ನವದೆಹಲಿ: ಇರಾನ್-ಅಮೆರಿಕ ಸಂಘರ್ಷ ಹಾಗೂ ಹಾರ್ಮುಜ್ ಜಲಸಂಧಿ ಮುಚ್ಚಲ್ಪಟ್ಟ ಹಿನ್ನೆಲೆಯಲ್ಲಿ ಜಾಗತಿಕವಾಗಿ ಎಲ್ಪಿಜಿ (LPG) ಪೂರೈಕೆಯಲ್ಲಿ ತೀವ್ರ ವ್ಯತ್ಯಯ ಉಂಟಾಗಿದೆ. ಭಾರತದ ಮೇಲೂ ಇದು ಭಾರಿ ಪ್ರಭಾವ ಬೀರಿದ್ದು, ದೇಶದಲ್ಲಿ ಎಲ್ಪಿಜಿ ಬಳಕೆ ಮತ್ತು ಸಬ್ಸಿಡಿಯನ್ನು ಮಿತಿಗೊಳಿಸಲು ಕೇಂದ್ರ ಸರ್ಕಾರ ಈಗ ಒಂದು ಅತ್ಯಂತ ಪ್ರಮುಖ ಹಾಗೂ ಕಠಿಣ ನಿರ್ಧಾರವನ್ನು ಕೈಗೊಂಡಿದೆ.
ದೇಶಾದ್ಯಂತ ಪೈಪ್ಲೈನ್ ಮೂಲಕ ಸರಬರಾಜು ಆಗುವ ನೈಸರ್ಗಿಕ ಅನಿಲ (PNG) ಸಂಪರ್ಕವನ್ನು ವಿಸ್ತರಿಸಲಾಗುತ್ತಿದ್ದರೂ, ಎಲ್ಪಿಜಿ ಸಿಲಿಂಡರ್ಗಳ ಬಳಕೆ ನಿರೀಕ್ಷಿತ ಪ್ರಮಾಣದಲ್ಲಿ ಕಡಿಮೆಯಾಗಿಲ್ಲ. ಮಾರ್ಚ್ ವೇಳೆಗೆ ಬರೋಬ್ಬರಿ 6.5 ಲಕ್ಷ ಹೊಸ ಪಿಎನ್ಜಿ ಸಂಪರ್ಕಗಳನ್ನು ನೀಡಲಾಗಿದ್ದರೂ, ಜನರು ಹಳೆಯ ಎಲ್ಪಿಜಿ ಕನೆಕ್ಷನ್ಗಳನ್ನು ಬಿಟ್ಟುಕೊಡುತ್ತಿಲ್ಲ. ಈ ಹಿನ್ನೆಲೆಯಲ್ಲಿ ‘ಡ್ಯುಯಲ್ ಗ್ಯಾಸ್ ಕನೆಕ್ಷನ್’ (ಪಿಎನ್ಜಿ ಮತ್ತು ಎಲ್ಪಿಜಿ ಎರಡನ್ನೂ ಹೊಂದುವುದು) ನಿಯಮವನ್ನು ರದ್ದುಗೊಳಿಸಲು ಸರ್ಕಾರ ಮುಂದಾಗಿದೆ.
ಜೂನ್ 1 ರಿಂದ 30 ದಿನಗಳ ಗಡುವು!
ಪಿಎನ್ಜಿ ಸಂಪರ್ಕ ಹೊಂದಿರುವ ಗ್ರಾಹಕರಿಗೆ ಜೂನ್ 1, 2026 ರಿಂದ ಅನ್ವಯವಾಗುವಂತೆ ಸರ್ಕಾರ 30 ದಿನಗಳ ಗಡುವು ನೀಡಿದೆ. ಈ ನಿಗದಿತ ಅವಧಿಯೊಳಗೆ ತಮ್ಮ ಬಳಿಯಿರುವ ಎಲ್ಪಿಜಿ ಸಿಲಿಂಡರ್ ಅನ್ನು ವಾಪಸ್ ಮಾಡದಿದ್ದರೆ, ಆ ಸಂಪರ್ಕವನ್ನು ಸ್ವಯಂಚಾಲಿತವಾಗಿ ರದ್ದುಗೊಳಿಸಲಾಗುತ್ತದೆ.
ಏನಿದು ಹೊಸ ನಿಯಮ?
ಒಂದೇ ಅಡುಗೆಮನೆಗೆ ಒಂದೇ ಕನೆಕ್ಷನ್: ಪತಿ-ಪತ್ನಿ, ಅವಿವಾಹಿತ ಅಥವಾ ವಿವಾಹಿತ ಮಕ್ಕಳು ಹಾಗೂ ವೃದ್ಧ ಪೋಷಕರಿರುವ ಒಂದೇ ಕುಟುಂಬವು ಒಂದೇ ಅಡುಗೆಮನೆಯನ್ನು ಬಳಸುತ್ತಿದ್ದರೆ, ಅವರ ಹೆಸರಿನಲ್ಲಿ ಕೇವಲ ಒಂದು ಎಲ್ಪಿಜಿ ಕನೆಕ್ಷನ್ ಮಾತ್ರ ಇರಲು ಅವಕಾಶವಿರುತ್ತದೆ. ಒಂದಕ್ಕಿಂತ ಹೆಚ್ಚು ಕನೆಕ್ಷನ್ ಇದ್ದರೆ ಅದನ್ನು ರದ್ದುಪಡಿಸಿಕೊಳ್ಳಬೇಕು.
ತಕ್ಷಣವೇ ಪೂರೈಕೆ ಸ್ಥಗಿತ: ಒಬ್ಬರೇ ಗ್ರಾಹಕರು ಒಂದಕ್ಕಿಂತ ಹೆಚ್ಚು ಗ್ಯಾಸ್ ಸಂಪರ್ಕ ಹೊಂದಿರುವುದು ಕಂಡುಬಂದರೆ, ಅಂತಹವರ ಗ್ಯಾಸ್ ಸರಬರಾಜನ್ನು ತಕ್ಷಣವೇ ಸ್ಥಗಿತಗೊಳಿಸಲಾಗುವುದು. ಗ್ರಾಹಕರು ತಮ್ಮ ಹೆಚ್ಚುವರಿ ಸಂಪರ್ಕಗಳನ್ನು ಅಧಿಕೃತವಾಗಿ ಒಪ್ಪಿಸಿದ ನಂತರವಷ್ಟೇ ಗ್ಯಾಸ್ ಪೂರೈಕೆಯನ್ನು ಪುನರಾರಂಭಿಸಲಾಗುತ್ತದೆ.
ಸ್ವಯಂಪ್ರೇರಿತವಾಗಿ ಬಿಟ್ಟುಕೊಟ್ಟರೆ ಆಫರ್!
ಗ್ರಾಹಕರು ತಮ್ಮ ಬಳಿಯಿರುವ ಹೆಚ್ಚುವರಿ ಎಲ್ಪಿಜಿ ಸಂಪರ್ಕವನ್ನು ತಾವಾಗಿಯೇ (ಸ್ವಯಂಪ್ರೇರಿತವಾಗಿ) ಬಿಟ್ಟುಕೊಟ್ಟರೆ, ಅವರಿಗೆ ಒಂದು ವಿಶೇಷ ಅವಕಾಶ ನೀಡಲಾಗುತ್ತದೆ. ಅವರು ತಮ್ಮಲ್ಲಿ ಉಳಿಸಿಕೊಳ್ಳುವ ಏಕೈಕ ಕನೆಕ್ಷನ್ ಅನ್ನು ‘ಡಬಲ್ ಬಾಟಲ್ ಕನೆಕ್ಷನ್’ (DBC) ಅಂದರೆ ಎರಡು ಸಿಲಿಂಡರ್ ಇರುವ ಕನೆಕ್ಷನ್ ಆಗಿ ಉಲ್ಟಾ ಅಪ್ಗ್ರೇಡ್ ಮಾಡಿಕೊಳ್ಳಬಹುದು.
ಒಟ್ಟಾರೆಯಾಗಿ, ಪಿಎನ್ಜಿ ಮತ್ತು ಎಲ್ಪಿಜಿ ಎರಡನ್ನೂ ಒಟ್ಟಿಗೆ ಬಳಸುತ್ತಿರುವ ಕುಟುಂಬಗಳು ಇನ್ಮುಂದೆ ಎಲ್ಪಿಜಿಯನ್ನು ಕಡ್ಡಾಯವಾಗಿ ಬಿಟ್ಟುಕೊಡಬೇಕಾಗುತ್ತದೆ ಎಂದು ಸರ್ಕಾರ ಸ್ಪಷ್ಟಪಡಿಸಿದೆ.
