ಚಿಕ್ಕಬಳ್ಳಾಪುರ : ಕೆಂಪು ರಾಣಿ ಎಂದೇ ಖ್ಯಾತಿಯಾದ ಟೊಮೆಟೊಗೆ ಭಾರಿ ಡಿಮ್ಯಾಂಡ್ ಬಂದಿದ್ದು ಕೆಜಿಗೆ 100 ರೂಪಾಯಿ ದರ ನಿಗದಿಯಾಗಿದೆ. ಕಳೆದೊಂದು ತಿಂಗಳಿನಿಂದ ಟೊಮೆಟೊ ದರ ದಿನದಿಂದ ದಿನಕ್ಕೆ ಹೆಚ್ಚುತ್ತಿದೆ. ಸದ್ಯ ನಗರದ ಹಾಪ್ ಕಾಮ್ಸ್ಗಳಲ್ಲಿ ಉತ್ತಮ ದರ್ಜೆಯ ಟೊಮೆಟೋ ಕೇಜಿಗೆ 80 ಇದೆ. ಹೊರಗೆ ತಳ್ಳುವ ಗಾಡಿಯಲ್ಲಿ ಕೇಜಿ ಟೊಮೆಟೋ 90ಕ್ಕೆ ಮಾರಾಟ ಮಾಡಲಾಗುತ್ತಿದೆ. ಮಾರುಕಟ್ಟೆಗೆ ಹೋಗುವ ಟೊಮೆಟೋ ಪ್ರಮಾಣದಲ್ಲಿ ಇಳಿಕೆಯಾಗಿರುವ ಹಿನ್ನೆಲೆಯಲ್ಲಿಬೆಲೆ ಹೆಚ್ಚಾಗುತ್ತಿದೆ.
ಪ್ರತಿದಿನ ಮಾರುಕಟ್ಟೆಗೆ 800 ರಿಂದ 1000 ಬಾಕ್ಸ್ ಟೊಮೆಟೋ ಬರುತ್ತಿವೆ, ಉತ್ತಮ ಟೊಮೆಟೋ ಎಂದೇ ಹೆಸರು ಪಡೆದಿರುವ ಸಾಹು ಎಂಬ ಹೈಬ್ರಿಡ್ ಟೊಮೆಟೋ ಬಾಕ್ಸ್ ಒಂದಕ್ಕೆ 800 ರಿಂದ 1000 ವರೆಗೂ ಮಾರಾಟವಾಗುತ್ತಿದೆ. ಚಿಕ್ಕಬಳ್ಳಾಪುರದ ಚಿಂತಾಮಣಿ ಎಪಿಎಂಸಿಯಲ್ಲಿ 14 ಕೇಜಿ ಟೊಮೆಟೋ ಬೆಲೆ 600 ರಿಂದ 800 ವರೆಗೆ ಮಾರಾಟವಾಗುತ್ತಿದೆ, ಗೋಲಿ ಗಾತ್ರದ ಟೊಮೆಟೋ 14 ಕೇಜಿ ಬಾಕ್ಸ್ ಒಂದಕ್ಕೆ 350 ರಿಂದ 400 ವರೆಗೂ ಮಾರಾಟವಾಗಿದೆ.
ಚಿಕ್ಕಬಳ್ಳಾಪುರ ಎಪಿಎಂಸಿ ಮಾರುಕಟ್ಟೆಯ ಸದ್ಯದ ಟೊಮೆಟೋ ದರ 14 ಕೇಜಿ ಬಾಕ್ಸ್ ಒಂದಕ್ಕೆ 500 ರಿಂದ 750 ವರೆಗೂ ಹರಾಜಾಗಿದೆ. ಟೊಮೆಟೋ ಬೆಲೆ ಕಳೆದ ಒಂದು ತಿಂಗಳ ಹಿಂದೆ ಕೇಜಿಗೆ ಕೇವಲ 15-20ಕ್ಕೆ ಮಾರಾಟವಾಗುತ್ತಿತ್ತು. ಆದರೆ ಕ್ರಮೇಣ ಬೆಲೆ ಏರುತ್ತಾ ಸಾಗಿ ಈಗ 50 ರಿಂದ 90 ವರೆಗೆ ಮಾರಾಟ ಕಂಡಿದ್ದು, ಟೊಮೆಟೊ ಬೆಳೆ ಕೈಗೆ ಬಂದಿರುವ ರೈತರಲ್ಲಿ ಮುಖದಲ್ಲಿ ಮಂದಹಾಸ ಮೂಡಿದೆ.
