ನವದೆಹಲಿ: ನೀವು ಫಾಸ್ಟ್ಯಾಗ್ ಬಳಸುತ್ತಿದ್ದೀರಾ? ಹಾಗಿದ್ದಲ್ಲಿ ಈ ಸುದ್ದಿ ನಿಮಗಾಗಿ. ಫಾಸ್ಟಾಗ್ ರೀಚಾರ್ಜ್ ಅಥವಾ ವಾರ್ಷಿಕ ಪಾಸ್ ಪಡೆಯುವ ಹೆಸರಿನಲ್ಲಿ ವಾಹನ ಸವಾರರನ್ನು ವಂಚಿಸುತ್ತಿರುವ ಜಾಲವೊಂದು ಸಕ್ರಿಯವಾಗಿದ್ದು, ಈ ಬಗ್ಗೆ ರಾಷ್ಟ್ರೀಯ ಹೆದ್ದಾರಿ ಪ್ರಾಧಿಕಾರ (NHAI) ವಾಹನ ಸವಾರರಿಗೆ ಕಟ್ಟುನಿಟ್ಟಿನ ಎಚ್ಚರಿಕೆ ನೀಡಿದೆ.
ಸರ್ಕಾರಿ ವೆಬ್ಸೈಟ್ಗಳಂತೆಯೇ ವಿನ್ಯಾಸ!
ಇತ್ತೀಚಿನ ದಿನಗಳಲ್ಲಿ ಸೈಬರ್ ವಂಚಕರು ಅಧಿಕೃತ ಸರ್ಕಾರಿ ಪೋರ್ಟಲ್ಗಳನ್ನು ಹೋಲುವಂತಹ ನಕಲಿ ವೆಬ್ಸೈಟ್ಗಳನ್ನು ಸೃಷ್ಟಿಸುತ್ತಿದ್ದಾರೆ. ಈ ವೆಬ್ಸೈಟ್ಗಳು ನೋಡಲು ಅಸಲಿ ವೆಬ್ಸೈಟ್ಗಳಂತೆಯೇ ಇರುವುದರಿಂದ ಸಾಮಾನ್ಯ ಜನರು ವ್ಯತ್ಯಾಸ ಗುರುತಿಸಲು ಸಾಧ್ಯವಾಗುತ್ತಿಲ್ಲ. ಈ ನಕಲಿ ಸೈಟ್ಗಳ ಲಿಂಕ್ಗಳನ್ನು ಸೋಶಿಯಲ್ ಮೀಡಿಯಾದಲ್ಲಿ ಹರಿಬಿಡಲಾಗುತ್ತಿದೆ, ಇದರಿಂದ ಗೂಗಲ್ ಸರ್ಚ್ನಲ್ಲಿ ಇವು ಮೊದಲ ಸಾಲಿನಲ್ಲಿ ಕಾಣಿಸಿಕೊಳ್ಳುತ್ತಿವೆ.
ವಂಚನೆ ನಡೆಯುವುದು ಹೇಗೆ?
ವಂಚಕರು ಸೃಷ್ಟಿಸಿದ ಈ ನಕಲಿ ವೆಬ್ಸೈಟ್ಗಳಿಗೆ ನೀವು ಭೇಟಿ ನೀಡಿದ ತಕ್ಷಣ, ಅಲ್ಲಿ ನಿಮ್ಮ ಮೊಬೈಲ್ ಸಂಖ್ಯೆ, ವಾಹನ ಸಂಖ್ಯೆ ಮತ್ತು ಬ್ಯಾಂಕ್ ಪಾವತಿಯ ವಿವರಗಳನ್ನು ಕೇಳಲಾಗುತ್ತದೆ. ಫಾಸ್ಟಾಗ್ ವಾರ್ಷಿಕ ಪಾಸ್ ಪಡೆಯಲು ಇವುಗಳನ್ನು ನಮೂದಿಸಿ ಹಣ ಪಾವತಿಸಿದರೆ, ನಿಮ್ಮ ಹಣ ನೇರವಾಗಿ ವಂಚಕರ ಪಾಲಾಗುತ್ತದೆ. ಈ ಹಿನ್ನೆಲೆಯಲ್ಲಿ ಯಾವುದೇ ಅಪರಿಚಿತ ಲಿಂಕ್ಗಳ ಮೇಲೆ ಕ್ಲಿಕ್ ಮಾಡಬಾರದೆಂದು NHAI ಸ್ಪಷ್ಟಪಡಿಸಿದೆ.
ವಂಚನೆಯಿಂದ ಪಾರಾಗುವುದು ಹೇಗೆ? NHAI ಸಲಹೆಗಳು:
ವಾಹನ ಸವಾರರು ಸೈಬರ್ ಕಳ್ಳರ ಬಲೆಗೆ ಬೀಳದಂತೆ ತಡೆಯಲು ಹೆದ್ದಾರಿ ಪ್ರಾಧಿಕಾರ ಕೆಲವೊಂದು ಮುನ್ನೆಚ್ಚರಿಕೆಗಳನ್ನು ನೀಡಿದೆ:
ಅಧಿಕೃತ ಆ್ಯಪ್ ಬಳಸಿ: ಫಾಸ್ಟಾಗ್ ವಾರ್ಷಿಕ ಪಾಸ್ ಪಡೆಯಲು ಅಥವಾ ರೀಚಾರ್ಜ್ ಮಾಡಲು ಕೇವಲ ಅಧಿಕೃತ ‘ರಾಜಮಾರ್ಗಯಾತ್ರೆ’ (Rajmargyatra) ಆ್ಯಪ್ ಅನ್ನು ಮಾತ್ರ ಬಳಸಿ.
ಅಪರಿಚಿತ ಲಿಂಕ್ಗಳ ಬಗ್ಗೆ ಜಾಗ್ರತೆ: ಎಸ್ಎಂಎಸ್ ಅಥವಾ ವಾಟ್ಸಾಪ್ ಮೂಲಕ ಬರುವ ಸಂಶಯಾಸ್ಪದ ಲಿಂಕ್ಗಳನ್ನು ಓಪನ್ ಮಾಡಬೇಡಿ.
ಮಾಹಿತಿ ಹಂಚಿಕೊಳ್ಳಬೇಡಿ: ಅನಧಿಕೃತ ಅಥವಾ ಪರಿಶೀಲಿಸದ ವೆಬ್ಸೈಟ್ಗಳಲ್ಲಿ ನಿಮ್ಮ ವಾಹನದ ವಿವರ ಅಥವಾ ಫಾಸ್ಟಾಗ್ ಮಾಹಿತಿಯನ್ನು ಹಂಚಿಕೊಳ್ಳಬೇಡಿ.
ಅಧಿಕೃತ ಸೈಟ್ ಪರಿಶೀಲಿಸಿ: ಯಾವುದೇ ಹಣಕಾಸಿನ ವಹಿವಾಟು ನಡೆಸುವ ಮುನ್ನ ಅದು ಅಧಿಕೃತ ಸರ್ಕಾರಿ ವೆಬ್ಸೈಟ್ ಹೌದೇ ಎಂದು ಖಚಿತಪಡಿಸಿಕೊಳ್ಳಿ.
ಟೋಲ್ ಪ್ಲಾಜಾಗಳಲ್ಲಿ ನಗದು ಪಾವತಿ ಸ್ಥಗಿತಗೊಂಡಿರುವುದರಿಂದ ಫಾಸ್ಟಾಗ್ ಕಡ್ಡಾಯವಾಗಿದೆ. ಇದರ ಲಾಭ ಪಡೆಯಲು ಸಂಚು ರೂಪಿಸಿರುವ ವಂಚಕರ ಬಗ್ಗೆ ಜಾಗರೂಕರಾಗಿರುವುದು ಇಂದಿನ ಅಗತ್ಯವಾಗಿದೆ.
