ನವದೆಹಲಿ : ಭಾರತದಲ್ಲಿ ಹೊಸ ಹಣಕಾಸು ವರ್ಷ ಅಂದರೆ ಏಪ್ರಿಲ್ 1, 2026 ರಿಂದ ಆದಾಯ ತೆರಿಗೆ ವ್ಯವಸ್ಥೆಯಲ್ಲಿ ಮಹತ್ವದ ಬದಲಾವಣೆಗಳು ಸಂಭವಿಸಲಿವೆ. ಸರ್ಕಾರವು ಹಳೆಯ ‘ಆದಾಯ ತೆರಿಗೆ ಕಾಯ್ದೆ 1961’ ರ ಬದಲಿಗೆ ಹೊಸ ‘ಆದಾಯ ತೆರಿಗೆ ಕಾಯ್ದೆ 2025’ ಅನ್ನು ಜಾರಿಗೆ ತರುತ್ತಿದೆ.
ಈ ಹೊಸ ಕಾಯ್ದೆಯು ಸಂಪೂರ್ಣವಾಗಿ ಪಾರದರ್ಶಕತೆ ಮತ್ತು ಡಿಜಿಟಲ್ ಅನುಸರಣೆಯ ಮೇಲೆ ಕೇಂದ್ರೀಕೃತವಾಗಿದೆ. ನಿಮ್ಮ ತೆರಿಗೆ ಸ್ಲ್ಯಾಬ್ಗಳು ಅಥವಾ ದರಗಳಲ್ಲಿ ಯಾವುದೇ ಬದಲಾವಣೆ ಇಲ್ಲದಿದ್ದರೂ, ರಿಪೋರ್ಟಿಂಗ್ ಮತ್ತು ಫೈಲಿಂಗ್ ಮಾಡುವ ವಿಧಾನವು ಸಂಪೂರ್ಣವಾಗಿ ಬದಲಾಗಲಿದೆ.
ಏಪ್ರಿಲ್ 1 ರಿಂದ ಏನೆಲ್ಲಾ ಬದಲಾಗಲಿದೆ? ಇಲ್ಲಿದೆ ಸಂಪೂರ್ಣ ವಿವರ:
1. ಫಾರ್ಮ್-16 ರ ಬದಲಿಗೆ ‘ಫಾರ್ಮ್-130’
ಇದುವರೆಗೆ ಉದ್ಯೋಗಿಗಳು ಪಡೆಯುತ್ತಿದ್ದ ಫಾರ್ಮ್-16 ಇನ್ನು ಇತಿಹಾಸವಾಗಲಿದೆ. ಇದರ ಜಾಗಕ್ಕೆ ಫಾರ್ಮ್-130 ಬರಲಿದೆ. ಇದು TDS ಪ್ರಮಾಣಪತ್ರವಾಗಿ ಕಾರ್ಯನಿರ್ವಹಿಸಲಿದ್ದು, ಸಂಬಳದಿಂದ ಕಡಿತವಾದ ತೆರಿಗೆ ಮತ್ತು ವಿನಾಯಿತಿಗಳ ಸಂಪೂರ್ಣ ವಿವರವನ್ನು ಹೊಂದಿರುತ್ತದೆ. ಇನ್ನು ಮುಂದೆ ITR ಫೈಲಿಂಗ್ ಹೆಚ್ಚು ಆಟೊಮೇಟೆಡ್ ಆಗಲಿದ್ದು, ತೆರಿಗೆದಾರರ ಆದಾಯ ಮತ್ತು ವಿನಾಯಿತಿಗಳ ಮಾಹಿತಿ ಫಾರ್ಮ್ನಲ್ಲಿ ತಾನಾಗಿಯೇ ಅಪ್ಲೋಡ್ ಆಗಲಿದೆ. ಇದರಿಂದ ತಪ್ಪುಗಳ ಸಾಧ್ಯತೆ ಕಡಿಮೆ ಇರುತ್ತದೆ.
2. ಊಟದ ಕೂಪನ್ಗಳ (Meal Card) ಮಿತಿ ಹೆಚ್ಚಳ
ಸೋಡೆಕ್ಸೊ (Sodexo), ಪ್ಲಕ್ಸೀ ಅಥವಾ ಜಾಗಲ್ನಂತಹ ಮೀಲ್ ಕೂಪನ್ ಪಡೆಯುವ ಉದ್ಯೋಗಿಗಳಿಗೆ ಇದು ಸಿಹಿ ಸುದ್ದಿ. ಊಟದ ಭತ್ಯೆಯ ಮೇಲಿನ ತೆರಿಗೆ ವಿನಾಯಿತಿ ಮಿತಿಯನ್ನು ಪ್ರತಿ ಊಟಕ್ಕೆ 50 ರೂ. ನಿಂದ 200 ರೂ. ಗೆ ಏರಿಸಲಾಗಿದೆ. ಈ ಸೌಲಭ್ಯವು ಹಳೆಯ ಮತ್ತು ಹೊಸ ಎರಡೂ ತೆರಿಗೆ ಪದ್ಧತಿಗಳ ಅಡಿಯಲ್ಲಿ ಲಭ್ಯವಿರುತ್ತದೆ.
3. HRA ವ್ಯಾಪ್ತಿ ವಿಸ್ತರಣೆ ಮತ್ತು ಬೆಂಗಳೂರಿಗರಿಗೆ ಲಾಭ
ಮನೆ ಬಾಡಿಗೆ ಭತ್ಯೆ (HRA) ವಿನಾಯಿತಿಯಲ್ಲಿ ದೊಡ್ಡ ಬದಲಾವಣೆ ಮಾಡಲಾಗಿದೆ. ಈ ಮೊದಲು ಮುಂಬೈ, ದೆಹಲಿ, ಕೋಲ್ಕತ್ತಾ ಮತ್ತು ಚೆನ್ನೈ ನಗರಗಳಿಗೆ ಮಾತ್ರ ಅನ್ವಯವಾಗುತ್ತಿದ್ದ ಗರಿಷ್ಠ HRA ವಿನಾಯಿತಿಯನ್ನು ಈಗ ಬೆಂಗಳೂರು, ಹೈದರಾಬಾದ್, ಪುಣೆ ಮತ್ತು ಅಹಮದಾಬಾದ್ ನಗರಗಳಿಗೂ ವಿಸ್ತರಿಸಲಾಗಿದೆ. ಉಳಿದ ನಗರಗಳು ಶೇ. 40 ರ ವ್ಯಾಪ್ತಿಯಲ್ಲಿಯೇ ಇರಲಿವೆ.
ಗಮನಿಸಿ: ಬಾಡಿಗೆ ಭತ್ಯೆ ಪಡೆಯಲು ಇನ್ನು ಮುಂದೆ ಮನೆ ಮಾಲೀಕರ ವಿವರಗಳನ್ನು ನೀಡುವುದು ಕಡ್ಡಾಯ. ನಕಲಿ ಬಾಡಿಗೆ ರಸೀದಿಗಳನ್ನು ತಡೆಯಲು ಸರ್ಕಾರ ಫಾರ್ಮ್-124 ಎಂಬ ಹೊಸ ಘೋಷಣಾ ಪತ್ರವನ್ನು ಪರಿಚಯಿಸಿದೆ.
4. ಪ್ಯಾನ್ (PAN) ಕಾರ್ಡ್ ನಿಯಮಗಳಲ್ಲಿ ಬದಲಾವಣೆ
ಪ್ಯಾನ್ ಕಾರ್ಡ್ ಪಡೆಯಲು ಈಗ ಕೇವಲ ಆಧಾರ್ ಕಾರ್ಡ್ ಮಾತ್ರ ಸಾಕಾಗುವುದಿಲ್ಲ. ಅರ್ಜಿದಾರರು ಹೆಚ್ಚುವರಿ ದಾಖಲೆಗಳನ್ನು ಸಲ್ಲಿಸಬೇಕಾಗುತ್ತದೆ. ಅಲ್ಲದೆ, ಕಾರು ಖರೀದಿ/ಮಾರಾಟ ಮತ್ತು ಹೆಚ್ಚಿನ ಮೌಲ್ಯದ ವಹಿವಾಟುಗಳಿಗೆ ಪ್ಯಾನ್ ಕಾರ್ಡ್ ಬಳಕೆ ಇನ್ನು ಮುಂದೆ ಕಡ್ಡಾಯವಾಗಲಿದೆ.
5. ಹೂಡಿಕೆ ಮತ್ತು ವೆಚ್ಚದ ಮೇಲೆ ನಿಗಾ
ಹೊಸ ತೆರಿಗೆ ವ್ಯವಸ್ಥೆಯಲ್ಲಿ ನೀವು ತೆರಿಗೆ ರಹಿತ ಆದಾಯವನ್ನು ಗಳಿಸುತ್ತಿದ್ದರೂ ಸಹ, ಅದಕ್ಕೆ ಸಂಬಂಧಿಸಿದ ವೆಚ್ಚಗಳ ಬಗ್ಗೆ ಸ್ಪಷ್ಟ ದಾಖಲೆಗಳನ್ನು ಇಟ್ಟುಕೊಳ್ಳುವುದು ಅಗತ್ಯ. ಪ್ರತಿಯೊಂದು ಖರ್ಚು ಮತ್ತು ಹೂಡಿಕೆಯನ್ನು ಪಾರದರ್ಶಕವಾಗಿ ತೋರಿಸಬೇಕಾಗುತ್ತದೆ.
