ಉಗಾಂಡಾ : ಮಧ್ಯ ಉಗಾಂಡಾದ ಗ್ರಾಮೀಣ ಪ್ರದೇಶದಲ್ಲಿ ಮಂಗಳವಾರ ಬೆಳಿಗ್ಗೆ ದೊಡ್ಡ ಅಪಘಾತ ಸಂಭವಿಸಿದೆ. ಅಂಧ ಮಕ್ಕಳ ಶಾಲೆಯಲ್ಲಿ ಸಂಭವಿಸಿದ ಅಗ್ನಿ ದುರಂತದಲ್ಲಿ ಹನ್ನೊಂದು ಮಕ್ಕಳು ಸಾವನ್ನಪ್ಪಿದ್ದಾರೆ. ಪೊಲೀಸ್ ಅಧಿಕಾರಿಯೊಬ್ಬರು ಮಂಗಳವಾರ ಈ ಮಾಹಿತಿ ನೀಡಿದರು. ಉಗಾಂಡಾದ ಪೊಲೀಸರು ಬೆಂಕಿಗೆ ಕಾರಣ ತಕ್ಷಣಕ್ಕೆ ತಿಳಿದುಬಂದಿಲ್ಲ ಎಂದು ಹೇಳಿದ್ದಾರೆ ಎಂದು ಎಎಫ್ಪಿ ಪೋಸ್ಟ್ ಮಾಡಿದೆ. ದೃಷ್ಟಿಹೀನ ಮಕ್ಕಳ ಶಾಲೆಯಲ್ಲಿ ಬೆಂಕಿ ಕಾಣಿಸಿಕೊಂಡಿದೆ ಎಂದು ಸ್ಥಳೀಯ ಪೊಲೀಸರು ತಿಳಿಸಿದ್ದಾರೆ. ಅಪಘಾತದಲ್ಲಿ ಗಾಯಗೊಂಡವರನ್ನ ಆಸ್ಪತ್ರೆಗೆ ದಾಖಲಿಸಲಾಗಿದೆ.
ಈ ನಡುವೆ ಉಗಾಂಡಾದ ರಾಜಧಾನಿ ಕಂಪಾಲಾದಲ್ಲಿ ಎಬೋಲಾ ಹರಡುವಿಕೆ ಹೆಚ್ಚುತ್ತಿದೆ. ಸೋಮವಾರದಲ್ಲಿ ಇನ್ನೂ 11 ಪ್ರಕರಣಗಳು ದಾಖಲಾಗಿವೆ. ಕಂಪಾಲಾ ಮೆಟ್ರೋಪಾಲಿಟನ್ ಪ್ರದೇಶದಲ್ಲಿ ಭಾನುವಾರ ಮತ್ತೆ ಒಂಬತ್ತು ಜನರಿಗೆ ಎಬೋಲಾ ವೈರಸ್ ಇರುವುದು ದೃಢಪಟ್ಟಿದೆ. ಆದಾಗ್ಯೂ, ಶುಕ್ರವಾರ ಇತರ ಇಬ್ಬರು ಜನರಿಗೆ ಸೋಂಕು ತಗುಲಿರುವುದು ಕಂಡುಬಂದಿದೆ. ಆರೋಗ್ಯ ಸಚಿವ ಜೇನ್ ರುತ್ ಅಕೆಂಗ್ ಸೋಮವಾರ ಈ ಮಾಹಿತಿಯನ್ನ ನೀಡಿದರು.
