ಬೆಂಗಳೂರು: ಬೆಂಗಳೂರು ಮೆಟ್ರೋ ರೈಲು ನಿಗಮ ನಿಯಮಿತ (BMRCL) ಸಂಸ್ಥೆಯು 27ನೇ ಮಾರ್ಚ್ 2026ರಂದು ಬಾಗ್ಮನೆ ಡೆವಲಪರ್ಸ್ ಪ್ರೈವೇಟ್ ಲಿಮಿಟೆಡ್ (ಬಾಗ್ಮನೆ ಗುಂಪು) ಜೊತೆ ಅನುದಾನ ಒಪ್ಪಂದಕ್ಕೆ ಸಹಿ ಹಾಕಿದೆ. ಈ ಒಪ್ಪಂದವು ಬೆಂಗಳೂರು ಮೆಟ್ರೋ ರೈಲು ಯೋಜನೆಯ ಹಂತ-2ಎ ಅಡಿಯಲ್ಲಿ ಮೆಟ್ರೋ ಮೂಲಸೌಕರ್ಯ ಅಭಿವೃದ್ಧಿಗೆ ಹಣಕಾಸು ಸಹಭಾಗಿತ್ವವನ್ನು ಒಳಗೊಂಡಿದೆ.
ಈ ಸಹಕಾರದ ಭಾಗವಾಗಿ, ಬಾಗ್ಮನೆ ಡೆವಲಪರ್ಸ್ ಪ್ರೈವೇಟ್ ಲಿಮಿಟೆಡ್ ಸಂಸ್ಥೆಯು ಔಟರ್ ರಿಂಗ್ ರೋಡ್ (ORR) ಮಾರ್ಗದಲ್ಲಿರುವ ಡಿಆರ್ಡಿಒ ಸ್ಪೋರ್ಟ್ಸ್ ಕಾಂಪ್ಲೆಕ್ಸ್ ಮೆಟ್ರೋ ನಿಲ್ದಾಣ ನಿರ್ಮಾಣಕ್ಕಾಗಿ ರೂ.40 ಕೋಟಿಗಳನ್ನು ಕೊಡುಗೆಯಾಗಿ ನೀಡುತ್ತಿದೆ. ಈ ಮೊತ್ತದಲ್ಲಿ ರೂ.20 ಕೋಟಿಗಳನ್ನು ಈಗಾಗಲೇ ಕಂಪನಿಯು ಪಾವತಿಸಿದೆ. ಈ ಪಾಲ್ ಗೊಳ್ಳುವಿಕೆ ರೂಪುರೇಷೆಯನ್ನು ನಿಲ್ದಾಣದ ಸ್ಥಳ, ಯೋಜನೆಯ ವೈಶಿಷ್ಟ್ಯಗಳು ಮತ್ತು ಸೀಮಿತ ಹಕ್ಕುಗಳನ್ನು ಗಮನದಲ್ಲಿಟ್ಟುಕೊಂಡು ರೂಪಿಸಲಾಗಿದೆ. ಜೊತೆಗೆ, ಬಾಗ್ಮನೆ ಡೆವಲಪರ್ಸ್ ಸಂಸ್ಥೆಯು ಮೆಟ್ರೋ ನಿಲ್ದಾಣದ ಒಳಾಂಗಣ ಹಾಗೂ ಹೊರಾಂಗಣ ಮುಖಭಾಗದ ಸುಧಾರಣೆಗೆ ಸಹ ಕೊಡುಗೆ ನೀಡಲಿದೆ.
ಈ ಕೊಡುಗೆಯ ಪರಿಗಣನೆಗೆ, ನಮ್ಮ ಮೆಟ್ರೋ ಸಂಸ್ಥೆಯು 20 ವರ್ಷಗಳ ಅವಧಿಗೆ ನಿಲ್ದಾಣಕ್ಕೆ ಹೆಸರಿಡುವ ಹಕ್ಕನ್ನು ಬಾಗ್ಮನೆ ಡೆವಲಪರ್ಸ್ ಪ್ರೈವೇಟ್ ಲಿಮಿಟೆಡ್ಗೆ ನೀಡುತ್ತದೆ, ಇದು ಒಪ್ಪಂದದ ನಿಯಮಗಳಿಗೆ ಅನುಗುಣವಾಗಿದೆ.
ಈ ವ್ಯವಸ್ಥೆಯು ನಿರ್ಮಾಣ ಹಂತದಲ್ಲಿ ಅನುದಾನ ಆಧಾರಿತ ಸಹಭಾಗಿತ್ವ ಮಾದರಿಯನ್ನು ಪ್ರತಿನಿಧಿಸುತ್ತದೆ, ಇದರಲ್ಲಿ ಖಾಸಗಿ ಪಾಲುದಾರರು ಮೆಟ್ರೋ ಮೂಲಸೌಕರ್ಯಕ್ಕೆ ಬಂಡವಾಳ ವೆಚ್ಚದಲ್ಲಿ ಪಾಲ್ ಗೊಳ್ಳುತ್ತಾರೆ. ಈ ಒಪ್ಪಂದದಡಿಯಲ್ಲಿ ನೀಡಲ್ಪಡುವ ಹಕ್ಕುಗಳು ಕೇವಲ ಹೆಸರಿಡುವ ಹಕ್ಕಿಗೆ ಮಾತ್ರ ಸೀಮಿತವಾಗಿದ್ದು, ಜಾಹೀರಾತು ಹಕ್ಕುಗಳು, ವಾಣಿಜ್ಯ ಸ್ಥಳ ಅಥವಾ ಸಂಪರ್ಕ ಸೌಲಭ್ಯಗಳಂತಹ ಹೆಚ್ಚುವರಿ ಹಕ್ಕುಗಳನ್ನು ಒಳಗೊಂಡಿಲ್ಲ.
ಈ ಉಪಕ್ರಮವು BMRCL ಸಂಸ್ಥೆಯ ನವೀನ ಹಣಕಾಸು ವ್ಯವಸ್ಥೆಯ ಭಾಗವಾಗಿದ್ದು, ಖಾಸಗಿ ವಲಯದ ಪಾಲ್ ಗೊಳ್ಳುವಿಕೆಯನ್ನು ಉತ್ತೇಜಿಸುವುದರೊಂದಿಗೆ, ಎಲ್ಲಾ ಮೆಟ್ರೋ ಆಸ್ತಿಗಳ ಮಾಲೀಕತ್ವ ಮತ್ತು ಕಾರ್ಯಾಚರಣಾ ನಿಯಂತ್ರಣವು ಸಂಪೂರ್ಣವಾಗಿ BMRCL ಕೈಯಲ್ಲೇ ಉಳಿಯುವಂತೆ ಖಚಿತಪಡಿಸುತ್ತದೆ.
ಬಾಗ್ಮನೆ ಗುಂಪಿನ ಕೊಡುಗೆಯನ್ನು ಗುರುತಿಸಿ, BMRCL ಮತ್ತು ಬಾಗ್ಮನೆ ಡೆವಲಪರ್ಸ್ ಪ್ರೈವೇಟ್ ಲಿಮಿಟೆಡ್ ಸಂಸ್ಥೆಗಳು “ಬಾಗ್ಮನೆ ಡಿಆರ್ಡಿಒ ಸ್ಪೋರ್ಟ್ಸ್ ಕಾಂಪ್ಲೆಕ್ಸ್ ಮೆಟ್ರೋ ನಿಲ್ದಾಣ” ಎಂದು ನಾಮಕರಣ ಮಾಡಲು ಕರ್ನಾಟಕ ಸರ್ಕಾರದ ಅನುಮೋದನೆಗಾಗಿ ಸಂಯುಕ್ತವಾಗಿ ಮನವಿ ಮಾಡಲಿವೆ.
ಡಿಆರ್ಡಿಒ ಸ್ಪೋರ್ಟ್ಸ್ ಕಾಂಪ್ಲೆಕ್ಸ್ ಮೆಟ್ರೋ ನಿಲ್ದಾಣವು ಸೆಂಟ್ರಲ್ ಸಿಲ್ಕ್ ಬೋರ್ಡ್ನಿಂದ ಕೆ.ಆರ್ ಪುರಂವರೆಗೆ 19.75 ಕಿ.ಮೀ ಉದ್ದದ ಹೊರ ವರ್ತೂಲ ರಸ್ತೆ (ORR) ಮಾರ್ಗದ ಭಾಗವಾಗಿದ್ದು, ಒಟ್ಟು 17 ನಿಲ್ದಾಣಗಳನ್ನು ಒಳಗೊಂಡಿದೆ. ಈ ಮಾರ್ಗವು ಸುರಕ್ಷಿತ, ಪರಿಣಾಮಕಾರಿ ಮತ್ತು ಶಾಶ್ವತ ಸಾರ್ವಜನಿಕ ಸಾರಿಗೆ ವ್ಯವಸ್ಥೆಯನ್ನು ಒದಗಿಸುವ ಮೂಲಕ ನಗರ ಸಂಚಾರವನ್ನು ಸುಧಾರಿಸುವುದಲ್ಲದೆ, ಔಟರ್ ರಿಂಗ್ ರೋಡ್ನಲ್ಲಿ ಸಂಚಾರ ದಟ್ಟಣೆ ಕಡಿಮೆ ಮಾಡುವುದಕ್ಕೂ ಹಾಗೂ ವಾಹನಗಳಿಂದ ಉಂಟಾಗುವ ವಾಯುಮಾಲಿನ್ಯವನ್ನು ತಗ್ಗಿಸುವುದಕ್ಕೂ ಸಹಕಾರಿಯಾಗಲಿದೆ.
ಇದು ORR ಮಾರ್ಗ (ಹಂತ-2ಎ) ಅಡಿಯಲ್ಲಿ BMRCL ನ ನವೀನ ಹಣಕಾಸು ವ್ಯವಸ್ಥೆಯಡಿ ಕೈಗೊಳ್ಳಲಾದ 6ನೇ ಒಪ್ಪಂದವಾಗಿದೆ. ಇನ್ನೂ ಎರಡು ನವೀನ ಒಪ್ಪಂದಗಳು ಪ್ರಗತಿಯಲ್ಲಿದ್ದು, ಶೀಘ್ರದಲ್ಲೇ ಅಂತಿಮಗೊಳ್ಳಲಿವೆ.
ಈ ಸಂದರ್ಭದಲ್ಲಿ ಮಾತನಾಡಿದ ಬಿಎಂಆರ್ಸಿಎಲ್ ವ್ಯವಸ್ಥಾಪಕ ನಿರ್ದೇಶಕರಾದ ಡಾ. ಜೆ. ರವಿಶಂಕರ್ ಅವರು “ಈ ಸಹಭಾಗಿತ್ವವು ಸಾರ್ವಜನಿಕ ಮಾಲೀಕತ್ವ ಮತ್ತು ನಿಯಂತ್ರಣವನ್ನು ಕಾಪಾಡಿಕೊಳ್ಳುವ ಜೊತೆಗೆ, ಯೋಜನೆ ಆಧಾರಿತ ಖಾಸಗಿ ಸಹಕಾರದ ಮೂಲಕ ಮೂಲಸೌಕರ್ಯ ಅಭಿವೃದ್ಧಿಯನ್ನು ಬೆಂಬಲಿಸುವುದನ್ನು ತೋರಿಸುತ್ತದೆ. ಬೆಂಗಳೂರಿಗೆ ಶಾಶ್ವತ ನಗರ ಸಂಚಾರ ಪರಿಹಾರಗಳನ್ನು ವೇಗವಾಗಿ ಅಭಿವೃದ್ಧಿಪಡಿಸಲು BMRCL ಇಂತಹ ನವೀನ ವಿಧಾನಗಳನ್ನು ಮುಂದುವರಿಸುತ್ತದೆ.” ಎಂದು ಹೇಳಿದರು.
ಬಾಗ್ಮನೆ ಡೆವಲಪರ್ಸ್ ಪ್ರೈವೇಟ್ ಲಿಮಿಟೆಡ್ನ ಅಧಿಕೃತ ಪ್ರತಿನಿಧಿ ಶ್ರೀ ಆದಿತ್ಯ ಬಾಗ್ಮನೆ ಅವರು “ಔಟರ್ ರಿಂಗ್ ರೋಡ್ ಮಾರ್ಗದಲ್ಲಿನ ಮಹತ್ವದ ಮೆಟ್ರೋ ಮೂಲಸೌಕರ್ಯ ಅಭಿವೃದ್ಧಿಗೆ BMRCL ಜೊತೆ ಕೈಜೋಡಿಸುವುದು ಸಂತೋಷದ ಸಂಗತಿ. ಈ ಸಹಭಾಗಿತ್ವವು ಶಾಶ್ವತ ನಗರ ಸಂಚಾರ ವ್ಯವಸ್ಥೆಯನ್ನು ಬಲಪಡಿಸಲು ಮತ್ತು ಬೆಂಗಳೂರಿನ ಸಾರ್ವಜನಿಕ ಸಾರಿಗೆ ವ್ಯವಸ್ಥೆಗೆ ಅರ್ಥಪೂರ್ಣವಾಗಿ ಕೊಡುಗೆ ನೀಡುವ ನಮ್ಮ ಬದ್ಧತೆಯನ್ನು ತೋರಿಸುತ್ತದೆ” ಎಂದು ಹೇಳಿದರು.
ಸೆಕೆಂಡ್ ಹ್ಯಾಂಡ್ ಫೋನ್ ಖರೀದಿಸುವವರೇ ಎಚ್ಚರ : ತಪ್ಪದೇ ಈ 10 ವಿಷಯಗಳನ್ನು ಚೆಕ್ ಮಾಡಿಕೊಳ್ಳಿ.!
