗಳನ್ನು ತಿನ್ನುವ ಮೊದಲು ಈ ಸ್ಟಿಕ್ಕರ್ಗಳನ್ನು ಸರಿಯಾಗಿ ತೆಗೆಯದಿದ್ದರೆ ಅದು ನಿಮ್ಮ ಆರೋಗ್ಯದ ಮೇಲೆ ಕೆಟ್ಟ ಪರಿಣಾಮ ಬೀರಬಹುದು ಎಂದು ಎಚ್ಚರಿಸಿದೆ.
ಸ್ಟಿಕ್ಕರ್ಗಳನ್ನು ಹಣ್ಣಿಗೆ ಅಂಟಿಸಲು ಬಳಸುವ ಅಂಟು ಅಥವಾ ಗಮ್ ಆಹಾರ ಯೋಗ್ಯವಲ್ಲದ ರಾಸಾಯನಿಕಗಳನ್ನು ಒಳಗೊಂಡಿರುತ್ತದೆ. ಈ ಅಂಟು ಹಣ್ಣಿನ ಸಿಪ್ಪೆಯ ಮೂಲಕ ಒಳಭಾಗಕ್ಕೂ ಸೇರುವ ಸಾಧ್ಯತೆಯಿರುತ್ತದೆ. ಇದು ದೇಹ ಸೇರಿದರೆ ಜೀರ್ಣಕ್ರಿಯೆಯ ಸಮಸ್ಯೆಗಳಿಗೆ ಕಾರಣವಾಗಬಹುದು.
ಅನೇಕ ವ್ಯಾಪಾರಿಗಳು ಹಣ್ಣುಗಳು ‘ಫ್ರೆಶ್’ ಅಥವಾ ‘ಪ್ರೀಮಿಯಂ’ ಎಂದು ತೋರಿಸಲು ಇಂತಹ ಸ್ಟಿಕ್ಕರ್ ಬಳಸುತ್ತಾರೆ. ಆದರೆ, ವಾಸ್ತವದಲ್ಲಿ ಹಣ್ಣಿನ ಮೇಲಿರುವ ಕೊಳೆ, ಕಲೆ ಅಥವಾ ಹಣ್ಣು ಕೊಳೆಯುತ್ತಿರುವುದನ್ನು ಮುಚ್ಚಿಡಲು ಇವುಗಳನ್ನು ಬಳಸುವ ಸಾಧ್ಯತೆಯೂ ಇರುತ್ತದೆ. ಈ ಸ್ಟಿಕ್ಕರ್ಗಳ ಅಂಚಿನಲ್ಲಿ ಧೂಳು, ಬ್ಯಾಕ್ಟೀರಿಯಾ ಮತ್ತು ಕೀಟನಾಶಕಗಳ ಅಂಶಗಳು ಸುಲಭವಾಗಿ ಅಂಟಿಕೊಳ್ಳುತ್ತವೆ. ಹಣ್ಣನ್ನು ತೊಳೆಯುವಾಗಲೂ ಇವು ಸ್ಟಿಕ್ಕರ್ ಅಡಿಯಲ್ಲಿ ಉಳಿದುಕೊಳ್ಳಬಹುದು.
ಸುರಕ್ಷಿತವಾಗಿ ಹಣ್ಣು ಸೇವಿಸಲು ಇಲ್ಲಿವೆ ಟಿಪ್ಸ್:
ಸ್ಟಿಕ್ಕರ್ ಭಾಗವನ್ನು ಕತ್ತರಿಸಿ: ಕೇವಲ ಸ್ಟಿಕ್ಕರ್ ತೆಗೆದರೆ ಸಾಲದು, ಆ ಸ್ಟಿಕ್ಕರ್ ಅಂಟಿಸಲಾಗಿದ್ದ ಹಣ್ಣಿನ ಸಿಪ್ಪೆಯ ಭಾಗವನ್ನು ಸ್ವಲ್ಪ ಮಟ್ಟಿಗೆ ಕತ್ತರಿಸಿ ತೆಗೆಯುವುದು ಉತ್ತಮ.
ಸಿಪ್ಪೆ ಸುಲಿಯಿರಿ: ಸಾಧ್ಯವಾದಷ್ಟು ಸೇಬು, ಪೇರಳೆ ಅಂತಹ ಹಣ್ಣುಗಳ ಸಿಪ್ಪೆಯನ್ನು ಸುಲಿದು ತಿನ್ನುವುದು ರಾಸಾಯನಿಕಗಳಿಂದ ಬಚಾವಾಗಲು ಉತ್ತಮ ಮಾರ್ಗ.
ಸರಿಯಾಗಿ ತೊಳೆಯಿರಿ: ಹಣ್ಣುಗಳನ್ನು ಕನಿಷ್ಠ 5 ನಿಮಿಷಗಳ ಕಾಲ ಹರಿಯುವ ನೀರಿನಲ್ಲಿ ಚೆನ್ನಾಗಿ ತೊಳೆಯಿರಿ. ಕೇವಲ ನೀರು ಚಿಮುಕಿಸುವುದು ಸಾಕಾಗುವುದಿಲ್ಲ.
ಸ್ಟಿಕ್ಕರ್ ನೋಡಿ ಮೋಸಹೋಗಬೇಡಿ: ಹಣ್ಣಿನ ಮೇಲಿರುವ ಸ್ಟಿಕ್ಕರ್ ಅದು ಉತ್ತಮ ಗುಣಮಟ್ಟದ್ದು ಎಂಬುದಕ್ಕೆ ಗ್ಯಾರಂಟಿ ಅಲ್ಲ. ಹಣ್ಣಿನ ಬಣ್ಣ, ವಾಸನೆ ಮತ್ತು ಸ್ಪರ್ಶದ ಮೂಲಕ ಅದರ ಗುಣಮಟ್ಟ ಪರೀಕ್ಷಿಸಿ.
