ನವದೆಹಲಿ: ಪಶ್ಚಿಮ ಬಂಗಾಳ ವಿಧಾನಸಭೆ ಚುನಾವಣೆಗೆ ಕೆಲವೇ ದಿನಗಳು ಬಾಕಿ ಇರುವಾಗ, ಮತದಾರರ ಪಟ್ಟಿಯಿಂದ ಹೆಸರು ಕಡಿತಗೊಂಡಿರುವ ಲಕ್ಷಾಂತರ ಜನರಿಗೆ ಸುಪ್ರೀಂ ಕೋರ್ಟ್ ಮಹತ್ವದ ಆದೇಶ ನೀಡಿದೆ. ಮತದಾರರ ಪಟ್ಟಿಯ ವಿಶೇಷ ಪರಿಷ್ಕರಣೆ (SIR) ಪ್ರಕ್ರಿಯೆಯಲ್ಲಿ ಹೆಸರು ಕೈಬಿಟ್ಟಿರುವ ಮತದಾರರು, ತಮ್ಮ ಮೇಲ್ಮನವಿಗಳು ಸಕಾಲದಲ್ಲಿ ಇತ್ಯರ್ಥಗೊಂಡರೆ ಮತ ಚಲಾಯಿಸಲು ಅರ್ಹರು ಎಂದು ನ್ಯಾಯಾಲಯ ತಿಳಿಸಿದೆ.
ಮತದಾರರ ಪಟ್ಟಿಯಿಂದ ಹೆಸರು ಡಿಲೀಟ್ ಆಗಿರುವವರು ಈಗಾಗಲೇ ಸಲ್ಲಿಸಿರುವ ಮೇಲ್ಮನವಿಗಳು (Appeals) ಮತದಾನದ ದಿನಾಂಕಕ್ಕಿಂತ ಮೊದಲು ಇತ್ಯರ್ಥಗೊಂಡು, ಹೆಸರು ಸೇರ್ಪಡೆಗೆ ಆದೇಶವಾದರೆ ಅಂತಹವರಿಗೆ ಮತದಾನಕ್ಕೆ ಅವಕಾಶ ನೀಡಬೇಕು ಎಂದು ನ್ಯಾಯಾಲಯ ಹೇಳಿದೆ.
ಮೇಲ್ಮನವಿ ಪ್ರಾಧಿಕಾರಗಳಿಂದ ಅನುಮೋದನೆ ಪಡೆದ ಮತದಾರರ ಹೆಸರುಗಳನ್ನು ಸೇರಿಸಿ ಚುನಾವಣಾ ಆಯೋಗವು ತಕ್ಷಣವೇ ಪೂರಕ ಮತದಾರರ ಪಟ್ಟಿಯನ್ನು ಸಿದ್ಧಪಡಿಸಬೇಕು ಎಂದು ಕೋರ್ಟ್ ಸೂಚಿಸಿದೆ.
ಬಂಗಾಳದಲ್ಲಿ ಎರಡು ಹಂತಗಳಲ್ಲಿ (ಏಪ್ರಿಲ್ 23 ಮತ್ತು 29) ಚುನಾವಣೆ ನಡೆಯಲಿದ್ದು, ಆಯಾ ಹಂತದ ಮತದಾನಕ್ಕೆ ಮುನ್ನವೇ ಮೇಲ್ಮನವಿಗಳು ಇತ್ಯರ್ಥವಾಗುವುದು ಕಡ್ಡಾಯವಾಗಿದೆ.
