ಕೊಡಗು: ಜಿಲ್ಲೆಯ ಪ್ರಸಿದ್ಧ ದುಬಾರೆ ಆನೆ ಶಿಬಿರದಲ್ಲಿ ನಿನ್ನೆ ನಡೆದ ಎರಡು ದಾಸವಾಳದ ಆನೆಗಳ ನಡುವಿನ ಭೀಕರ ಕಾದಾಟದಲ್ಲಿ ತೀವ್ರವಾಗಿ ಗಾಯಗೊಂಡಿದ್ದ ‘ಮಾರ್ತಾಂಡ’ ಆನೆ ಇಂದು ಚಿಕಿತ್ಸೆ ಫಲಿಸದೆ ಕೊನೆಯುಸಿರೆಳೆದಿದೆ. ಕಾದಾಟದ ವೇಳೆ ಗಂಭೀರ ಗಾಯಗಳಿಗೆ ಒಳಗಾಗಿದ್ದ ಮಾರ್ತಾಂಡನಿಗೆ ಪಶುವೈದ್ಯರ ತಂಡ ಸತತ ಚಿಕಿತ್ಸೆ ನೀಡುತ್ತಿತ್ತಾದರೂ, ಪರಿಸ್ಥಿತಿ ವಿಷಮಿಸಿ ಆನೆ ಸಾವನ್ನಪ್ಪಿದೆ ಎಂದು ಕೊಡಗು ಉಪ ಅರಣ್ಯ ಸಂರಕ್ಷಣಾಧಿಕಾರಿ (DFO) ಅಭಿಷೇಕ್ ಅವರು ಅಧಿಕೃತವಾಗಿ ಮಾಹಿತಿ ನೀಡಿದ್ದಾರೆ.
ನಿನ್ನೆ ಶಿಬಿರದಲ್ಲಿ ‘ಕಂಜನ್’ ಮತ್ತು ‘ಮಾರ್ತಾಂಡ’ ಆನೆಗಳ ನಡುವೆ ಅನಿರೀಕ್ಷಿತವಾಗಿ ಜಗಳ ಆರಂಭವಾಗಿತ್ತು. ಈ ಕಾಳಗ ತೀವ್ರ ಸ್ವರೂಪ ಪಡೆದುಕೊಂಡಾಗ, ಕಂಜನ್ ಆನೆಯು ತನ್ನ ಬಲಿಷ್ಠ ದಂತಗಳಿಂದ ಮಾರ್ತಾಂಡನಿಗೆ ಬಲವಾಗಿ ಚುಚ್ಚಿ ತೀವ್ರವಾಗಿ ಗಾಯಗೊಳಿಸಿತ್ತು. ದಂತದ ಇರಿತದಿಂದಾಗಿ ಮಾರ್ತಾಂಡನ ದೇಹದ ಪ್ರಮುಖ ಭಾಗಗಳಿಗೆ ಗಂಭೀರ ಪೆಟ್ಟಾಗಿದ್ದು, ಅತಿಯಾದ ರಕ್ತಸ್ರಾವ ಹಾಗೂ ಆಂತರಿಕ ಗಾಯಗಳೇ ಆನೆಯ ಸಾವಿಗೆ ಮುಖ್ಯ ಕಾರಣ ಎಂದು ಹೇಳಲಾಗಿದೆ.
ಕಾದಾಟದ ವೇಳೆ ಆನೆಗಳ ಕಾಲಡಿ ಸಿಲುಕಿ ಮಹಿಳೆ ಸಾವು ಈ ಭೀಕರ ಆನೆಗಳ ಕಾದಾಟವು ಕೇವಲ ಮಾರ್ತಾಂಡ ಆನೆಯ ಸಾವಿಗೆ ಮಾತ್ರವಲ್ಲದೆ, ಅಮಾಯಕ ಮಹಿಳೆಯೊಬ್ಬರ ಪ್ರಾಣಹರಣಕ್ಕೂ ಕಾರಣವಾಗಿರುವುದು ತೀವ್ರ ಆತಂಕ ಮೂಡಿಸಿದೆ. ನಿನ್ನೆ ಕಂಜನ್ ಮತ್ತು ಮಾರ್ತಾಂಡ ಆನೆಗಳು ಪರಸ್ಪರ ಕೆರಳುತ್ತಾ ಅತಿ ವೇಗವಾಗಿ ಕಾದಾಡುತ್ತಿದ್ದ ಸಂದರ್ಭದಲ್ಲಿ, ಅಲ್ಲಿಗೆ ಸಮೀಪದಲ್ಲಿದ್ದ ಮಹಿಳೆಯೊಬ್ಬರು ಆನೆಗಳ ಕಾಲಿನಡಿ ಸಿಲುಕಿಕೊಂಡಿದ್ದರು. ಉದ್ರಿಕ್ತ ಆನೆಗಳ ಕಾಲ್ತುಳಿತಕ್ಕೆ ಸಿಲುಕಿದ ಮಹಿಳೆ ಸ್ಥಳದಲ್ಲೇ ಮೃತಪಟ್ಟಿದ್ದರು.
ಈ ಅವಳಿ ದುರಂತಗಳು ದುಬಾರೆ ಆನೆ ಶಿಬಿರದಲ್ಲಿ ತೀವ್ರ ಶೋಕದ ವಾತಾವರಣವನ್ನು ಸೃಷ್ಟಿಸಿವೆ. ಸಾಕಾನೆಗಳ ನಡುವೆ ಇದ್ದಕ್ಕಿದ್ದಂತೆ ಇಂತಹ ರೌದ್ರಾವತಾರದ ಕಾದಾಟ ನಡೆದಿದ್ದು ಏಕೆ ಮತ್ತು ಈ ಸಂದರ್ಭದಲ್ಲಿ ಸುರಕ್ಷತಾ ಕ್ರಮಗಳ ಲೋಪಗಳೇನಾದರೂ ಆಗಿವೆಯೇ ಎಂಬ ಬಗ್ಗೆ ಅರಣ್ಯ ಇಲಾಖೆಯ ಉನ್ನತ ಅಧಿಕಾರಿಗಳು ಪರಿಶೀಲನೆ ನಡೆಸುತ್ತಿದ್ದಾರೆ. ಸದ್ಯಕ್ಕೆ ಶಿಬಿರದಲ್ಲಿ ಬಿಗುವಿನ ವಾತಾವರಣವಿದ್ದು, ಕಂಜನ್ ಆನೆಯನ್ನು ನಿಯಂತ್ರಣದಲ್ಲಿಡಲು ಸೂಕ್ತ ಕ್ರಮ ಕೈಗೊಳ್ಳಲಾಗಿದೆ.
