ಲಂಡನ್: ಮನುಷ್ಯರು ಏಕೆ ನೂರು ವರ್ಷಗಳಿಗಿಂತ ಹೆಚ್ಚು ಕಾಲ ಬದುಕುವುದಿಲ್ಲ? ಅಥವಾ ಪ್ರಾಣಿ ಪ್ರಪಂಚದ ಕೆಲವು ಜೀವಿಗಳಂತೆ ಮನುಷ್ಯರು ಏಕೆ ದಶಕಗಳ ಕಾಲ ಯೌವನವನ್ನು ಉಳಿಸಿಕೊಳ್ಳಲು ಸಾಧ್ಯವಿಲ್ಲ? ಈ ಕುತೂಹಲಕಾರಿ ಪ್ರಶ್ನೆಗಳಿಗೆ ವಿಜ್ಞಾನಿಗಳು ಈಗ “ಡೈನೋಸಾರ್”ಗಳ ಕಡೆಗೆ ಬೆರಳು ತೋರಿಸುತ್ತಿದ್ದಾರೆ. ‘ಲೊಂಗೆವಿಟಿ ಬಾಟಲ್ನೆಕ್’ (Longevity Bottleneck) ಎಂಬ ಹೊಸ ಸಿದ್ಧಾಂತದ ಪ್ರಕಾರ, ಲಕ್ಷಾಂತರ ವರ್ಷಗಳ ಹಿಂದೆ ಭೂಮಿಯನ್ನಾಳಿದ ಡೈನೋಸಾರ್ಗಳು ಮಾನವನ ವಯಸ್ಸಾಗುವ ಪ್ರಕ್ರಿಯೆ ಮತ್ತು ಜೀವಿತಾವಧಿಯ ಮೇಲೆ ನೇರ ಪರಿಣಾಮ ಬೀರಿವೆ ಎಂದು ಸಂಶೋಧಕರು ಹೇಳುತ್ತಿದ್ದಾರೆ.
ಲಿವರ್ಪೂಲ್ ವಿಶ್ವವಿದ್ಯಾಲಯದ ಮೈಕ್ರೋಬಯಾಲಜಿಸ್ಟ್ ಜೊವಾವೊ ಪೆಡ್ರೊ ಡಿ ಮ್ಯಾಗಲ್ಹೇಸ್ ಅವರು ಈ ಕುರಿತು ಆಸಕ್ತಿದಾಯಕ ಮಾಹಿತಿ ನೀಡಿದ್ದಾರೆ. ಸುಮಾರು 100 ಮಿಲಿಯನ್ ವರ್ಷಗಳ ಹಿಂದೆ, ಡೈನೋಸಾರ್ಗಳು ಭೂಮಿಯ ಮೇಲೆ ಪ್ರಬಲವಾಗಿದ್ದ ಕಾಲದಲ್ಲಿ, ಸಸ್ತನಿಗಳು (Mammals) ಅವುಗಳಿಂದ ಬದುಕುಳಿಯಲು ನಿರಂತರ ಹೋರಾಟ ನಡೆಸಬೇಕಿತ್ತು.
ಡೈನೋಸಾರ್ಗಳಿಂದ ತಪ್ಪಿಸಿಕೊಳ್ಳಲು ಸಸ್ತನಿಗಳು ಸಣ್ಣ ಗಾತ್ರದಲ್ಲಿ ಬೆಳೆಯಬೇಕಿತ್ತು ಮತ್ತು ಬೇಗನೆ ಸಾಯುವ ಮುನ್ನವೇ ವೇಗವಾಗಿ ಸಂತಾನೋತ್ಪತ್ತಿ ಮಾಡಬೇಕಾದ ಅನಿವಾರ್ಯತೆ ಇತ್ತು.
ದೀರ್ಘಕಾಲ ಬದುಕಲು ನೆರವಾಗುವ ಜೀನ್ಗಳು ಮತ್ತು ಅಂಗಾಂಶಗಳನ್ನು (Tissues) ರಿಪೇರಿ ಮಾಡುವ ವ್ಯವಸ್ಥೆಯು ಈ ವಿಕಾಸದ ಹಂತದಲ್ಲಿ ನಾಶವಾಯಿತು ಅಥವಾ ನಿಷ್ಕ್ರಿಯವಾಯಿತು.
ಸಸ್ತನಿಗಳು ಡೈನೋಸಾರ್ಗಳ ಕಾಲದಲ್ಲಿ ತಮ್ಮನ್ನು ತಾವು ಉಳಿಸಿಕೊಳ್ಳಲು ‘ವೇಗವಾಗಿ ಬೆಳೆಯುವ ಮತ್ತು ಬೇಗ ಸಂತಾನೋತ್ಪತ್ತಿ ಮಾಡುವ’ ಹಾದಿಯನ್ನು ಆರಿಸಿಕೊಂಡವು. ಈ ಪ್ರಕ್ರಿಯೆಯಲ್ಲಿ ದೀರ್ಘಾಯುಷ್ಯಕ್ಕೆ ಅಗತ್ಯವಾದ ಜೈವಿಕ ವ್ಯವಸ್ಥೆಗಳನ್ನು ಅವು ಕಳೆದುಕೊಂಡವು.
ಕೋಶಗಳ ಪುನರುಜ್ಜೀವನ: ಆಮೆಗಳು ಅಥವಾ ಕೆಲವು ಸರೀಸೃಪಗಳು ತಮ್ಮ ಅಂಗಗಳನ್ನು ಮರುಸೃಷ್ಟಿಸಿಕೊಳ್ಳುವ ಶಕ್ತಿ ಹೊಂದಿವೆ, ಆದರೆ ಮನುಷ್ಯರಿಗೆ ಆ ಶಕ್ತಿ ಇಲ್ಲ.
ತ್ವರಿತ ವಯಸ್ಸಾಗುವಿಕೆ: ಸಸ್ತನಿಗಳ ವಿಕಾಸದ ಹಾದಿಯಲ್ಲಿ ಉಂಟಾದ ಈ ಬದಲಾವಣೆಗಳಿಂದಾಗಿ ಮಾನವನ ದೇಹವು ತ್ವರಿತವಾಗಿ ವಯಸ್ಸಾಗುವ ಪ್ರಕ್ರಿಯೆಗೆ ಒಳಗಾಗುತ್ತದೆ.
