ಕಳೆದ ಕೆಲವು ದಿನಗಳಿಂದ ಎಲ್ಪಿಜಿ (LPG) ಸಿಲಿಂಡರ್ ಕೊರತೆಯ ಸುದ್ಧಿ ಹಬ್ಬುತ್ತಿರುವ ಬೆನ್ನಲ್ಲೇ, ಸೈಬರ್ ವಂಚಕರು ಸಕ್ರಿಯರಾಗಿದ್ದಾರೆ. ಸಿಲಿಂಡರ್ ಬುಕಿಂಗ್ ಹೆಸರಿನಲ್ಲಿ ಜನರ ವೈಯಕ್ತಿಕ ಮಾಹಿತಿ ಮತ್ತು ಹಣವನ್ನು ದೋಚುತ್ತಿರುವ ಪ್ರಕರಣಗಳು ಹೆಚ್ಚುತ್ತಿವೆ. ಈ ಹಿನ್ನೆಲೆಯಲ್ಲಿ ಕೇಂದ್ರ ಸರ್ಕಾರ ಮತ್ತು ಸೈಬರ್ ಕ್ರೈಂ ವಿಭಾಗ ಸಾರ್ವಜನಿಕರಿಗೆ ಮಹತ್ವದ ಎಚ್ಚರಿಕೆ ನೀಡಿದೆ.
ವಂಚನೆ ನಡೆಯುವುದು ಹೇಗೆ?
ಭಾರತೀಯ ಸೈಬರ್ ಕ್ರೈಂ ಸಮನ್ವಯ ಕೇಂದ್ರ (I4C) ನೀಡಿರುವ ಮಾಹಿತಿಯಂತೆ, ವಂಚಕರು ಈ ಕೆಳಗಿನ ಮಾರ್ಗಗಳನ್ನು ಬಳಸುತ್ತಿದ್ದಾರೆ:
ಪ್ಯಾನಿಕ್ ಮೆಸೇಜ್ (Panic Messages): “ಸಿಲಿಂಡರ್ ಸ್ಟಾಕ್ ಮುಗಿಯುತ್ತಿದೆ, ತಕ್ಷಣ ಬುಕ್ ಮಾಡಿ” ಎಂಬಂತಹ ಭಯ ಹುಟ್ಟಿಸುವ ಸಂದೇಶಗಳನ್ನು ಕಳುಹಿಸುವುದು.
ನಕಲಿ ಲಿಂಕ್ಗಳು: SMS ಅಥವಾ WhatsApp ಮೂಲಕ ನಕಲಿ ಬುಕಿಂಗ್ ಲಿಂಕ್ಗಳನ್ನು ಕಳುಹಿಸಿ, ಅವುಗಳ ಮೂಲಕ ಹಣ ಪಾವತಿಸುವಂತೆ ಪ್ರಚೋದಿಸುವುದು.
ಆಕರ್ಷಕ ಆಫರ್: ಗ್ಯಾಸ್ ಬುಕಿಂಗ್ ಮೇಲೆ ಭಾರಿ ರಿಯಾಯಿತಿ ನೀಡುವುದಾಗಿ ನಂಬಿಸಿ ಅಪ್ಲಿಕೇಶನ್ ಡೌನ್ಲೋಡ್ ಮಾಡಿಸುವುದು.
QR ಕೋಡ್ ಮತ್ತು APK ಫೈಲ್: ಪಾವತಿಗಾಗಿ ಕಳುಹಿಸುವ QR ಕೋಡ್ಗಳನ್ನು ಸ್ಕ್ಯಾನ್ ಮಾಡಿದರೆ ನಿಮ್ಮ ಬ್ಯಾಂಕ್ ಖಾತೆ ಖಾಲಿಯಾಗುವ ಸಾಧ್ಯತೆ ಇರುತ್ತದೆ.
ರಕ್ಷಣೆಗೆ ಸರ್ಕಾರದ ಸಲಹೆಗಳು:
ಸಾರ್ವಜನಿಕರು ಇಂತಹ ವಂಚನೆಗಳಿಗೆ ಬಲಿಯಾಗದಂತೆ ಸರ್ಕಾರ ಈ ಕೆಳಗಿನ ಕ್ರಮಗಳನ್ನು ಅನುಸರಿಸಲು ಸೂಚಿಸಿದೆ:
ಅಧಿಕೃತ ಆಪ್ ಬಳಸಿ: ಸಿಲಿಂಡರ್ ಬುಕಿಂಗ್ ಮಾಡಲು ಯಾವಾಗಲೂ ಗ್ಯಾಸ್ ಕಂಪನಿಗಳ ಅಧಿಕೃತ ವೆಬ್ಸೈಟ್ ಅಥವಾ ಮೊಬೈಲ್ ಆಪ್ಗಳನ್ನು ಮಾತ್ರ ಬಳಸಿ.
ಲಿಂಕ್ಗಳ ಮೇಲೆ ಕ್ಲಿಕ್ ಮಾಡಬೇಡಿ: ಅಪರಿಚಿತ ಮೂಲಗಳಿಂದ ಬರುವ ಲಿಂಕ್ಗಳು ಅಥವಾ ಆಪ್ (APK) ಫೈಲ್ಗಳನ್ನು ಡೌನ್ಲೋಡ್ ಮಾಡಬೇಡಿ.
ಗೌಪ್ಯ ಮಾಹಿತಿ ಹಂಚಿಕೊಳ್ಳಬೇಡಿ: ನಿಮ್ಮ ಬ್ಯಾಂಕ್ ಖಾತೆ ವಿವರ, OTP ಅಥವಾ ಪಿನ್ (PIN) ಸಂಖ್ಯೆಯನ್ನು ಯಾರಿಗೂ ನೀಡಬೇಡಿ.
ತುರ್ತು ಬುಕಿಂಗ್ ಆಮಿಷ: “ತಕ್ಷಣ ಹಣ ಪಾವತಿಸಿದರೆ ಮಾತ್ರ ಸಿಲಿಂಡರ್ ಸಿಗುತ್ತದೆ” ಎಂಬ ಮಾತುಗಳನ್ನು ನಂಬಬೇಡಿ.
ಗಮನಿಸಿ: ಇರಾನ್ ಯುದ್ಧದ ಪರಿಸ್ಥಿತಿಯಿಂದಾಗಿ ಪೂರೈಕೆಯಲ್ಲಿ ವ್ಯತ್ಯಯವಾಗಿರುವ ವದಂತಿಗಳನ್ನು ಬಳಸಿಕೊಂಡು ವಂಚಕರು ಜನರನ್ನು ಗುರಿ ಮಾಡುತ್ತಿದ್ದಾರೆ. ತೈಲ ಕಂಪನಿಗಳು ಈಗಾಗಲೇ ಸ್ಪಷ್ಟನೆ ನೀಡಿದ್ದು, ಅಧಿಕೃತ ಮಾರ್ಗಗಳ ಮೂಲಕವೇ ವ್ಯವಹರಿಸುವಂತೆ ತಿಳಿಸಿವೆ.
