ನವದೆಹಲಿ: ದೇಶಾದ್ಯಂತ ಯಾವುದೇ ಪೊಲೀಸ್ ಠಾಣೆ ವ್ಯಾಪ್ತಿಯಲ್ಲಿ ಮಗು ಅಥವಾ ಯಾವುದೇ ವ್ಯಕ್ತಿ ಕಾಣೆಯಾದರೆ ಕಡ್ಡಾಯವಾಗಿ ಅಪಹರಣ (Kidnapping) ಪ್ರಕರಣವನ್ನೇ ದಾಖಲಿಸಬೇಕು ಎಂದು ಸುಪ್ರೀಂ ಕೋರ್ಟ್ ಸೋಮವಾರದಂದು ಆದೇಶಿಸಿದೆ. ಮಕ್ಕಳ ಕಳ್ಳಸಾಗಣೆ (Child Trafficking) ಮತ್ತು ಪತ್ತೆಯಾಗದ ಮಕ್ಕಳ ಗಂಭೀರ ಸಮಸ್ಯೆಯನ್ನು ಎದುರಿಸಲು ಪ್ರತಿಯೊಂದು ರಾಜ್ಯದ ಪೊಲೀಸ್ ವ್ಯವಸ್ಥೆಯನ್ನು ಚುರುಕುಗೊಳಿಸುವ ನಿಟ್ಟಿನಲ್ಲಿ ನ್ಯಾಯಾಲಯವು ಈ ಕಟ್ಟುನಿಟ್ಟಿನ ನಿರ್ದೇಶನಗಳನ್ನು ನೀಡಿದೆ.
ದೇಶಾದ್ಯಂತ ಸತತ ಹಲವು ವರ್ಷಗಳಿಂದ ಸುಮಾರು 47,000 ಮಕ್ಕಳು ಪತ್ತೆಯಾಗದೆ ಉಳಿದಿರುವ ಆಘಾತಕಾರಿ ಅಂಕಿ-ಅಂಶಗಳ ಬಗ್ಗೆ ತೀವ್ರ ಕಳವಳ ವ್ಯಕ್ತಪಡಿಸಿದ ಸರ್ವೋಚ್ಚ ನ್ಯಾಯಾಲಯ, “ಯಾವುದೇ ವ್ಯಕ್ತಿ ಅಥವಾ ಮಗು ನಾಪತ್ತೆಯಾದ ತಕ್ಷಣ, ಸಂಬಂಧಪಟ್ಟ ಪೊಲೀಸ್ ಠಾಣೆಯು ಯಾವುದೇ ಪ್ರಾಥಮಿಕ ತನಿಖೆಗೆ (Preliminary Enquiry) ಕಾಯದೆ ಅಥವಾ ಮಿಸ್ಸಿಂಗ್ ಆದವರ ಪೋಷಕರೇ ಅವರನ್ನು ಹುಡುಕಿಕೊಳ್ಳಲಿ ಎಂದು ಬಿಡದೆ, ತಕ್ಷಣವೇ ಪ್ರಥಮ ಮಾಹಿತಿ ವರದಿ (FIR) ದಾಖಲಿಸಬೇಕು” ಎಂದು ನಿರ್ದೇಶಿಸಿದೆ.
ಮುಂದುವರಿದು, “ದಾಖಲಿಸಲಾಗುವ ಸದರಿ ಎಫ್ಐಆರ್ನಲ್ಲಿ, ವ್ಯಕ್ತಿ ಅಥವಾ ಮಗುವಿನ ಅಪಹರಣಕ್ಕೆ ಸಂಬಂಧಿಸಿದ ‘ಭಾರತೀಯ ನ್ಯಾಯ ಸಂಹಿತೆ’ (BNS) ಕಾಯ್ದೆಯ ಪ್ರಸ್ತುತ ಸೆಕ್ಷನ್ಗಳನ್ನು ಕಡ್ಡಾಯವಾಗಿ ಅಳವಡಿಸಬೇಕು” ಎಂದು ಕೋರ್ಟ್ ಹೇಳಿದೆ.
”ಇದು ಅತ್ಯಂತ ಬೃಹತ್ ಸಮಸ್ಯೆಯಾಗಿದೆ ಮತ್ತು ಯಾರೂ ಇದರ ಗಾಂಭೀರ್ಯವನ್ನು ಅರಿತುಕೊಳ್ಳುತ್ತಿಲ್ಲ. ಜನರ ಮಂದಬುದ್ಧಿ ಮತ್ತು ಅಸಡ್ಡೆಯನ್ನು ಹೊಡೆದೋಡಿಸಬೇಕಿದೆ. ಕಣ್ಣೆದುರಿನ ಈ ಕಠೋರ ವಾಸ್ತವಕ್ಕೆ ನಾವು ಹೇಗೆ ಕಣ್ಣು ಮುಚ್ಚಿ ಕುಳಿತುಕೊಳ್ಳಲು ಸಾಧ್ಯ?” ಎಂದು ನ್ಯಾಯಮೂರ್ತಿಗಳಾದ ಅಹ್ಸಾನುದ್ದೀನ್ ಅsetupಾನುಲ್ಲಾ ಮತ್ತು ಆರ್. ಮಹದೇವನ್ ಅವರಿದ್ದ ಪೀಠವು ಆಕ್ರೋಶ ವ್ಯಕ್ತಪಡಿಸಿತು. ತಮಿಳುನಾಡಿನಲ್ಲಿ 2011 ರಿಂದ ನಾಪತ್ತೆಯಾಗಿರುವ ಮಗುವೊಂದರ ಪ್ರಕರಣದ ವಿಚಾರಣೆ ನಡೆಸುವಾಗ ನ್ಯಾಯಾಲಯ ಈ ಮೌಖಿಕ ಅವಲೋಕನ ಮಾಡಿದೆ.
ಅಲ್ಲದೆ, ನಾಪತ್ತೆಯಾದ ಪ್ರಕರಣದಲ್ಲಿ ಮಾನವ ಕಳ್ಳಸಾಗಣೆ (ಟ್ರಾಫಿಕಿಂಗ್) ನಡೆದಿರುವ ಬಗ್ಗೆ ಬಲವಾದ ಶಂಕೆ ವ್ಯಕ್ತವಾದರೆ, ತಕ್ಷಣವೇ ಆ ಕೇಸ್ ಅನ್ನು ‘ಮಾನವ ಕಳ್ಳಸಾಗಣೆ ತಡೆ ಘಟಕಕ್ಕೆ’ (Anti-Human Trafficking Unit – AHTU) ವರ್ಗಾಯಿಸಲು ಪೊಲೀಸರಿಗೆ ಸೂಚಿಸಲಾಗಿದೆ.
ಪ್ಯಾನ್-ಇಂಡಿಯಾ ಎಸ್ಒಪಿ (SOP) ಸಮಿತಿ ಶಿಫಾರಸು:
ನಾಪತ್ತೆಯಾದ ಮಕ್ಕಳ ಪ್ರಕರಣಗಳನ್ನು ಕೈಗೆತ್ತಿಕೊಳ್ಳಲು ರಾಷ್ಟ್ರಮಟ್ಟದ ಏಕರೂಪದ ಪ್ರಮಾಣಿತ ಕಾರ್ಯಾಚರಣೆ ವಿಧಾನವನ್ನು (SOP) ರೂಪಿಸಲು ನ್ಯಾಯಾಲಯವು ಸಮಿತಿಯೊಂದನ್ನು ರಚಿಸಿತ್ತು. ದೆಹಲಿ ಹೈಕೋರ್ಟ್ನ ನಿವೃತ್ತ ನ್ಯಾಯಾಧೀಶೆ ಜಸ್ಟಿಸ್ ಮುಕ್ತಾ ಗುಪ್ತಾ ನೇತೃತ್ವದ, ಮಾಜಿ ಐಪಿಎಸ್ ಅಧಿಕಾರಿ ಪಿ.ಎಂ. ನಾಯರ್ ಮತ್ತು ಗೃಹ ಸಚಿವಾಲಯದ (MHA) ನಿರ್ದೇಶಕ ವೀರೇಂದ್ರ ಕುಮಾರ್ ಮಿಶ್ರಾ ಅವರನ್ನೊಳಗೊಂಡ ಈ ಸಮಿತಿಯು ತಳಮಟ್ಟದ ವಾಸ್ತವಗಳ ಆಧಾರದ ಮೇಲೆ ನೀಡಿದ ವರದಿಯ ಅನ್ವಯ ಈ ನಿರ್ದೇಶನಗಳನ್ನು ನೀಡಲಾಗಿದೆ.
ವಿಚಾರಣೆಯ ವೇಳೆ ಪಿ.ಎಂ. ನಾಯರ್ ಅವರು ಒಂದು ಪ್ರಮುಖ ಉದಾಹರಣೆಯನ್ನು ಹಂಚಿಕೊಂಡರು. ಮೂರು ವರ್ಷಗಳ ಹಿಂದೆ ಬಿಹಾರದಿಂದ ನಾಪತ್ತೆಯಾಗಿದ್ದ ಮಗುವೊಂದನ್ನು ಕೇರಳದ ಮಕ್ಕಳ ರಕ್ಷಣಾ ಸಂಸ್ಥೆಯೊಂದರಲ್ಲಿ ಪತ್ತೆಹಚ್ಚಿ ರಕ್ಷಿಸಲಾಗಿತ್ತು. ಈ ಹಿನ್ನೆಲೆಯಲ್ಲಿ ಮಾತನಾಡಿದ ಜಸ್ಟಿಸ್ ಮುಕ್ತಾ ಗುಪ್ತಾ, ರಕ್ಷಿಸಲ್ಪಟ್ಟ ಅಥವಾ ಪತ್ತೆಯಾದ ಮಕ್ಕಳ ‘ಆಧಾರ್ ಪರಿಶೀಲನೆ’ಯನ್ನು ಕಡ್ಡಾಯಗೊಳಿಸಿದರೆ, ಒಂದು ವೇಳೆ ಅವರಿಗೆ ಈಗಾಗಲೇ ಆಧಾರ್ ಕಾರ್ಡ್ ಮಾಡಿಸಿದ್ದರೆ ಅವರ ನಿಜವಾದ ಗುರುತು ತಕ್ಷಣ ಬಹಿರಂಗಗೊಳ್ಳುತ್ತದೆ. ಆಧಾರ್ ಪರಿಶೀಲನೆಗೆ ಬಯೋಮೆಟ್ರಿಕ್ಸ್ ಅಗತ್ಯವಿರುವುದರಿಂದ, ಈ ವಿವರಗಳನ್ನು ತಾಳೆ ನೋಡಿ ಮಕ್ಕಳನ್ನು ಅವರ ಕುಟುಂಬದೊಂದಿಗೆ ಬೇಗನೆ ಸೇರಿಸಬಹುದು ಎಂದು ಸಲಹೆ ನೀಡಿದರು.
