ನ್ಯೂಯಾರ್ಕ್: ಮನುಷ್ಯನ ಸರಾಸರಿ ಆಯಸ್ಸು 70 ರಿಂದ 80 ವರ್ಷಗಳು. ಆದರೆ ಸಮುದ್ರದ ದೈತ್ಯ ಜೀವಿ ‘ಬೋಹೆಡ್’ (Bowhead) ತಿಮಿಂಗಿಲಗಳು ಬರೋಬ್ಬರಿ 200 ವರ್ಷಗಳ ಕಾಲ ಬದುಕುತ್ತವೆ! ಈ ದೀರ್ಘಾಯುಷ್ಯದ ರಹಸ್ಯವೇನು ಎಂಬ ಬಗ್ಗೆ ಸಂಶೋಧನೆ ನಡೆಸಿದ ಅಮೆರಿಕದ ರೋಚೆಸ್ಟರ್ ವಿಶ್ವವಿದ್ಯಾಲಯದ ವಿಜ್ಞಾನಿಗಳು, ತಿಮಿಂಗಿಲಗಳಲ್ಲಿರುವ ಒಂದು ವಿಶೇಷ ಪ್ರೊಟೀನ್ ಮನುಷ್ಯನ ಆಯಸ್ಸನ್ನು ಹೆಚ್ಚಿಸಲು ನೆರವಾಗಬಹುದು ಎಂಬ ಭರವಸೆ ವ್ಯಕ್ತಪಡಿಸಿದ್ದಾರೆ.
ಬೋಹೆಡ್ ತಿಮಿಂಗಿಲಗಳ ದೇಹದಲ್ಲಿ CIRBP (Cold-Inducible RNA-Binding Protein) ಎಂಬ ಪ್ರೊಟೀನ್ ಅತ್ಯಂತ ಹೆಚ್ಚಿನ ಪ್ರಮಾಣದಲ್ಲಿದೆ. ಇದು ಮನುಷ್ಯರಲ್ಲಿ ಇರುವುದಕ್ಕಿಂತ ಸುಮಾರು 100 ಪಟ್ಟು ಹೆಚ್ಚಾಗಿದೆ.
ಮನುಷ್ಯರಲ್ಲಿ ವಯಸ್ಸಾದಂತೆ ಡಿಎನ್ಎ (DNA) ಹಾನಿಗೊಳಗಾಗುತ್ತದೆ, ಇದರಿಂದ ಕ್ಯಾನ್ಸರ್ ಮತ್ತು ಇತರ ಕಾಯಿಲೆಗಳು ಬರುತ್ತವೆ. ಆದರೆ ಈ CIRBP ಪ್ರೊಟೀನ್ ಹಾನಿಗೊಳಗಾದ ಡಿಎನ್ಎಗಳನ್ನು ಅತ್ಯಂತ ವೇಗವಾಗಿ ಮತ್ತು ನಿಖರವಾಗಿ ದುರಸ್ತಿ ಮಾಡುತ್ತದೆ. ಇದೇ ಕಾರಣಕ್ಕೆ ತಿಮಿಂಗಿಲಗಳಿಗೆ 200 ವರ್ಷವಾದರೂ ಕ್ಯಾನ್ಸರ್ ಬರುವುದು ಅಪರೂಪ.
ವಿಜ್ಞಾನಿಗಳು ಈ ತಿಮಿಂಗಿಲದ ಪ್ರೊಟೀನ್ ಅನ್ನು ಪ್ರಯೋಗಾಲಯದಲ್ಲಿ ಮಾನವ ಜೀವಕೋಶಗಳಿಗೆ ಸೇರಿಸಿದಾಗ, ಮಾನವ ಜೀವಕೋಶಗಳ ಡಿಎನ್ಎ ದುರಸ್ತಿ ಸಾಮರ್ಥ್ಯವೂ ಗಣನೀಯವಾಗಿ ಹೆಚ್ಚಿರುವುದು ಕಂಡುಬಂದಿದೆ. ಇದು ವಯಸ್ಸಾಗುವ ಪ್ರಕ್ರಿಯೆಯನ್ನು ನಿಧಾನಗೊಳಿಸುವ ಮುನ್ಸೂಚನೆ ನೀಡಿದೆ.
ಇದೇ ಪ್ರೊಟೀನ್ ಅನ್ನು ಹಣ್ಣಿನ ನೊಣಗಳ ಮೇಲೆ ಪ್ರಯೋಗಿಸಿದಾಗ, ಅವುಗಳ ಆಯಸ್ಸು ಸಾಮಾನ್ಯಕ್ಕಿಂತ ಹೆಚ್ಚಾಗಿದೆ ಮತ್ತು ಅವು ವಿಕಿರಣಗಳನ್ನು ತಡೆದುಕೊಳ್ಳುವ ಶಕ್ತಿಯನ್ನು ಪಡೆದುಕೊಂಡಿವೆ.
