ಇಂದಿನ ಡಿಜಿಟಲ್ ಯುಗದಲ್ಲಿ ಮಕ್ಕಳು ಹೆಚ್ಚಿನ ಸಮಯವನ್ನು ಮೊಬೈಲ್, ಟಿವಿ ಮತ್ತು ಟ್ಯಾಬ್ಲೆಟ್ ಸ್ಕ್ರೀನ್ಗಳ ಮುಂದೆ ಕಳೆಯುತ್ತಿದ್ದಾರೆ. ನಿಮ್ಮ ಮಗು ಟಿವಿಯನ್ನು ತುಂಬಾ ಹತ್ತಿರದಿಂದ ನೋಡುತ್ತಿದ್ದರೆ ಅಥವಾ ಕಣ್ಣುಗಳನ್ನು ಪದೇ ಪದೇ ಅಜ್ಜುತ್ತಿದ್ದರೆ, ಅದು ದೃಷ್ಟಿ ದೋಷದ ಸಂಕೇತವಾಗಿರಬಹುದು. ಮಕ್ಕಳ ಕಣ್ಣುಗಳು ತುಂಬಾ ಸೂಕ್ಷ್ಮವಾಗಿರುವುದರಿಂದ, ಆರಂಭಿಕ ಹಂತದಲ್ಲೇ ದೋಷಗಳನ್ನು ಪತ್ತೆಹಚ್ಚುವುದು ಮುಖ್ಯ. ವೈದ್ಯರ ಬಳಿ ಹೋಗುವ ಮೊದಲು ನೀವು ಮನೆಯಲ್ಲೇ ಕೆಲವು ಸರಳ ಪರೀಕ್ಷೆಗಳ ಮೂಲಕ ಮಕ್ಕಳ ದೃಷ್ಟಿ ಸಾಮರ್ಥ್ಯವನ್ನು ಪರಿಶೀಲಿಸಬಹುದು.
ಮನೆಯಲ್ಲೇ ಕಣ್ಣಿನ ಪರೀಕ್ಷೆ ಮಾಡುವ ವಿಧಾನಗಳು ಹೀಗಿವೆ:
1. ಅಕ್ಷರ ಅಥವಾ ಸಂಖ್ಯೆಗಳ ಪರೀಕ್ಷೆ:
ಒಂದು ಬಿಳಿ ಕಾಗದದ ಮೇಲೆ ದೊಡ್ಡದಾದ ಮತ್ತು ಸ್ಪಷ್ಟವಾದ ಅಕ್ಷರ ಅಥವಾ ಸಂಖ್ಯೆಗಳನ್ನು ಬರೆಯಿರಿ. ಮಗುವನ್ನು ಸುಮಾರು 6 ಮೀಟರ್ (20 ಅಡಿ) ದೂರದಲ್ಲಿ ನಿಲ್ಲಿಸಿ. ಮಗು ಆ ಅಕ್ಷರಗಳನ್ನು ಸರಿಯಾಗಿ ಗುರುತಿಸುತ್ತದೆಯೇ ಎಂದು ಗಮನಿಸಿ. ಒಂದು ವೇಳೆ ಕೆಲವು ಅಕ್ಷರಗಳನ್ನು ಓದಲು ಮಗು ಕಷ್ಟಪಡುತ್ತಿದ್ದರೆ, ಅದು ದೃಷ್ಟಿ ದೌರ್ಬಲ್ಯದ ಲಕ್ಷಣವಾಗಿರಬಹುದು.
2. ಲೈಟ್ ರಿಫ್ಲೆಕ್ಷನ್ (ಬೆಳಕಿನ ಪ್ರತಿಫಲನ) ಪರೀಕ್ಷೆ:
ಟಾರ್ಚ್ ಅಥವಾ ಮೊಬೈಲ್ ಫ್ಲ್ಯಾಶ್ ಲೈಟ್ ಬಳಸಿ ಮಗುವಿನ ಕಣ್ಣುಗಳ ಮೇಲೆ ಬೆಳಕು ಹರಿಸಿ. ಬೆಳಕು ಎರಡೂ ಕಣ್ಣುಗಳ ಮೇಲೆ ಸಮಾನವಾಗಿ ಪ್ರತಿಫಲಿಸುತ್ತಿದೆಯೇ ಎಂದು ನೋಡಿ. ಒಂದು ಕಣ್ಣಿನಲ್ಲಿ ಹೆಚ್ಚು ಅಥವಾ ಇನ್ನೊಂದರಲ್ಲಿ ಕಡಿಮೆ ಹೊಳಪು ಕಂಡುಬಂದರೆ, ಅದು ಕಣ್ಣಿನ ಸ್ನಾಯುಗಳ ಅಥವಾ ದೃಷ್ಟಿಯ ಸಮಸ್ಯೆಯನ್ನು ಸೂಚಿಸಬಹುದು.
3. ಫೋಕಸ್ ಚೇಂಜ್ ಟೆಸ್ಟ್:
ಯಾವುದಾದರೂ ಒಂದು ಸಣ್ಣ ವಸ್ತುವನ್ನು ಮಗುವಿನ ಕಣ್ಣಿನ ಹತ್ತಿರ ತರುವುದು ಮತ್ತು ಮತ್ತೆ ದೂರ ಕೊಂಡೊಯ್ಯುವುದು ಮಾಡಿ. ಆ ವಸ್ತುವಿನ ಮೇಲೆ ಮಗು ತನ್ನ ದೃಷ್ಟಿಯನ್ನು ಸರಿಯಾಗಿ ಕೇಂದ್ರೀಕರಿಸಲು (Focus) ಸಾಧ್ಯವಾಗುತ್ತಿದೆಯೇ ಎಂದು ಗಮನಿಸಿ. ಹತ್ತಿರದ ಅಥವಾ ದೂರದ ವಸ್ತುಗಳ ಮೇಲೆ ಫೋಕಸ್ ಮಾಡಲು ಮಗುವಿಗೆ ಸಾಧ್ಯವಾಗದಿದ್ದರೆ ವೈದ್ಯರ ಸಲಹೆ ಪಡೆಯುವುದು ಉತ್ತಮ.
ಪೋಷಕರಿಗೆ ಕೆಲವು ಪ್ರಮುಖ ಸಲಹೆಗಳು:
ಸ್ಕ್ರೀನ್ ಟೈಮ್ ಮಿತಿ: ಮಕ್ಕಳನ್ನು ಸತತವಾಗಿ ಒಂದು ಗಂಟೆಗಿಂತ ಹೆಚ್ಚು ಕಾಲ ಸ್ಕ್ರೀನ್ ನೋಡಲು ಬಿಡಬೇಡಿ. ಇದು ಕಣ್ಣಿನ ಮೇಲೆ ಒತ್ತಡವನ್ನು ಉಂಟುಮಾಡುತ್ತದೆ.
ದೂರದಿಂದ ವೀಕ್ಷಣೆ: ಟಿವಿ ನೋಡುವಾಗ ಕನಿಷ್ಠ 6-10 ಅಡಿ ದೂರವಿರುವಂತೆ ನೋಡಿಕೊಳ್ಳಿ.
ತಜ್ಞರ ಭೇಟಿ: ಮನೆಯಲ್ಲಿ ಮಾಡಿದ ಪರೀಕ್ಷೆಯಲ್ಲಿ ಏನಾದರೂ ವ್ಯತ್ಯಾಸ ಕಂಡುಬಂದರೆ ತಕ್ಷಣವೇ ನೇತ್ರ ತಜ್ಞರನ್ನು (Ophthalmologist) ಭೇಟಿ ಮಾಡಿ.
ಮಕ್ಕಳ ದೃಷ್ಟಿ ದೋಷವನ್ನು ಆರಂಭದಲ್ಲೇ ಗುರುತಿಸುವುದರಿಂದ ಭವಿಷ್ಯದಲ್ಲಿ ಉಂಟಾಗಬಹುದಾದ ದೊಡ್ಡ ಸಮಸ್ಯೆಗಳನ್ನು ತಡೆಗಟ್ಟಬಹುದು.
