ನವದೆಹಲಿ: ಭಾರತದ ಪೌರತ್ವವನ್ನು (Citizenship) ಪಡೆಯಲು ಬಯಸುವ ವಿದೇಶಿ ಅರ್ಜಿದಾರರಿಗೆ ಕೇಂದ್ರ ಸರ್ಕಾರವು ಹೊಸದೊಂದು ಕಡ್ಡಾಯ ನಿಯಮವನ್ನು ಜಾರಿಗೆ ತಂದಿದೆ. ಇನ್ಮುಂದೆ ಪಾಕಿಸ್ತಾನ, ಅಫ್ಘಾನಿಸ್ತಾನ ಮತ್ತು ಬಾಂಗ್ಲಾದೇಶದಿಂದ ಬಂದು ಭಾರತದ ಪೌರತ್ವ ಕೋರಿ ಅರ್ಜಿ ಸಲ್ಲಿಸುವ ಪ್ರತಿಯೊಬ್ಬರೂ, ತಮಗಿರುವ ವಿದೇಶಿ ಪಾಸ್ಪೋರ್ಟ್ಗಳ ವಿವರಗಳನ್ನು ಅಧಿಕೃತವಾಗಿ ಘೋಷಿಸುವುದಲ್ಲದೆ, ಅವುಗಳನ್ನು ಕಡ್ಡಾಯವಾಗಿ ಹಸ್ತಾಂತರಿಸಬೇಕು (Surrender) ಎಂದು ಕೇಂದ್ರ ಗೃಹ ಸಚಿವಾಲಯ ನಿಯಮವನ್ನು ಬಿಗಿಗೊಳಿಸಿದೆ.
ಈ ಮಹತ್ವದ ನಿಯಮದ ಬದಲಾವಣೆಯು ದೇಶದ ಭದ್ರತೆ ಮತ್ತು ದ್ವಿಪೌರತ್ವ ತಡೆಗಟ್ಟುವ ನಿಟ್ಟಿನಲ್ಲಿ ಅತ್ಯಂತ ಪ್ರಮುಖ ನಿರ್ಧಾರವೆಂದು ಪರಿಗಣಿಸಲಾಗಿದೆ.ಮುಖ್ಯವಾಗಿ ಪಾಕಿಸ್ತಾನ, ಬಾಂಗ್ಲಾದೇಶ ಮತ್ತು ಅಫ್ಘಾನಿಸ್ತಾನದಿಂದ ಭಾರತಕ್ಕೆ ವಲಸೆ ಬಂದು, ಇಲ್ಲಿನ ನಾಗರಿಕತ್ವ ಪಡೆಯಲು ಕಾಯುತ್ತಿರುವ ಧಾರ್ಮಿಕ ಅಲ್ಪಸಂಖ್ಯಾತರು ಹಾಗೂ ಇತರೆ ಅರ್ಜಿದಾರರಿಗೆ ಈ ನಿಯಮ ನೇರವಾಗಿ ಅನ್ವಯಿಸಲಿದೆ.
ಅರ್ಜಿದಾರರು ತಾವಾಗಿಯೇ ತಮ್ಮ ಹಳೆಯ ದೇಶದ ಪಾಸ್ಪೋರ್ಟ್ ವಿವರಗಳನ್ನು ಭಾರತ ಸರ್ಕಾರದ ಮುಂದೆ ಬಹಿರಂಗಪಡಿಸಬೇಕು. ಒಮ್ಮೆ ಭಾರತದ ಪೌರತ್ವ ಪ್ರಕ್ರಿಯೆ ಅಂತಿಮ ಹಂತಕ್ಕೆ ತಲುಪಿದಾಗ ಆಯಾ ದೇಶಗಳ ರಾಯಭಾರ ಕಚೇರಿ ಅಥವಾ ಭಾರತೀಯ ಅಧಿಕಾರಿಗಳಿಗೆ ಹಳೆಯ ಪಾಸ್ಪೋರ್ಟ್ ಅನ್ನು ಒಪ್ಪಿಸಿ ರದ್ದುಪಡಿಸಿಕೊಳ್ಳಬೇಕು.
ಭಾರತದ ಸಂವಿಧಾನದ ಪ್ರಕಾರ ಒಬ್ಬ ವ್ಯಕ್ತಿಗೆ ಏಕಕಾಲದಲ್ಲಿ ಎರಡು ದೇಶಗಳ ಪೌರತ್ವ ಹೊಂದಲು (Dual Citizenship) ಅವಕಾಶವಿಲ್ಲ. ಪೌರತ್ವ ಪಡೆದ ನಂತರವೂ ಕೆಲವರು ಹಳೆಯ ದೇಶದ ಪಾಸ್ಪೋರ್ಟ್ ಬಳಸುವ ಸಾಧ್ಯತೆಗಳನ್ನು ತಡೆಯಲು ಮತ್ತು ಕಾನೂನು ಪ್ರಕ್ರಿಯೆಯನ್ನು ಮತ್ತಷ್ಟು ಪಾರದರ್ಶಕಗೊಳಿಸಲು ಈ ತಿದ್ದುಪಡಿ ತರಲಾಗಿದೆ.
