ನೈಸ್ (ಫ್ರಾನ್ಸ್): ಭಾರತ ಮತ್ತು ಫ್ರಾನ್ಸ್ ನಡುವಿನ ರಾಜತಾಂತ್ರಿಕ ಸಂಬಂಧಕ್ಕೆ ಈಗ ಬಾಲಿವುಡ್ ನ ಮಾರುತ ಹೊಸ ಕಳೆ ತಂದಿದೆ. ಇತ್ತೀಚೆಗೆ ಪ್ರಧಾನಿ ನರೇಂದ್ರ ಮೋದಿ ಅವರು ಫ್ರಾನ್ಸ್ ಗೆ ಭೇಟಿ ನೀಡಿದ್ದು, ಈ ಪ್ರವಾಸದ ಸುಂದರ ಕ್ಷಣಗಳ ರೀಕ್ಯಾಪ್ (Recap) ವಿಡಿಯೋ ಒಂದನ್ನು ಫ್ರೆಂಚ್ ಅಧ್ಯಕ್ಷ ಎಮ್ಯಾನುಯೆಲ್ ಮ್ಯಾಕ್ರಾನ್ ತಮ್ಮ ಸೋಷಿಯಲ್ ಮೀಡಿಯಾ ಖಾತೆಗಳಲ್ಲಿ ಹಂಚಿಕೊಂಡಿದ್ದಾರೆ. ವಿಶೇಷವೆಂದರೆ, ಈ ವಿಡಿಯೋದ ಹಿನ್ನೆಲೆಯಲ್ಲಿ ಆದಿತ್ಯ ಧರ್ ನಿರ್ದೇಶನದ, ರಣವೀರ್ ಸಿಂಗ್ ಅಭಿನಯದ ‘ಧುರಂಧರ್’ ಚಿತ್ರದ ಸೂಪರ್ ಹಿಟ್ ಹಾಡು ‘ಆರಿ ಆರಿ’ ಪ್ಲೇ ಆಗುತ್ತದೆ.
ಎಕ್ಸ್ (ಟ್ವಿಟರ್) ಮತ್ತು ಇನ್ಸ್ಟಾಗ್ರಾಮ್ನಲ್ಲಿ ಶೇರ್ ಮಾಡಲಾಗಿರುವ ಈ ವಿಡಿಯೋ, ಇಬ್ಬರು ಜಾಗತಿಕ ನಾಯಕರು ಪರಸ್ಪರ ಹಸ್ತಲಾಘವ ಮಾಡಿ, ಆಲಿಂಗಿಸಿಕೊಳ್ಳುವ ದೃಶ್ಯದೊಂದಿಗೆ ಆರಂಭವಾಗುತ್ತದೆ. ಇದು ಉಭಯ ನಾಯಕರ ನಡುವಿನ ಆಪ್ತ ಒಡನಾಟ ಮತ್ತು ದೇಶಗಳ ನಡುವಿನ ಬಲವಾದ ಕಾರ್ಯತಂತ್ರದ ಪಾಲುದಾರಿಕೆಯನ್ನು ಎತ್ತಿ ತೋರಿಸುತ್ತದೆ.
‘ನೈಸ್’ ನಗರದಲ್ಲಿ ಭೇಟಿ: ಮೋದಿ-ಮ್ಯಾಕ್ರಾನ್ ಸೋಷಿಯಲ್ ಮೀಡಿಯಾ ಜುಗಲ್ಬಂದಿ
ಇದಕ್ಕೂ ಮುನ್ನ ಅಧ್ಯಕ್ಷ ಮ್ಯಾಕ್ರಾನ್ ಅವರು ಪ್ರಧಾನಿ ಮೋದಿ ಅವರೊಂದಿಗೆ ಸೆಲ್ಫಿ ಒಂದನ್ನು ಹಂಚಿಕೊಂಡು “ನೈಸ್!” (Nice!) ಎಂದು ಬರೆದುಕೊಂಡಿದ್ದರು. ಇದಕ್ಕೆ ಅಷ್ಟೇ ಚತುರತೆಯಿಂದ ಪ್ರತಿಕ್ರಿಯಿಸಿದ ಪ್ರಧಾನಿ ಮೋದಿ, “ನೈಸ್ ನಗರದಲ್ಲಿ ನಿಮ್ಮನ್ನು ಭೇಟಿಯಾಗಿದ್ದು ತುಂಬಾ ನೈಸ್ ಆಗಿತ್ತು (ಚೆನ್ನಾಗಿತ್ತು)” ಎಂದು ಬರೆದು, ಭಾರತ-ಫ್ರಾನ್ಸ್ ಪಾಲುದಾರಿಕೆ ಹೊಸ ಎತ್ತರಕ್ಕೆ ಬೆಳೆಯಲಿದೆ ಎಂದು ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.
ನೈಸ್ನಿಂದ ಹಿಡಿದು ಜಿ-7 ಇವಿಯಾನ್ ಮತ್ತು ಪ್ಯಾರಿಸ್ನ ವಿವಾಟೆಕ್ ವರೆಗೆ, ಮೋದಿ ಅವರ ಈ 7ನೇ ಭೇಟಿಯು ಫ್ರಾನ್ಸ್-ಭಾರತದ ಅಸಾಧಾರಣ ಬಾಂಧವ್ಯವನ್ನು ಪ್ರತಿಬಿಂಬಿಸುತ್ತದೆ. ಪ್ರತಿಭೆ, ಹೂಡಿಕೆ ಮತ್ತು ಉಭಯ ದೇಶಗಳ ಜನರ ಅಭಿವೃದ್ಧಿಗಾಗಿ ನಾವು ಹೊಸ ಅಧ್ಯಾಯವನ್ನು ಬರೆಯುತ್ತಿದ್ದೇವೆ ಎಂದು ಎಮ್ಯಾನುಯೆಲ್ ಮ್ಯಾಕ್ರಾನ್ ತಿಳಿಸಿದ್ದಾರೆ.
‘ಭಾರತ್ ಇನ್ನೋವೇಟ್ಸ್ 2026’ ಸಮಾವೇಶ ಉದ್ಘಾಟನೆ
ಇದೇ ಸಂದರ್ಭದಲ್ಲಿ ಉಭಯ ನಾಯಕರು ಜಂಟಿಯಾಗಿ ‘ಭಾರತ್ ಇನ್ನೋವೇಟ್ಸ್ 2026’ (Bharat Innovates 2026) ಎಂಬ ಐತಿಹಾಸಿಕ ಸಮಾವೇಶವನ್ನು ನೈಸ್ ನಗರದಲ್ಲಿ ಉದ್ಘಾಟಿಸಿದರು.
ಈ ವೇಳೆ ಮಾತನಾಡಿದ ಪ್ರಧಾನಿ ಮೋದಿ, “ನಾವೀನ್ಯತೆ (Innovation) ಎಂಬುದು ಭಾರತೀಯರ ಡಿಎನ್ಎಯಲ್ಲೇ ಇದೆ. ಗಣಿತದಿಂದ ಖಗೋಳಶಾಸ್ತ್ರದವರೆಗೆ, ವೈದ್ಯಕೀಯದಿಂದ ಯೋಗದವರೆಗೆ ಭಾರತದ ಕೊಡುಗೆ ಇಡೀ ಮಾನವಕುಲದ ಪ್ರಗತಿಗೆ ಅಡಿಪಾಯವಾಗಿದೆ. ಇಂದು ನಾವು ಈ ಪರಂಪರೆಗೆ ಹೊಸ ವೇಗ ಮತ್ತು ಹೊಸ ದಿಕ್ಕನ್ನು ನೀಡಿದ್ದೇವೆ,” ಎಂದು ಹೆಮ್ಮೆಯಿಂದ ನುಡಿದರು.
ಮ್ಯಾಕ್ರಾನ್ ಅವರ ಬಾಲಿವುಡ್ ಪ್ರೇಮ ಇದ ಮೊದಲಲ್ಲ!
ಅಧ್ಯಕ್ಷ ಮ್ಯಾಕ್ರಾನ್ ಅವರು ತಮ್ಮ ಅಧಿಕೃತ ವಿಡಿಯೋಗಳಲ್ಲಿ ಬಾಲಿವುಡ್ ಹಾಡುಗಳನ್ನು ಬಳಸಿರುವುದು ಇದೇ ಮೊದಲೇನಲ್ಲ. ಕಳೆದ ಫೆಬ್ರವರಿಯಲ್ಲಿ ಭಾರತಕ್ಕೆ 3 ದಿನಗಳ ಪ್ರವಾಸ ಕೈಗೊಂಡಿದ್ದ ಮ್ಯಾಕ್ರಾನ್, ಪ್ರವಾಸ ಮುಗಿದ ಬಳಿಕ ‘ಧುರಂಧರ್’ ಚಿತ್ರದ್ದೇ ಆದ ‘ನಾ ದೇ ದಿಲ್ ಪರ್ದೇಸಿ ನು’ ಎಂಬ ಹಾಡನ್ನು ಬಳಸಿ 43 ಸೆಕೆಂಡುಗಳ ವಿಡಿಯೋ ಪೋಸ್ಟ್ ಮಾಡಿದ್ದರು. ಅದಕ್ಕೆ “ಥ್ಯಾಂಕ್ ಯೂ ಇಂಡಿಯಾ!” ಎಂದು ಶೀರ್ಷಿಕೆ ನೀಡಿದ್ದರು.
🇮🇳🇫🇷 pic.twitter.com/MD1gMC04dp
— Emmanuel Macron (@EmmanuelMacron) June 14, 2026
Thank you India! 🇮🇳🇫🇷 pic.twitter.com/vDJ9IH2hZy
— Emmanuel Macron (@EmmanuelMacron) February 19, 2026
