ಪ್ರಯಾಗ್ರಾಜ್: ಅತ್ತೆ-ಮಾವಂದಿರನ್ನು ನೋಡಿಕೊಳ್ಳುವುದು ಸೊಸೆಯ ನೈತಿಕ ಜವಾಬ್ದಾರಿಯೇ ಹೊರತು ಕಾನೂನುಬದ್ಧ ಬಾಧ್ಯತೆಯಲ್ಲ ಎಂದು ಅಲಹಾಬಾದ್ ಹೈಕೋರ್ಟ್ ಮಹತ್ವದ ತೀರ್ಪು ನೀಡಿದೆ.
ಭಾರತೀಯ ನಾಗರಿಕ ಸುರಕ್ಷಾ ಸಂಹಿತೆ’ ಅಡಿಯಲ್ಲಿ ಅತ್ತೆ-ಮಾವಂದಿರು ತಮ್ಮ ಸೊಸೆಯಿಂದ ಜೀವನಾಂಶವನ್ನು ಪಡೆಯಲು ಸಾಧ್ಯವಿಲ್ಲ ಎಂದು ನ್ಯಾಯಮೂರ್ತಿ ಮದನ್ ಪಾಲ್ ಸಿಂಗ್ ಅವರ ಪೀಠವು ಸ್ಪಷ್ಟಪಡಿಸಿದೆ.
ಪ್ರಕರಣದ ಹಿನ್ನೆಲೆ
ರಾಕೇಶ್ ಕುಮಾರ್ ಮತ್ತು ಅವರ ಪತ್ನಿ ತಮ್ಮ ಸೊಸೆಯ ವಿರುದ್ಧ ದಾಖಲಿಸಿದ್ದ ಅರ್ಜಿಯ ವಿಚಾರಣೆ ನಡೆಸಿದ ಕೋರ್ಟ್ ಈ ಆದೇಶ ನೀಡಿದೆ. ಅರ್ಜಿದಾರರ ಮಗ ಮೃತಪಟ್ಟಿದ್ದು, ಸೊಸೆ ಉತ್ತರ ಪ್ರದೇಶ ಪೊಲೀಸ್ ಇಲಾಖೆಯಲ್ಲಿ ಕಾನ್ಸ್ಟೇಬಲ್ ಆಗಿ ಕಾರ್ಯನಿರ್ವಹಿಸುತ್ತಿದ್ದಾರೆ. ಮಗನ ಸಾವಿನ ನಂತರ ತಮಗೆ ಯಾವುದೇ ಆಸರೆ ಇಲ್ಲದಂತಾಗಿದ್ದು, ಸೊಸೆ ತಮ್ಮನ್ನು ನೋಡಿಕೊಳ್ಳಬೇಕು ಎಂದು ಅತ್ತೆ-ಮಾವ ವಾದಿಸಿದ್ದರು.
ಕೋರ್ಟ್ ನೀಡಿದ ಪ್ರಮುಖ ಅಂಶಗಳು:
ನೈತಿಕತೆ vs ಕಾನೂನು: ಅತ್ತೆ-ಮಾವಂದಿರ ಆರೈಕೆ ಮಾಡುವುದು ನೈತಿಕ ಕರ್ತವ್ಯವಾಗಬಹುದು, ಆದರೆ ಅದನ್ನು ಕಾನೂನಿನ ಮೂಲಕ ಜಾರಿಗೊಳಿಸಲು ಸಾಧ್ಯವಿಲ್ಲ.
ಪೋಷಕರ ವ್ಯಾಖ್ಯಾನ: ಕ್ರಿಮಿನಲ್ ಪ್ರೊಸೀಜರ್ ಕೋಡ್ (CrPC) ಸೆಕ್ಷನ್ 125 ರ ಅಡಿಯಲ್ಲಿ, ಹೆತ್ತ ತಂದೆ-ತಾಯಿಯನ್ನು ನೋಡಿಕೊಳ್ಳುವ ಜವಾಬ್ದಾರಿ ಮಕ್ಕಳಿಗೆ ಇರುತ್ತದೆ. ಆದರೆ ಇಲ್ಲಿ ‘ಪೋಷಕರು’ ಎಂದರೆ ಕೇವಲ ಜನ್ಮ ನೀಡಿದ ತಂದೆ-ತಾಯಿ ಮಾತ್ರ, ಅತ್ತೆ-ಮಾವಂದಿರು ಈ ವ್ಯಾಖ್ಯಾನದಲ್ಲಿ ಬರುವುದಿಲ್ಲ.
ಸೊಸೆಯ ಆದಾಯ: ಮಹಿಳೆಯು ಉದ್ಯೋಗದಲ್ಲಿದ್ದರೂ ಸಹ, ತನ್ನ ಗಳಿಕೆಯಿಂದ ಪತಿಯ ಪೋಷಕರನ್ನು ಪೋಷಿಸಲು ಅವಳು ಕಾನೂನುಬದ್ಧವಾಗಿ ಬದ್ಧಳಲ್ಲ. ಪತಿಯ ಮರಣದ ನಂತರವೂ ಈ ನಿಯಮ ಅನ್ವಯಿಸುತ್ತದೆ.
ಅನುಕಂಪದ ಆಧಾರದ ನೇಮಕಾತಿ: ಈ ಪ್ರಕರಣದಲ್ಲಿ ಸೊಸೆಗೆ ಸಿಕ್ಕಿರುವ ಕೆಲಸವು ಪತಿಯ ಮರಣದ ನಂತರ ಅನುಕಂಪದ ಆಧಾರದ ಮೇಲೆ ಸಿಕ್ಕಿದ್ದಲ್ಲ ಎಂಬುದು ಸಾಬೀತಾಗಿದೆ. ಆಗ್ರಾ ಫ್ಯಾಮಿಲಿ ಕೋರ್ಟ್ ಈ ಹಿಂದೆ ಸೊಸೆಯ ಪರವಾಗಿ ನೀಡಿದ್ದ ತೀರ್ಪನ್ನು ಪ್ರಶ್ನಿಸಿ ಅತ್ತೆ-ಮಾವ ಹೈಕೋರ್ಟ್ ಮೆಟ್ಟಿಲೇರಿದ್ದರು. ಆದರೆ ಹೈಕೋರ್ಟ್ ಈಗ ಫ್ಯಾಮಿಲಿ ಕೋರ್ಟ್ ನೀಡಿದ್ದ ತೀರ್ಪನ್ನೇ ಎತ್ತಿಹಿಡಿದಿದೆ.
