ಮುಂಬೈ: ಸ್ಟೇಟ್ ಬ್ಯಾಂಕ್ ಆಫ್ ಇಂಡಿಯಾ (SBI) ನೌಕರರ ಒಕ್ಕೂಟ ಕರೆ ನೀಡಿದ್ದ ಎರಡು ದಿನಗಳ ದೇಶವ್ಯಾಪಿ ಮುಷ್ಕರವನ್ನು ಮುಂದೂಡಲಾಗಿದ್ದು, ಮೇ 25 ಮತ್ತು 26 ರಂದು ದೇಶಾದ್ಯಂತ ಎಲ್ಲಾ ಎಸ್ಬಿಐ ಶಾಖೆಗಳು ಎಂದಿನಂತೆ ಕಾರ್ಯನಿರ್ವಹಿಸಲಿವೆ ಎಂದು ವರದಿಯಾಗಿದೆ.
ಬ್ಯಾಂಕ್ ಆಡಳಿತ ಮಂಡಳಿ ಮತ್ತು ನೌಕರರ ಸಂಘಟನೆಯ ಪ್ರತಿನಿಧಿಗಳ ನಡುವೆ ನಡೆದ ಸಮಾಲೋಚನೆ ಯಶಸ್ವಿಯಾದ ಹಿನ್ನೆಲೆಯಲ್ಲಿ ಈ ನಿರ್ಧಾರ ತೆಗೆದುಕೊಳ್ಳಲಾಗಿದೆ.
ಆಲ್ ಇಂಡಿಯಾ ಸ್ಟೇಟ್ ಬ್ಯಾಂಕ್ ಆಫ್ ಇಂಡಿಯಾ ಸ್ಟಾಫ್ ಫೆಡರೇಶನ್ (AISBISF) ಹಮ್ಮಿಕೊಂಡಿದ್ದ ಮುಷ್ಕರವನ್ನು ಮುಂದೂಡಲಾಗಿದೆ ಎಂದು ಎಸ್ಬಿಐ ತನ್ನ ಗ್ರಾಹಕರಿಗೆ ಪ್ರಕಟಣೆಯ ಮೂಲಕ ತಿಳಿಸಿದೆ.
ನಮ್ಮ ಎಲ್ಲಾ ಶಾಖೆಗಳು ಎಂದಿನಂತೆ ಕಾರ್ಯನಿರ್ವಹಿಸಲಿವೆ ಮತ್ತು ಎಲ್ಲಾ ನಿಯಮಿತ ಬ್ಯಾಂಕಿಂಗ್ ಸೇವೆಗಳನ್ನು ಒದಗಿಸಲಿವೆ” ಎಂದು ಬ್ಯಾಂಕ್ ಹೇಳಿದೆ. ಈ ಮೂಲಕ ತನ್ನ 52 ಕೋಟಿ ಗ್ರಾಹಕರಿಗೆ ಯಾವುದೇ ವ್ಯತ್ಯಯವಿಲ್ಲದೆ ಸೇವೆ ಸಿಗಲಿದೆ ಎಂದು ಬ್ಯಾಂಕ್ ಭರವಸೆ ನೀಡಿದೆ.
ಮುಷ್ಕರ ಮುಂದೂಡಿಕೆಗೆ ಕಾರಣವೇನು?
ಸಿಬ್ಬಂದಿ ಕೊರತೆ ಮತ್ತು ಹೊಸ ನೇಮಕಾತಿ ಸೇರಿದಂತೆ 16 ಪ್ರಮುಖ ಬೇಡಿಕೆಗಳ ಈಡೇರಿಕೆಗೆ ಒತ್ತಾಯಿಸಿ ಒಕ್ಕೂಟವು ಈ ತಿಂಗಳ ಆರಂಭದಲ್ಲಿ ಮುಷ್ಕರಕ್ಕೆ ಕರೆ ನೀಡಿತ್ತು. ಶುಕ್ರವಾರ ಮುಂಬೈನಲ್ಲಿರುವ ಎಸ್ಬಿಐ ಕಾರ್ಪೊರೇಟ್ ಕೇಂದ್ರದಲ್ಲಿ ಆಡಳಿತ ಮಂಡಳಿ ಮತ್ತು ನೌಕರರ ಪ್ರತಿನಿಧಿಗಳ ನಡುವೆ ನಡೆದ ಸಭೆಯಲ್ಲಿ ಸಕಾರಾತ್ಮಕ ಚರ್ಚೆಗಳು ನಡೆದಿವೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
ಈ ಕುರಿತು ಮಾಹಿತಿ ನೀಡಿರುವ ಎಸ್ಬಿಐ ಸ್ಟಾಫ್ ಅಸೋಸಿಯೇಷನ್ (ಬೆಂಗಾಲ್ ಸರ್ಕಲ್) ಕಾರ್ಯದರ್ಶಿ ಸುದೀಪ್ ದತ್ತಾ ಅವರು, “ಆಡಳಿತ ಮಂಡಳಿಯೊಂದಿಗಿನ ಸಭೆಯು ಸಕಾರಾತ್ಮಕವಾಗಿತ್ತು ಮತ್ತು ಫೆಡರೇಶನ್ ಮಂಡಿಸಿದ ಹಲವು ಬೇಡಿಕೆಗಳ ವಿಷಯದಲ್ಲಿ ಪ್ರಗತಿಯಾಗಿದೆ. ಈ ಬೆಳವಣಿಗೆಗಳ ಹಿನ್ನೆಲೆಯಲ್ಲಿ ಮುಷ್ಕರವನ್ನು ಮುಂದೂಡಲಾಗಿದೆ” ಎಂದು ಹೇಳಿದ್ದಾರೆ.
ನೌಕರರ ಪ್ರಮುಖ ಬೇಡಿಕೆಗಳೇನು?
ನೇಮಕಾತಿ: ಮೆಸೆಂಜರ್ಗಳು ಮತ್ತು ಸಶಸ್ತ್ರ ಸಿಬ್ಬಂದಿಗಳ (Armed Guards) ತಕ್ಷಣದ ನೇಮಕಾತಿ.
ಕಾಯಂ ಉದ್ಯೋಗ: ಕಾಯಂ ಸ್ವರೂಪದ ಉದ್ಯೋಗಗಳನ್ನು ಹೊರಗುತ್ತಿಗೆ (Outsourcing) ನೀಡುವುದನ್ನು ನಿಲ್ಲಿಸುವುದು.
ಕೆಲಸದ ಒತ್ತಡ: ಕ್ಲರಿಕಲ್ ನೇಮಕಾತಿಗಳ ಕುರಿತು ಮರುಚಿಂತನೆ ಮತ್ತು ನೌಕರರ ಮೇಲಿನ ಹೆಚ್ಚುತ್ತಿರುವ ಕೆಲಸದ ಒತ್ತಡವನ್ನು ಕಡಿಮೆ ಮಾಡುವುದು.
ಇತರ ಸೌಲಭ್ಯಗಳು: ವೃತ್ತಿಜೀವನದ ಪ್ರಗತಿ ಯೋಜನೆಗಳ ಪರಿಶೀಲನೆ, ಉತ್ತಮ ವೈದ್ಯಕೀಯ ಮರುಪಾವತಿ, ಹೆಚ್ಆರ್ಎಂಎಸ್ (HRMS) ತಾಂತ್ರಿಕ ಸಮಸ್ಯೆಗಳ ಪರಿಹಾರ, ವರ್ಗಾವಣೆ ವಿಳಂಬ ಮತ್ತು ಪಿಂಚಣಿ ವಿಷಯಗಳ ಇತ್ಯರ್ಥ.
ಆಡಳಿತ ಮಂಡಳಿಯೊಂದಿಗಿನ ಸಭೆಯು ಸಕಾರಾತ್ಮಕವಾಗಿ ಮುಕ್ತಾಯಗೊಂಡಿದೆ. ನಮ್ಮ ಬೇಡಿಕೆಗಳ ವಿಷಯದಲ್ಲಿ ಉತ್ತಮ ಪ್ರಗತಿ ಕಂಡುಬಂದಿದೆ. ಹೀಗಾಗಿ ಉದ್ದೇಶಿತ ಮುಷ್ಕರವನ್ನು ಮುಂದೂಡಲಾಗಿದೆ” ಎಂದು ಆಲ್ ಇಂಡಿಯಾ ಎಸ್ಬಿಐ ಸ್ಟಾಫ್ ಫೆಡರೇಶನ್ ಪ್ರಧಾನ ಕಾರ್ಯದರ್ಶಿ ಎಲ್. ಚಂದ್ರಶೇಖರ್ ಅವರು ಸದಸ್ಯರಿಗೆ ಕಳುಹಿಸಿರುವ ಸಂದೇಶದಲ್ಲಿ ತಿಳಿಸಿದ್ದಾರೆ.
