ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರು ತಮ್ಮ ಚೀನಾ ಪ್ರವಾಸದ ನಡುವೆಯೇ ಚರ್ಚೆಗೆ ಗ್ರಾಸವಾಗಿದ್ದಾರೆ. ಒಂದು ವೇಳೆ ತಾವು ಅಧಿಕಾರದಲ್ಲಿರುವಾಗಲೇ ಹತ್ಯೆಗೀಡಾದರೆ ಅಥವಾ ಮರಣ ಹೊಂದಿದರೆ ಉಪಾಧ್ಯಕ್ಷ ಜೆ.ಡಿ. ವ್ಯಾನ್ಸ್ ಅವರು ಏನು ಮಾಡಬೇಕು ಎಂಬ ಬಗ್ಗೆ ಲಿಖಿತ ಸೂಚನೆಗಳನ್ನು ಬಿಟ್ಟು ಹೋಗಿದ್ದಾರೆ ಎಂದು ಶ್ವೇತಭವನದ ಭಯೋತ್ಪಾದನಾ ನಿರೋಧಕ ಅಧಿಕಾರಿ ಸೆಬಾಸ್ಟಿಯನ್ ಗೋರ್ಕಾ ಬಹಿರಂಗಪಡಿಸಿದ್ದಾರೆ.
ನ್ಯೂಯಾರ್ಕ್ ಪೋಸ್ಟ್ನ ‘ಪಾಡ್ ಫೋರ್ಸ್ ಒನ್’ ಪಾಡ್ಕಾಸ್ಟ್ನಲ್ಲಿ ಮಾತನಾಡಿದ ಗೋರ್ಕಾ, “ಅಧ್ಯಕ್ಷರ ‘ರೆಸಲ್ಯೂಟ್ ಡೆಸ್ಕ್’ನ ಡ್ರಾಯರ್ನಲ್ಲಿ ಉಪಾಧ್ಯಕ್ಷರಿಗಾಗಿ ಒಂದು ಪತ್ರವಿದೆ. ವಿದೇಶಿ ಪ್ರವಾಸದ ಸಮಯದಲ್ಲಿ ಅಧ್ಯಕ್ಷರಿಗೆ ಏನಾದರೂ ಅನಾಹುತ ಸಂಭವಿಸಿದರೆ ಅನುಸರಿಸಬೇಕಾದ ಪ್ರೋಟೋಕಾಲ್ಗಳು ಅದರಲ್ಲಿವೆ. ಚೀನಾ, ಇರಾನ್ ಮತ್ತು ರಷ್ಯಾದಂತಹ ರಾಷ್ಟ್ರಗಳಿಗೆ ಅರ್ಥವಾಗುವ ‘ಅಧಿಕಾರದ ಭಾಷೆ’ಯಲ್ಲೇ ಇದನ್ನು ಬರೆಯಲಾಗಿದೆ,” ಎಂದು ತಿಳಿಸಿದ್ದಾರೆ.
”ಇರಾನ್ ಅನ್ನು ನಾಮಾವಶೇಷ ಮಾಡಿ”:
ಈ ವರ್ಷದ ಆರಂಭದಲ್ಲಿ ಇರಾನ್ ಮೇಲೆ ಮಿಲಿಟರಿ ಕ್ರಮ ಕೈಗೊಳ್ಳುವ ಮೊದಲು ಟ್ರಂಪ್ ನೀಡಿದ್ದ ಹೇಳಿಕೆಯನ್ನು ಈ ಪತ್ರಕ್ಕೆ ಪುಷ್ಟಿ ನೀಡುವಂತೆ ಉಲ್ಲೇಖಿಸಲಾಗಿದೆ. “ನನಗೇನಾದರೂ ಸಂಭವಿಸಿದರೆ, ಇಡೀ ದೇಶವನ್ನೇ (ಇರಾನ್) ಸ್ಫೋಟಿಸಿಬಿಡಿ. ಅವರನ್ನು ಈ ಭೂಮಿಯ ಮುಖಪುಟದಿಂದಲೇ ಅಳಿಸಿ ಹಾಕಿ ಎಂಬ ಕಡಕ್ ಸೂಚನೆಯನ್ನು ನಾನು ವ್ಯಾನ್ಸ್ಗೆ ನೀಡಿದ್ದೇನೆ,” ಎಂದು ಟ್ರಂಪ್ ಈ ಹಿಂದೆ ಗುಡುಗಿದ್ದರು.
ಪರಲೋಕ ಮತ್ತು ಸ್ವರ್ಗದ ಬಗ್ಗೆ ಟ್ರಂಪ್ ಮಾತು:
ಇತ್ತೀಚಿನ ತಿಂಗಳುಗಳಲ್ಲಿ ಟ್ರಂಪ್ ಅವರು ತಮ್ಮ ಜೀವನದ ಸಾಧನೆ ಮತ್ತು ‘ಸತ್ತ ನಂತರದ ಬದುಕು’ (Afterlife) ಅಥವಾ ಸ್ವರ್ಗದ ಬಗ್ಗೆಯೂ ಕುತೂಹಲಕಾರಿ ಹೇಳಿಕೆಗಳನ್ನು ನೀಡಿದ್ದಾರೆ:
”ನಾನು ಸ್ವರ್ಗಕ್ಕೆ ಹೋಗಲಾರೆ”: ಈ ವರ್ಷದ ಆರಂಭದಲ್ಲಿ ಮಾತನಾಡಿದ್ದ ಟ್ರಂಪ್, “ನಾನು ಸ್ವರ್ಗಕ್ಕೆ ಹೋಗುವವನಲ್ಲ ಎಂದು ನನಗನ್ನಿಸುತ್ತದೆ. ನಾನು ಮಾಡಿರುವ ಕೆಲಸಗಳು ನನ್ನನ್ನು ಸ್ವರ್ಗಕ್ಕೆ ಸೇರಿಸುತ್ತವೆ ಎಂಬ ನಂಬಿಕೆ ನನಗಿಲ್ಲ,” ಎಂದು ಹೇಳಿದ್ದರು.
ಫಾಕ್ಸ್ ನ್ಯೂಸ್ ಜೊತೆಗಿನ ಸಂದರ್ಶನದಲ್ಲಿ, “ಒಂದು ವೇಳೆ ನಾನು ರಷ್ಯಾ-ಉಕ್ರೇನ್ ಯುದ್ಧವನ್ನು ನಿಲ್ಲಿಸಿ ವಾರಕ್ಕೆ 7,000 ಜನರ ಪ್ರಾಣ ಉಳಿಸಿದರೆ, ಅದು ನನ್ನನ್ನು ಸ್ವರ್ಗಕ್ಕೆ ಕೊಂಡೊಯ್ಯುವ ಒಂದು ಕಾರಣವಾಗಬಹುದು. ಸದ್ಯಕ್ಕೆ ನಾನು ಸ್ವರ್ಗಕ್ಕೆ ಹೋಗುವ ಪಟ್ಟಿಯಲ್ಲಿ ತಳಮಟ್ಟದಲ್ಲಿದ್ದೇನೆ ಎಂದು ಕೇಳುತ್ತಿದ್ದೇನೆ. ಸಾಧ್ಯವಾದರೆ ಸ್ವರ್ಗಕ್ಕೆ ಹೋಗಲು ನಾನು ಪ್ರಯತ್ನಿಸುತ್ತೇನೆ,” ಎಂದು ಹಾಸ್ಯಮಿಶ್ರಿತವಾಗಿ ಹೇಳಿಕೊಂಡಿದ್ದಾರೆ.
