ನವದೆಹಲಿ : ಅದಾನಿ ಗ್ರೂಪ್ ಬೆಂಬಲಿತ ಎಫ್ಎಂಸಿಜಿ ಸಂಸ್ಥೆ ಅದಾನಿ ವಿಲ್ಮಾರ್ ಸೋಮವಾರ ಜಾಗತಿಕ ಬೆಲೆಗಳ ಕುಸಿತದಿಂದಾಗಿ ಅಡುಗೆ ಎಣ್ಣೆಯ ಬೆಲೆಯನ್ನ ಪ್ರತಿ ಲೀಟರ್‌ಗೆ ₹30 ರಷ್ಟು ಕಡಿತಗೊಳಿಸಿದೆ ಎಂದು ಘೋಷಿಸಿದೆ. ಅದ್ರಂತೆ, ಖಾದ್ಯ ತೈಲ ಸಂಸ್ಥೆಯು ಸೋಯಾಬೀನ್ ತೈಲದಲ್ಲಿ ತನ್ನ ಅತ್ಯಧಿಕ ಕಡಿತವನ್ನ ಮಾಡಿದೆ. ಹೊಸ ಬೆಲೆಗಳ ಸ್ಟಾಕ್ʼಗಳು ಶೀಘ್ರದಲ್ಲೇ ಭಾರತೀಯ ಮಾರುಕಟ್ಟೆಯನ್ನ ತಲುಪಲಿವೆ. ಆಹಾರ ಸಚಿವಾಲಯವು ಖಾದ್ಯ ತೈಲ ಸಂಸ್ಥೆಗಳಿಗೆ ಜಾಗತಿಕ ಅಡುಗೆ ಎಣ್ಣೆ ಬೆಲೆಗಳ ಕುಸಿತದ ಲಾಭವನ್ನ ಗ್ರಾಹಕರಿಗೆ ವರ್ಗಾಯಿಸುವಂತೆ ನಿರ್ದೇಶಿಸಿದ ನಂತ್ರ ಈ ಘೋಷಣೆ ಬಂದಿದೆ.
ಫಾರ್ಚೂನ್ ಬ್ರಾಂಡ್ ಅಡಿಯಲ್ಲಿ ಉತ್ಪನ್ನಗಳನ್ನು ಮಾರಾಟ ಮಾಡುವ ಕಂಪನಿಯು ಸೋಯಾಬೀನ್ ತೈಲ ಬೆಲೆಯನ್ನು ಪ್ರತಿ ಲೀಟರ್ʼಗೆ ₹195 ರಿಂದ ₹ 65ಕ್ಕೆ ಇಳಿಸಿದೆ. ಏತನ್ಮಧ್ಯೆ, ಸೂರ್ಯಕಾಂತಿ ಎಣ್ಣೆಯ ಬೆಲೆಯನ್ನು ಪ್ರತಿ ಲೀಟರ್ʼಗೆ ₹210 ರಿಂದ ₹199ಕ್ಕೆ ಅಗ್ಗವಾಗಿಸಲಾಗಿದೆ ಮತ್ತು ಸಾಸಿವೆ ಎಣ್ಣೆ ಎಂಆರ್‌ಪಿ(ಗರಿಷ್ಠ ಚಿಲ್ಲರೆ ಬೆಲೆ) ಅನ್ನು ಪ್ರತಿ ಲೀಟರ್ʼಗೆ ₹195 ರಿಂದ ₹190 ಕ್ಕೆ ಇಳಿಸಲಾಗಿದೆ.
ಇದಲ್ಲದೆ, ಸಂಸ್ಥೆಯು ಫಾರ್ಚೂನ್ ರೈಸ್ ಹೊಟ್ಟು ಎಣ್ಣೆಯ ಬೆಲೆಯನ್ನ ಪ್ರತಿ ಲೀಟರ್ʼಗೆ ₹225 ರಿಂದ ₹210ಕ್ಕೆ ಕಡಿತಗೊಳಿಸಿದ್ರೆ, ನೆಲಗಡಲೆ ಎಣ್ಣೆ ಬೆಲೆಯನ್ನ ಪ್ರತಿ ಲೀಟರ್ʼಗೆ ₹220 ರಿಂದ ₹210 ಕ್ಕೆ ಪರಿಷ್ಕರಿಸಲಾಗಿದೆ. ಅಲ್ಲದೇ ರಾಗ ವನಸ್ಪತಿಯ ಬೆಲೆಯನ್ನ ಪ್ರತಿ ಲೀಟರ್ʼಗೆ ₹200 ರಿಂದ ₹185ಕ್ಕೆ ಇಳಿಸಲಾಗಿದೆ. ಆದ್ರೆ, ರಾಗ ಪಾಮೋಲಿನ್ ತೈಲ ಬೆಲೆಯನ್ನ ಪ್ರತಿ ಲೀಟರ್ʼಗೆ ₹170 ರಿಂದ ₹144 ಕ್ಕೆ ಇಳಿಸಲಾಗಿದೆ.
ಅದಾನಿ ವಿಲ್ಮಾರ್‌ನ ಎಂಡಿ ಮತ್ತು ಸಿಇಒ ಆಂಗ್ಶು ಮಲ್ಲಿಕ್, “ನಾವು ಜಾಗತಿಕ ಬೆಲೆ ಕಡಿತದ ಪ್ರಯೋಜನಗಳನ್ನ ನಮ್ಮ ಗ್ರಾಹಕರಿಗೆ ವರ್ಗಾಯಿಸಿದ್ದೇವೆ. ಇನ್ನು ಹೊಸ ಬೆಲೆಗಳನ್ನ ಹೊಂದಿರುವ ಷೇರುಗಳು ಶೀಘ್ರದಲ್ಲೇ ಮಾರುಕಟ್ಟೆಯನ್ನು ತಲುಪಲಿವೆ” ಎಂದು ಪಿಟಿಐ ವರದಿ ಮಾಡಿದೆ.
ಅಂದ್ಹಾಗೆ, ಈ ಹಿಂದೆ, ಫೆಬ್ರವರಿ 7 ರಂದು, ಧಾರಾ ಬ್ರಾಂಡ್ ಅಡಿಯಲ್ಲಿ ಖಾದ್ಯ ತೈಲಗಳನ್ನು ಮಾರಾಟ ಮಾಡುವ ಮದರ್ ಡೈರಿ, ಸೋಯಾಬೀನ್ ಮತ್ತು ಅಕ್ಕಿ ಹೊಟ್ಟು ಎಣ್ಣೆಗಳ ಬೆಲೆಯನ್ನ ಪ್ರತಿ ಲೀಟರ್‌ಗೆ ಕನಿಷ್ಠ ₹14ರಷ್ಟು ಕಡಿಮೆ ಮಾಡಿದೆ.
