ಧಾರವಾಡ: ಮನೆಯಲ್ಲಿ ನೀರು ಕಾಯಿಸಲು ಬಳಸುವ ಎಲೆಕ್ಟ್ರಿಕ್ ಹೀಟಿಂಗ್ ಸ್ಟಿಕ್ (ಇಮ್ಮರ್ಶನ್ ರಾಡ್) ಮಹಿಳೆಯೊಬ್ಬಳ ಪ್ರಾಣವನ್ನೇ ಬಲಿಪಡೆದ ಘಟನೆ ಜಿಲ್ಲೆಯ ದೇವಗಿರಿಯ ಹತ್ತಿರದ ದೇವರಹುಬ್ಬಳ್ಳಿ ಗ್ರಾಮದಲ್ಲಿ ನಡೆದಿದೆ.
ಮೃತ ಮಹಿಳೆಯನ್ನು 25 ವರ್ಷದ ನಿವೇದಿತಾ ಎಂದು ಗುರುತಿಸಲಾಗಿದೆ. ಪ್ರತಿದಿನದಂತೆ ನಿವೇದಿತಾ ಸ್ನಾನಕ್ಕಾಗಿ ಬಕೆಟ್ನಲ್ಲಿ ನೀರು ಕಾಯಿಸಲು ಇಮ್ಮರ್ಶನ್ ರಾಡ್ ಹಾಕಿದ್ದರು. ನೀರು ಕಾದ ನಂತರ, ಸ್ವಿಚ್ ಆಫ್ ಮಾಡದೆಯೇ ಅಥವಾ ಮುನ್ನೆಚ್ಚರಿಕೆ ವಹಿಸದೆಯೇ ರಾಡ್ ಹೊರತೆಗೆಯಲು ಹೋದಾಗ ಈ ಅವಘಡ ಸಂಭವಿಸಿದೆ ಎನ್ನಲಾಗಿದೆ.
ಬಕೆಟ್ ನಲ್ಲಿದ್ದ ವಿದ್ಯುತ್ ಪ್ರವಾಹವು ನಿವೇದಿತಾ ಅವರ ದೇಹಕ್ಕೆ ತಗುಲಿದ್ದು, ತೀವ್ರವಾಗಿ ಶಾಕ್ ಹೊಡೆದ ರಭಸಕ್ಕೆ ಅವರು ಸ್ಥಳದಲ್ಲೇ ಕುಸಿದು ಬಿದ್ದಿದ್ದಾರೆ. ತಕ್ಷಣವೇ ಕುಟುಂಬಸ್ಥರು ಮತ್ತು ನೆರೆಹೊರೆಯವರು ಅವರನ್ನು ಆಸ್ಪತ್ರೆಗೆ ಕರೆದೊಯ್ದರೂ ಸಹ, ಚಿಕಿತ್ಸೆ ಫಲಿಸದೇ ಅವರು ಮೃತಪಟ್ಟಿದ್ದಾರೆ.
ಮಹಿಳೆ ಅಕಾಲಿಕ ಮರಣಕ್ಕೀಡಾಗಿದ್ದು ದೇವರಹುಬ್ಬಳ್ಳಿ ಗ್ರಾಮದಲ್ಲಿ ಮೌನ ಆವರಿಸುವಂತೆ ಮಾಡಿದೆ. ಮಗಳ ಸಾವಿನಿಂದ ಕುಟುಂಬಸ್ಥರ ಆಕ್ರಂದನ ಮುಗಿಲು ಮುಟ್ಟಿದೆ. ಈ ಕುರಿತು ಧಾರವಾಡ ಗ್ರಾಮೀಣ ಪೊಲೀಸ್ ಠಾಣೆಯ ಅಧಿಕಾರಿಗಳು ಸ್ಥಳಕ್ಕೆ ಭೇಟಿ ನೀಡಿ ಪರಿಶೀಲನೆ ನಡೆಸಿದ್ದು, ಪ್ರಕರಣ ದಾಖಲಿಸಿಕೊಂಡಿದ್ದಾರೆ.
ಹೀಟಿಂಗ್ ರಾಡ್ ಬಳಸುವಾಗ ಈ ಎಚ್ಚರಿಕೆ ಇರಲಿ:
ಸಾಮಾನ್ಯವಾಗಿ ಚಳಿಗಾಲ ಮತ್ತು ಮಳೆಗಾಲದಲ್ಲಿ ಈ ಸಾಧನವನ್ನು ಹೆಚ್ಚಾಗಿ ಬಳಸಲಾಗುತ್ತದೆ. ಆದರೆ ಸಣ್ಣ ನಿರ್ಲಕ್ಷ್ಯವೂ ಅಪಾಯಕಾರಿ ಎಂಬುದಕ್ಕೆ ಈ ಘಟನೆ ಸಾಕ್ಷಿಯಾಗಿದೆ. ಸುರಕ್ಷತೆಯ ದೃಷ್ಟಿಯಿಂದ ಈ ಕೆಳಗಿನ ಕ್ರಮಗಳನ್ನು ಪಾಲಿಸಿ:
ಪ್ಲಾಸ್ಟಿಕ್ ಬಕೆಟ್ ಬಳಸಿ: ನೀರು ಕಾಯಿಸುವಾಗ ಲೋಹದ (ಸ್ಟೀಲ್ ಅಥವಾ ಅಲ್ಯೂಮಿನಿಯಂ) ಬಕೆಟ್ ಬಳಸಬೇಡಿ, ಪ್ಲಾಸ್ಟಿಕ್ ಬಕೆಟ್ ಮಾತ್ರ ಬಳಸಿ.
ಸ್ವಿಚ್ ಆಫ್ ಮಾಡುವುದು ಕಡ್ಡಾಯ: ನೀರು ಕಾದ ಮೇಲೆ ಮೊದಲು ಪ್ಲಗ್ ಪಾಯಿಂಟ್ನಿಂದ ಸ್ವಿಚ್ ಆಫ್ ಮಾಡಿ, ವೈರ್ ಬೇರ್ಪಡಿಸಿ. ಆನಂತರವೇ ರಾಡ್ ಅನ್ನು ಹೊರತೆಗೆಯಿರಿ.
ವೈರ್ ಪರೀಕ್ಷಿಸಿ: ಕತ್ತರಿಸಿದ ಅಥವಾ ಸುಟ್ಟ ಹಳೆಯ ವೈರ್ ಇರುವ ರಾಡ್ಗಳನ್ನು ಬಳಸಬೇಡಿ.
ನೀರಿನ ಸಂಪರ್ಕ: ರಾಡ್ ನೀರಿನಲ್ಲಿರುವಾಗ ಬಕೆಟ್ ಒಳಗೆ ಕೈ ಹಾಕಿ ಬಿಸಿ ನೋಡುವ ಸಾಹಸಕ್ಕೆ ಹೋಗಬೇಡಿ.
ಒಂದು ಕ್ಷಣದ ಅಜಾಗರೂಕತೆ ಇಡೀ ಕುಟುಂಬವನ್ನೇ ಸಂಕಷ್ಟಕ್ಕೆ ತಳ್ಳಬಹುದು. ವಿದ್ಯುತ್ ಉಪಕರಣಗಳ ಬಳಕೆಯಲ್ಲಿ ಸದಾ ಜಾಗೃತರಾಗಿರಿ.
