ನವದೆಹಲಿ: ಆಹಾರ ಉತ್ಪನ್ನಗಳಲ್ಲಿ ಅಶ್ವಗಂಧದ (Withania somnifera) ಬಳಕೆಗೆ ಸಂಬಂಧಿಸಿದಂತೆ ಭಾರತೀಯ ಆಹಾರ ಸುರಕ್ಷತೆ ಮತ್ತು ಗುಣಮಟ್ಟ ಪ್ರಾಧಿಕಾರವು (FSSAI) ಹೊಸ ಮಾರ್ಗಸೂಚಿಯನ್ನು ಬಿಡುಗಡೆ ಮಾಡಿದೆ. ಇನ್ನು ಮುಂದೆ ಆಹಾರ ಪದಾರ್ಥಗಳಲ್ಲಿ ಅಶ್ವಗಂಧದ ಬೇರು ಮತ್ತು ಅದರ ಸಾರವನ್ನು (Extract) ಮಾತ್ರ ಬಳಸಲು ಅನುಮತಿ ನೀಡಲಾಗಿದ್ದು, ಎಲೆಗಳ ಬಳಕೆಯನ್ನು ಕಟ್ಟುನಿಟ್ಟಾಗಿ ನಿಷೇಧಿಸಲಾಗಿದೆ.
ಆರೋಗ್ಯ ವರ್ಧಕಗಳು (Health Supplements), ನ್ಯೂಟ್ರಾಸ್ಯುಟಿಕಲ್ಸ್ ಮತ್ತು ವಿಶೇಷ ವೈದ್ಯಕೀಯ ಉದ್ದೇಶಗಳಿಗಾಗಿ ಬಳಸುವ ಆಹಾರ ಪದಾರ್ಥಗಳಲ್ಲಿ ಕೇವಲ ಅಶ್ವಗಂಧದ ಬೇರು ಅಥವಾ ಅದರ ಸಾರವನ್ನು ಮಾತ್ರ ಬಳಸಲು ಎಫ್ಎಸ್ಎಸ್ಎಐ ಅನುಮತಿಸಿದೆ.
ಎಲೆಗಳ ಬಳಕೆಗೆ ನಿಷೇಧ: ಕೆಲವು ತಯಾರಕರು ಅಶ್ವಗಂಧದ ಎಲೆಗಳನ್ನು ಅಥವಾ ಅದರ ಸಾರವನ್ನು ಬಳಸುತ್ತಿರುವುದು ಗಮನಕ್ಕೆ ಬಂದ ಹಿನ್ನೆಲೆಯಲ್ಲಿ, ಈ ಸ್ಪಷ್ಟನೆಯನ್ನು ನೀಡಲಾಗಿದೆ. ಕಚ್ಚಾ ರೂಪದಲ್ಲಾಗಲಿ ಅಥವಾ ಸಾರ ರೂಪದಲ್ಲಾಗಲಿ ಎಲೆಗಳ ಬಳಕೆಗೆ ಅವಕಾಶವಿಲ್ಲ.
ಆಯುಷ್ ಸಚಿವಾಲಯದ ನಿರ್ದೇಶನ: ಈ ಹಿಂದೆ ಕೇಂದ್ರ ಆಯುಷ್ ಸಚಿವಾಲಯ ಕೂಡ ಆಯುರ್ವೇದ ಔಷಧ ತಯಾರಕರಿಗೆ ಅಶ್ವಗಂಧದ ಎಲೆಗಳನ್ನು ಬಳಸದಂತೆ ಮತ್ತು ಕೇವಲ ಬೇರುಗಳನ್ನು ಮಾತ್ರ ಬಳಸುವಂತೆ ಸೂಚನೆ ನೀಡಿತ್ತು.
ಕಠಿಣ ಕ್ರಮದ ಎಚ್ಚರಿಕೆ
ಆಹಾರ ಉದ್ಯಮ ನಡೆಸುವವರು (FBOs) ಈ ನಿಯಮಗಳನ್ನು ಕಟ್ಟುನಿಟ್ಟಾಗಿ ಪಾಲಿಸಬೇಕು ಎಂದು ಎಫ್ಎಸ್ಎಸ್ಎಐ ಸೂಚಿಸಿದೆ. ಒಂದು ವೇಳೆ ನಿಯಮ ಉಲ್ಲಂಘಿಸಿ ಎಲೆಗಳನ್ನು ಬಳಸಿರುವುದು ಕಂಡುಬಂದಲ್ಲಿ, ಆಹಾರ ಸುರಕ್ಷತೆ ಮತ್ತು ಗುಣಮಟ್ಟ ಕಾಯ್ದೆ 2006 ರ ಅಡಿಯಲ್ಲಿ ಕಠಿಣ ಕಾನೂನು ಕ್ರಮ ಕೈಗೊಳ್ಳಲಾಗುವುದು ಎಂದು ಪ್ರಾಧಿಕಾರ ಎಚ್ಚರಿಸಿದೆ.
ಎಲ್ಲಾ ರಾಜ್ಯಗಳ ಆಹಾರ ಸುರಕ್ಷತಾ ಆಯುಕ್ತರು ಮತ್ತು ಪ್ರಾದೇಶಿಕ ನಿರ್ದೇಶಕರಿಗೆ ಈ ಬಗ್ಗೆ ತೀವ್ರ ನಿಗಾ ವಹಿಸುವಂತೆ ಹಾಗೂ ನಿಯಮ ಉಲ್ಲಂಘಿಸುವವರ ಮೇಲೆ ಕ್ರಮ ಜರುಗಿಸುವಂತೆ ಸೂಚನೆ ನೀಡಲಾಗಿದೆ.
