ಬೆಳಗಿನ ಉಪಾಹಾರ ಎಂದರೆ ಇಡ್ಲಿ, ದೋಸೆ, ಚಪಾತಿಗಳೇ ನೆನಪಾಗುತ್ತವೆಯೇ? ಹಾಗಿದ್ದರೆ ಸ್ವಲ್ಪ ಭಿನ್ನವಾಗಿ ಈ ಬಾರಿ ‘ಅಕ್ಕಿ ರೊಟ್ಟಿ’ ಟ್ರೈ ಮಾಡಿ ನೋಡಿ. ಹೋಟೆಲ್ಗಳಲ್ಲಿ ಸಿಗುವ ಮೃದುವಾದ ಮತ್ತು ರುಚಿಕರವಾದ ಅಕ್ಕಿ ರೊಟ್ಟಿಯನ್ನು ನೀವು ಮನೆಯಲ್ಲೇ ಸುಲಭವಾಗಿ ತಯಾರಿಸಬಹುದು. ದಕ್ಷಿಣ ಭಾರತದಲ್ಲಿ, ವಿಶೇಷವಾಗಿ ಕರ್ನಾಟಕದಲ್ಲಿ ಅತ್ಯಂತ ಜನಪ್ರಿಯವಾಗಿರುವ ಈ ಖಾದ್ಯ, ರುಚಿಯ ಜೊತೆಗೆ ಆರೋಗ್ಯವನ್ನೂ ನೀಡುವ ಸಾಂಪ್ರದಾಯಿಕ ಉಪಾಹಾರವಾಗಿದೆ. ಇದನ್ನು ಬೆಳಗಿನ ತಿಂಡಿಗಷ್ಟೇ ಅಲ್ಲದೆ ಸಂಜೆಯ ಸ್ನಾಕ್ಸ್ ರೂಪದಲ್ಲೂ ಸವಿಯಬಹುದು.
ಕೇವಲ ಅಕ್ಕಿ ಹಿಟ್ಟಿನಿಂದ ಮಾತ್ರವಲ್ಲದೆ, ಇದರಲ್ಲಿ ವೈವಿಧ್ಯಮಯ ತರಕಾರಿಗಳನ್ನು ಬಳಸುವುದರಿಂದ ಇದು ಪೋಷಕಾಂಶಗಳ ಗಣಿಯಾಗುತ್ತದೆ. ಕಡಿಮೆ ಎಣ್ಣೆ ಬಳಸಿ ಮಾಡುವುದರಿಂದ ತೂಕ ಇಳಿಸಿಕೊಳ್ಳುವವರಿಗೆ ಮತ್ತು ಡಯಟ್ ಮಾಡುವವರಿಗೆ ಇದು ಉತ್ತಮ ಆಯ್ಕೆ.
ಅಕ್ಕಿ ರೊಟ್ಟಿ ತಯಾರಿಸಲು ಬೇಕಾಗುವ ಪದಾರ್ಥಗಳು:
ಅಕ್ಕಿ ಹಿಟ್ಟು: 1 ಕಪ್
ಸಣ್ಣಗೆ ಹೆಚ್ಚಿದ ಈರುಳ್ಳಿ: 1
ಹಸಿಮೆಣಸಿನಕಾಯಿ: 2 (ನಿಮ್ಮ ಖಾರಕ್ಕೆ ತಕ್ಕಂತೆ)
ತುರಿದ ಕ್ಯಾರೆಟ್, ಸೌತೆಕಾಯಿ, ಎಲೆಕೋಸು: ತಲಾ ಅರ್ಧ ಕಪ್
ಕೊತ್ತಂಬರಿ ಸೊಪ್ಪು: ಸ್ವಲ್ಪ
ಜೀರಿಗೆ: 1 ಟೇಬಲ್ ಚಮಚ
ಉಪ್ಪು: ರುಚಿಗೆ ತಕ್ಕಷ್ಟು
ನೀರು: ಹಿಟ್ಟು ಕಲಸಲು ಅಗತ್ಯವಿರುವಷ್ಟು
ಎಣ್ಣೆ ಅಥವಾ ತುಪ್ಪ: ರೊಟ್ಟಿ ಸುಡಲು
ತಯಾರಿಸುವ ವಿಧಾನ:
ಮೊದಲು ಒಂದು ದೊಡ್ಡ ಪಾತ್ರೆಯನ್ನು ತೆಗೆದುಕೊಂಡು ಅದಕ್ಕೆ ಅಕ್ಕಿ ಹಿಟ್ಟು ಹಾಕಿ. ನಂತರ ಸಣ್ಣಗೆ ಹೆಚ್ಚಿದ ಈರುಳ್ಳಿ, ಹಸಿಮೆಣಸಿನಕಾಯಿ, ತುರಿದ ಕ್ಯಾರೆಟ್, ಸೌತೆಕಾಯಿ, ಕೊತ್ತಂಬರಿ ಸೊಪ್ಪು, ಜೀರಿಗೆ ಮತ್ತು ರುಚಿಗೆ ತಕ್ಕಷ್ಟು ಉಪ್ಪು ಸೇರಿಸಿ ಚೆನ್ನಾಗಿ ಬೆರೆಸಿ.
ಈಗ ಸ್ವಲ್ಪ ಸ್ವಲ್ಪವೇ ನೀರು ಹಾಕುತ್ತಾ ಹಿಟ್ಟನ್ನು ಹದವಾಗಿ ಕಲಸಿಕೊಳ್ಳಿ. ಹಿಟ್ಟು ಚಪಾತಿ ಹಿಟ್ಟಿನಂತೆ ಗಟ್ಟಿಯಾಗಿರಬಾರದು; ಕೈಯಿಂದ ತಟ್ಟಲು ಬರುವಷ್ಟು ಮೃದುವಾಗಿರಲಿ.
ಸ್ಟವ್ ಹಚ್ಚಿ ಹಂಚನ್ನು (ತವಾ) ಬಿಸಿ ಮಾಡಿ. ಹಂಚು ಬಿಸಿಯಾದ ನಂತರ ಉರಿಯನ್ನು ಕಡಿಮೆ ಮಾಡಿ.
ಕೈಯನ್ನು ಸ್ವಲ್ಪ ನೀರಿನಿಂದ ಒದ್ದೆ ಮಾಡಿಕೊಂಡು, ಹಿಟ್ಟಿನ ಉಂಡೆಯನ್ನು ತೆಗೆದುಕೊಂಡು ಹಂಚಿನ ಮೇಲೆಯೇ ನೇರವಾಗಿ ವೃತ್ತಾಕಾರದಲ್ಲಿ ತೆಳ್ಳಗೆ ತಟ್ಟಿ. (ಹಂಚಿನ ಮೇಲೆ ತಟ್ಟಲು ಕಷ್ಟವೆನಿಸಿದರೆ, ಎಣ್ಣೆ ಸವರಿದ ಬಾಳೆ ಎಲೆ ಅಥವಾ ಪ್ಲಾಸ್ಟಿಕ್ ಪೇಪರ್ ಮೇಲೆ ತಟ್ಟಿ ನಂತರ ಹಂಚಿಗೆ ಹಾಕಬಹುದು).
ರೊಟ್ಟಿಯ ಸುತ್ತಲೂ ಮತ್ತು ಮಧ್ಯದಲ್ಲಿ ಸ್ವಲ್ಪ ಎಣ್ಣೆ ಅಥವಾ ತುಪ್ಪ ಹಾಕಿ. ಮಧ್ಯಮ ಉರಿಯಲ್ಲಿ ಎರಡು ಬದಿಗಳು ಹೊಂಬಣ್ಣಕ್ಕೆ ಬರುವವರೆಗೆ ಚೆನ್ನಾಗಿ ಬೇಯಿಸಿ. ನಿಮಗೆ ರೊಟ್ಟಿ ಕರುಂ ಕುರುಂ ಎಂದು ಬೇಕಿದ್ದರೆ ಇನ್ನೊಂದು ನಿಮಿಷ ಹೆಚ್ಚು ಕಾಲ ಬೇಯಿಸಿ.
ಅಷ್ಟೇ.. ಬಿಸಿ ಬಿಸಿಯಾದ, ರುಚಿಕರವಾದ ಅಕ್ಕಿ ರೊಟ್ಟಿ ಸವಿಯಲು ಸಿದ್ಧ! ಇದನ್ನು ಶೇಂಗಾ ಚಟ್ನಿ, ಬೆಣ್ಣೆ, ಮೊಸರು ಅಥವಾ ಖಾರವಾದ ಕೆಂಪು ಚಟ್ನಿಯೊಂದಿಗೆ ಸವಿಯಿರಿ.
