ಇಂದಿನ ಡಿಜಿಟಲ್ ಯುಗದಲ್ಲಿ ಸ್ಮಾರ್ಟ್ಫೋನ್ ಕೇವಲ ಸಂವಹನದ ಸಾಧನವಾಗಿ ಉಳಿದಿಲ್ಲ, ಬದಲಿಗೆ ಅದು ನಮ್ಮ ಬ್ಯಾಂಕಿಂಗ್ ವಿವರಗಳು, ಖಾಸಗಿ ಫೋಟೋಗಳು ಮತ್ತು ಪ್ರಮುಖ ದಾಖಲೆಗಳನ್ನು ಒಳಗೊಂಡಿರುವ ಡಿಜಿಟಲ್ ಬ್ಯಾಂಕ್ ಆಗಿದೆ. ಇಂತಹ ಪರಿಸ್ಥಿತಿಯಲ್ಲಿ ಮೊಬೈಲ್ ಫೋನ್ ಕಳೆದುಹೋದರೆ ಅಥವಾ ಕಳ್ಳತನವಾದರೆ ಉಂಟಾಗುವ ಆತಂಕ ಅಷ್ಟಿಷ್ಟಲ್ಲ. ಆದರೆ ಈಗ ನೀವು ಆತಂಕಪಡುವ ಅಗತ್ಯವಿಲ್ಲ. ನಿಮ್ಮ ವೈಯಕ್ತಿಕ ಡೇಟಾ ದುರುಪಯೋಗವಾಗದಂತೆ ತಡೆಯಲು ಮನೆಯಲ್ಲೇ ಕುಳಿತು ನಿಮ್ಮ ಫೋನ್ ಅನ್ನು ಆನ್ಲೈನ್ ಮೂಲಕ ಸುಲಭವಾಗಿ ಬ್ಲಾಕ್ ಮಾಡಬಹುದು.
ಕೇಂದ್ರ ಸರ್ಕಾರದ ದೂರಸಂಪರ್ಕ ಇಲಾಖೆಯು ಗ್ರಾಹಕರ ಸುರಕ್ಷತೆಗಾಗಿ CEIR (Central Equipment Identity Register) ಪೋರ್ಟಲ್ ಅನ್ನು ಪರಿಚಯಿಸಿದೆ. ಇದರ ಮೂಲಕ ಕದ್ದ ಅಥವಾ ಕಳೆದುಹೋದ ಮೊಬೈಲ್ ಫೋನ್ಗಳನ್ನು ಸುಲಭವಾಗಿ ಪತ್ತೆಹಚ್ಚಬಹುದು ಅಥವಾ ಬ್ಲಾಕ್ ಮಾಡಬಹುದು.
ಮೊಬೈಲ್ ಬ್ಲಾಕ್ ಮಾಡಲು ಪಾಲಿಸಬೇಕಾದ ಹಂತಗಳು ಇಲ್ಲಿವೆ:
ಮೊದಲು ಪೊಲೀಸ್ ದೂರು ದಾಖಲಿಸಿ: ನಿಮ್ಮ ಫೋನ್ ಕಳೆದುಹೋದ ತಕ್ಷಣ, ಹತ್ತಿರದ ಪೊಲೀಸ್ ಠಾಣೆಯಲ್ಲಿ ಅಥವಾ ಆನ್ಲೈನ್ ಮೂಲಕ ಎಫ್ಐಆರ್ (FIR) ದಾಖಲಿಸಿ. ಇದರ ದೂರು ಸಂಖ್ಯೆ (Complaint Number) ಮತ್ತು ರಸೀದಿ ಮುಂದೆ ಅಗತ್ಯವಿರುತ್ತದೆ.
ಸಿಮ್ ಕಾರ್ಡ್ ಬ್ಲಾಕ್ ಮಾಡಿ: ನಿಮ್ಮ ಟೆಲಿಕಾಂ ಆಪರೇಟರ್ (ಜಿಯೋ, ಏರ್ಟೆಲ್, ವಿಐ ಇತ್ಯಾದಿ) ಗೆ ಕರೆ ಮಾಡಿ ತಕ್ಷಣವೇ ನಿಮ್ಮ ಹಳೆಯ ಸಿಮ್ ಕಾರ್ಡ್ ಅನ್ನು ಬ್ಲಾಕ್ ಮಾಡಿಸಿ ಮತ್ತು ಅದೇ ನಂಬರ್ನ ಹೊಸ ಸಿಮ್ ಕಾರ್ಡ್ ಪಡೆದುಕೊಳ್ಳಿ.
CEIR ವೆಬ್ಸೈಟ್ಗೆ ಭೇಟಿ ನೀಡಿ: ಸರ್ಕಾರದ ಅಧಿಕೃತ ವೆಬ್ಸೈಟ್ ಆದ www.ceir.sancharsaathi.gov.in ಗೆ ಲಾಗ್ ಇನ್ ಆಗಿ.
‘Block Stolen/Lost Mobile’ ಆಯ್ಕೆ ಮಾಡಿ: ಮುಖಪುಟದಲ್ಲಿ ಕಾಣಿಸುವ ‘Block Stolen/Lost Mobile’ ಎಂಬ ಕೆಂಪು ಬಣ್ಣದ ಬಟನ್ ಮೇಲೆ ಕ್ಲಿಕ್ ಮಾಡಿ.
ವಿವರಗಳನ್ನು ಭರ್ತಿ ಮಾಡಿ: ಅಲ್ಲಿ ಕೇಳಲಾಗುವ ನಿಮ್ಮ ಮೊಬೈಲ್ ಸಂಖ್ಯೆ, 15 ಅಂಕಿಯ IMEI ಸಂಖ್ಯೆ, ಮೊಬೈಲ್ ಬ್ರ್ಯಾಂಡ್ ಮತ್ತು ಮಾಡೆಲ್ ವಿವರಗಳನ್ನು ನೀಡಿ. ಜೊತೆಗೆ ಫೋನ್ ಕಳೆದುಹೋದ ಸ್ಥಳ, ದಿನಾಂಕ ಮತ್ತು ಪೊಲೀಸ್ ದೂರಿನ ಪ್ರತಿಯನ್ನು ಅಪ್ಲೋಡ್ ಮಾಡಿ.
ಒಟಿಪಿ (OTP) ಪರಿಶೀಲನೆ: ನಿಮ್ಮ ಹೊಸ ಸಿಮ್ ಕಾರ್ಡ್ ಸಂಖ್ಯೆಯನ್ನು ನಮೂದಿಸಿ, ಅದಕ್ಕೆ ಬರುವ ಒಟಿಪಿ (OTP) ಅನ್ನು ನಮೂದಿಸಿ ಫಾರ್ಮ್ ಅನ್ನು ಸಬ್ಮಿಟ್ ಮಾಡಿ. ಸಬ್ಮಿಟ್ ಮಾಡಿದ ನಂತರ ನಿಮಗೊಂದು ‘Request ID’ ಸಿಗುತ್ತದೆ.
ಈ ಪ್ರಕ್ರಿಯೆ ಪೂರ್ಣಗೊಂಡ ನಂತರ, ನಿಮ್ಮ ಕಳೆದುಹೋದ ಫೋನ್ ಸಂಪೂರ್ಣವಾಗಿ ಬ್ಲಾಕ್ ಆಗುತ್ತದೆ. ಕಳ್ಳರು ಅದಕ್ಕೆ ಬೇರೆ ಸಿಮ್ ಕಾರ್ಡ್ ಹಾಕಿದರೂ ಸಹ ಆ ಫೋನ್ ಯಾವುದೇ ನೆಟ್ವರ್ಕ್ನಲ್ಲಿ ಕೆಲಸ ಮಾಡುವುದಿಲ್ಲ.
ಒಂದು ವೇಳೆ ನಿಮ್ಮ ಫೋನ್ ಮತ್ತೆ ನಿಮಗೆ ಸಿಕ್ಕರೆ, ಇದೇ ವೆಬ್ಸೈಟ್ಗೆ ಭೇಟಿ ನೀಡಿ ‘Un-block Found Mobile’ ಆಯ್ಕೆಯ ಮೂಲಕ ಅದನ್ನು ಸುಲಭವಾಗಿ ಅನ್ಬ್ಲಾಕ್ ಮಾಡಿಕೊಳ್ಳಬಹುದು.
