ಆಲ್ ಇಂಡಿಯಾ ಎಲ್ಪಿಜಿ ಡಿಸ್ಟ್ರಿಬ್ಯೂಟರ್ಸ್ ಅಸೋಸಿಯೇಷನ್ (ಕೇರಳ ವಲಯ) ಮತ್ತು ರಾಜ್ಯದ ವಿವಿಧ ಭಾಗಗಳ ವೈಯಕ್ತಿಕ ಎಲ್ಪಿಜಿ ವಿತರಕರು ಸಲ್ಲಿಸಿದ್ದ ರಿಟ್ ಅರ್ಜಿಗಳ ವಿಚಾರಣೆ ನಡೆಸಿದ ನ್ಯಾಯಮೂರ್ತಿ ಎಂ.ಎ. ಅಬ್ದುಲ್ ಹಕೀಮ್ ಅವರಿದ್ದ ಪೀಠವು ಈ ಆದೇಶವನ್ನು ಹೊರಡಿಸಿದೆ.
ಪ್ರಕರಣದ ಹಿನ್ನೆಲೆ ಏನು? ತೈಲ ಕಂಪನಿಗಳು ತಮ್ಮ ವ್ಯಾಪಾರ ನೀತಿ ಅಥವಾ ಆಡಳಿತಾತ್ಮಕ ಸುಧಾರಣೆಗಳ ಭಾಗವಾಗಿ ಗ್ರಾಹಕರನ್ನು ಒಂದು ಡಿಸ್ಟ್ರಿಬ್ಯೂಟರ್ನಿಂದ ಇನ್ನೊಬ್ಬರಿಗೆ ವರ್ಗಾಯಿಸುತ್ತಿರುವುದನ್ನು ಎಲ್ಪಿಜಿ ವಿತರಕರ ಸಂಘಟನೆಗಳು ನ್ಯಾಯಾಲಯದಲ್ಲಿ ಪ್ರಶ್ನಿಸಿದ್ದವು. ತಾವು ವರ್ಷಗಳ ಕಾಲ ಶ್ರಮಪಟ್ಟು ಬೆಳೆಸಿದ ಗ್ರಾಹಕರ ನೆಲೆಯನ್ನು ಏಕಪಕ್ಷೀಯವಾಗಿ ಬೇರೆಯವರಿಗೆ ವರ್ಗಾಯಿಸುವುದು ತಮ್ಮ ವ್ಯಾಪಾರದ ಹಕ್ಕನ್ನು ಕಸಿದುಕೊಂಡಂತೆ ಎಂದು ವಿತರಕರು ವಾದಿಸಿದ್ದರು.
ಕೋರ್ಟ್ ಹೇಳಿದ್ದೇನು? ಅರ್ಜಿಗಳ ವಿಚಾರಣೆ ನಡೆಸಿದ ನ್ಯಾಯಮೂರ್ತಿ ಎಂ.ಎ. ಅಬ್ದುಲ್ ಹಕೀಮ್ ಅವರು ವಿತರಕರ ವಾದವನ್ನು ತಳ್ಳಿಹಾಕಿದರು. “ಎಲ್ಪಿಜಿ ವಿತರಕರು ಮತ್ತು ತೈಲ ಕಂಪನಿಗಳ ನಡುವಿನ ಸಂಬಂಧವು ಒಪ್ಪಂದದ ಆಧಾರದ ಮೇಲೆ ನಡೆದಿರುತ್ತದೆ. ವಿತರಕರು ತೈಲ ಕಂಪನಿಗಳ ಏಜೆಂಟರಾಗಿ ಕಾರ್ಯನಿರ್ವಹಿಸುತ್ತಾರೆಯೇ ಹೊರತು ಗ್ರಾಹಕರು ಅವರ ಸ್ವಂತ ಆಸ್ತಿಯಲ್ಲ. ಕಂಪನಿಗಳು ಗ್ರಾಹಕರ ಸೌಕರ್ಯ ಹಾಗೂ ಉತ್ತಮ ಸೇವೆಗಾಗಿ ಗ್ರಾಹಕರನ್ನು ವರ್ಗಾಯಿಸುವ ಹಕ್ಕನ್ನು ಹೊಂದಿವೆ,” ಎಂದು ನ್ಯಾಯಾಧೀಶರು ಅಭಿಪ್ರಾಯಪಟ್ಟಿದ್ದಾರೆ.
ಈ ತೀರ್ಪಿನ ಮೂಲಕ ಗ್ರಾಹಕರ ಹಿತರಕ್ಷಣೆ ಮತ್ತು ತೈಲ ಕಂಪನಿಗಳ ಆಡಳಿತಾತ್ಮಕ ನಿರ್ಧಾರಗಳಿಗೆ ಕಾನೂನುಬದ್ಧ ಮಾನ್ಯತೆ ಸಿಕ್ಕಂತಾಗಿದೆ. ವಿತರಕರು ತಮಗೆ ಇಂತಿಷ್ಟೇ ಗ್ರಾಹಕರು ಇರಬೇಕು ಎಂದು ಹಕ್ಕು ಸಾಧಿಸಲು ಸಾಧ್ಯವಿಲ್ಲ ಎಂಬುದು ಈ ತೀರ್ಪಿನಿಂದ ಸ್ಪಷ್ಟವಾಗಿದೆ.
