ಪುಣೆ: ವಿವಾಹಿತ ಮಹಿಳೆಯೊಬ್ಬರು 23 ವರ್ಷದ ಯುವಕನ ಮೇಲೆ ನೀಡಿದ್ದ ಅತ್ಯಾಚಾರದ ದೂರಿಗೆ ಸಂಬಂಧಿಸಿದಂತೆ ಪುಣೆ ಸೆಷನ್ಸ್ ನ್ಯಾಯಾಲಯ ಇತ್ತೀಚೆಗೆ ಮಹತ್ವದ ತೀರ್ಪು ನೀಡಿದೆ. ಈ ಪ್ರಕರಣದಲ್ಲಿ ಯುವಕನಿಗೆ ನಿಬಂಧನೆಯೊಂದಿಗೆ ಮುಂದಸ್ತು ಜಾಮೀನು ಮಂಜೂರು ಮಾಡಿರುವ ಕೋರ್ಟ್, ‘ಮದುವೆಯ ಭರವಸೆ’ ಮತ್ತು ‘ಪರಸ್ಪರ ಒಪ್ಪಿಗೆ’ಯ ನಡುವಿನ ವ್ಯತ್ಯಾಸದ ಬಗ್ಗೆ ಕಟುವಾದ ಅಭಿಪ್ರಾಯ ವ್ಯಕ್ತಪಡಿಸಿದೆ.
ಪ್ರಕರಣದ ಹಿನ್ನೆಲೆ:
ಒಂಬತ್ತು ವರ್ಷದ ಹೆಣ್ಣು ಮಗುವನ್ನು ಹೊಂದಿರುವ 28 ವರ್ಷದ ವಿವಾಹಿತ ಮಹಿಳೆಯೊಬ್ಬರು, ರಿತೇಶ್ ಸುನೀಲ್ ಜಾಧವ್ (23) ಎಂಬ ಯುವಕನ ವಿರುದ್ಧ ದೂರು ದಾಖಲಿಸಿದ್ದರು. ಕಳೆದ 8 ತಿಂಗಳುಗಳಿಂದ ತನ್ನನ್ನು ಮದುವೆಯಾಗುವುದಾಗಿ ನಂಬಿಸಿ ಆತ ಪದೇ ಪದೇ ಶಾರೀರಿಕ ಸಂಬಂಧ ಬೆಳೆಸಿದ್ದ ಎಂದು ಮಹಿಳೆ ಆರೋಪಿಸಿದ್ದರು. ಬಂಧನದ ಭೀತಿಯಿಂದ ರಿತೇಶ್ ಮುಂದಿನ ಕಾನೂನು ಕ್ರಮಕ್ಕಾಗಿ ಕೋರ್ಟ್ ಮೊರೆ ಹೋಗಿದ್ದನು.
ದೂರು ನೀಡಿದ ಮಹಿಳೆ ವಿವಾಹಿತೆ ಮತ್ತು ವಯಸ್ಕರಾಗಿದ್ದಾರೆ. 23 ವರ್ಷದ ಯುವಕನೊಬ್ಬ ತನಗೆ ಮದುವೆಯ ಆಮಿಷವೊಡ್ಡುತ್ತಿದ್ದಾನೆ ಎಂದು ಆಕೆ ನಂಬಿದ್ದು ಪ್ರಾಥಮಿಕವಾಗಿ ತರ್ಕಕ್ಕೆ ನಿಲುಕುತ್ತಿಲ್ಲ.ಸಂಬಂಧದ ಪರಿಣಾಮಗಳು ಏನೆಂದು ತಿಳಿದಿದ್ದರೂ ಒಬ್ಬ ವ್ಯಕ್ತಿ ಪದೇ ಪದೇ ದೈಹಿಕ ಸಂಬಂಧದಲ್ಲಿ ತೊಡಗಿಸಿಕೊಂಡರೆ, ಅದನ್ನು ಕೇವಲ ‘ಪ್ರಲೋಭನೆ’ ಎಂದು ಕರೆದು ಅತ್ಯಾಚಾರದ ವ್ಯಾಪ್ತಿಗೆ ತರಲು ಸಾಧ್ಯವಿಲ್ಲ.
ಕಾನೂನಿನ ದುರುಪಯೋಗ: ಪ್ರೇಮ ಸಂಬಂಧಗಳಲ್ಲಿ ಬಿರುಕು ಮೂಡಿದಾಗ ಅಥವಾ ಮನಸ್ತಾಪಗಳು ಉಂಟಾದಾಗ ಅದನ್ನು ‘ಅತ್ಯಾಚಾರ’ ಎಂದು ಬಿಂಬಿಸಿ ದೂರು ನೀಡುವ ಪ್ರವೃತ್ತಿ ಹೆಚ್ಚುತ್ತಿದೆ ಎಂದು ನ್ಯಾಯಾಲಯ ಅಭಿಪ್ರಾಯಪಟ್ಟಿದೆ.
ರಿತೇಶ್ ಪರ ವಾದ ಮಂಡಿಸಿದ ನ್ಯಾಯವಾದಿ ಆಕಾಶ್ ಸುಧೀರ್ ಚವಾನ್, “ಈ ಸಂಬಂಧವು ಇಬ್ಬರ ಸಂಪೂರ್ಣ ಒಪ್ಪಿಗೆಯಿಂದ ನಡೆದಿದೆ. ಸಣ್ಣ ಜಗಳದ ಕಾರಣಕ್ಕೆ ಸೇಡು ತೀರಿಸಿಕೊಳ್ಳಲು ಈ ಸುಳ್ಳು ದೂರು ದಾಖಲಿಸಲಾಗಿದೆ,” ಎಂದು ವಾದಿಸಿದ್ದರು. ಚವಾನ್ ಅವರ ವಾದವನ್ನು ಪುರಸ್ಕರಿಸಿದ ನ್ಯಾಯಾಲಯವು ಯುವಕನಿಗೆ ಜಾಮೀನು ನೀಡಿದೆ.
