ಮಧ್ಯಪ್ರಾಚ್ಯದಲ್ಲಿ ಹೆಚ್ಚುತ್ತಿರುವ ಉದ್ವಿಗ್ನತೆಯಿಂದಾಗಿ ಜಾಗತಿಕವಾಗಿ ತೈಲ ಪೂರೈಕೆಯಲ್ಲಿ ವ್ಯತ್ಯಯ ಉಂಟಾಗಿದೆ. ಇದರ ಪರಿಣಾಮವಾಗಿ ಭಾರತದಲ್ಲಿಯೂ ಎಲ್ಪಿಜಿ ಕೊರತೆಯ ಬಗ್ಗೆ ಚರ್ಚೆಗಳು ನಡೆಯುತ್ತಿವೆ. ಈ ಹಿನ್ನೆಲೆಯಲ್ಲಿ ಪರ್ಯಾಯ ಇಂಧನ ಮೂಲಗಳತ್ತ ಜನರ ಗಮನ ಹರಿಯುತ್ತಿದೆ. ನಾವು ದಿನನಿತ್ಯ ಕೇಳುವ ಎಲ್ಪಿಜಿ, ಸಿಎನ್ಜಿ, ಪಿಎನ್ಜಿ ಮತ್ತು ಎಲ್ಎನ್ಜಿ ಇಂಧನಗಳ ನಡುವಿನ ವ್ಯತ್ಯಾಸವೇನು? ಅವುಗಳನ್ನು ಹೇಗೆ ತಯಾರಿಸಲಾಗುತ್ತದೆ? ಎಂಬ ಸಂಪೂರ್ಣ ಮಾಹಿತಿ ಇಲ್ಲಿದೆ.
ನೈಸರ್ಗಿಕ ಅನಿಲ (Natural Gas) ಎಂದರೇನು?
ಕಲ್ಲಿದ್ದಲು ಮತ್ತು ಪೆಟ್ರೋಲಿಯಂನಂತೆ ನೈಸರ್ಗಿಕ ಅನಿಲವೂ ಒಂದು ಪಳೆಯುಳಿಕೆ ಇಂಧನವಾಗಿದೆ. ಇದರಲ್ಲಿ ಪ್ರಧಾನವಾಗಿ ಮೀಥೇನ್ ಎಂಬ ಸಂಯುಕ್ತವಿರುತ್ತದೆ. ಇದರೊಂದಿಗೆ ಅಲ್ಪ ಪ್ರಮಾಣದಲ್ಲಿ ಇತರೆ ಅನಿಲಗಳು ಮತ್ತು ನೀರಿನ ಆವಿ ಇರುತ್ತದೆ. ಭೂಮಿಯ ಆಳದಲ್ಲಿ ಸತ್ತ ಸಸ್ಯಗಳು ಮತ್ತು ಸೂಕ್ಷ್ಮಾಣುಜೀವಿಗಳು ತೀವ್ರವಾದ ಒತ್ತಡ ಮತ್ತು ಶಾಖಕ್ಕೆ ಒಳಗಾಗಿ ಲಕ್ಷಾಂತರ ವರ್ಷಗಳ ನಂತರ ನೈಸರ್ಗಿಕ ಅನಿಲವಾಗಿ ರೂಪಾಂತರಗೊಳ್ಳುತ್ತವೆ.
ವಿವಿಧ ರೀತಿಯ ಅನಿಲಗಳು ಮತ್ತು ಅವುಗಳ ಉಪಯೋಗಗಳು:
1. LPG (ಲಿಕ್ವಿಫೈಡ್ ಪೆಟ್ರೋಲಿಯಂ ಗ್ಯಾಸ್):
ತಯಾರಿಕೆ: ಇದು ಪ್ರೋಪೇನ್ ಮತ್ತು ಬ್ಯುಟೇನ್ ಅನಿಲಗಳ ಮಿಶ್ರಣ. ಇದನ್ನು ಎರಡು ರೀತಿಯಲ್ಲಿ ಪಡೆಯಲಾಗುತ್ತದೆ. ಮೊದಲನೆಯದು, ಕಚ್ಚಾ ತೈಲವನ್ನು ಶುದ್ಧೀಕರಿಸುವಾಗ (Refinery) ಉಪ ಉತ್ಪನ್ನವಾಗಿ ಸಿಗುತ್ತದೆ. ಎರಡನೆಯದು, ನೈಸರ್ಗಿಕ ಅನಿಲವನ್ನು ಹೊರತೆಗೆಯುವಾಗ ಮೀಥೇನ್ನಿಂದ ಪ್ರೋಪೇನ್ ಮತ್ತು ಬ್ಯುಟೇನ್ ಅನ್ನು ಬೇರ್ಪಡಿಸುವ ಮೂಲಕ ಪಡೆಯಲಾಗುತ್ತದೆ.
ಬಳಕೆ: ಇದನ್ನು ಮುಖ್ಯವಾಗಿ ಮನೆಗಳಲ್ಲಿ ಮತ್ತು ಹೋಟೆಲ್ಗಳಲ್ಲಿ ಅಡುಗೆ ಇಂಧನವಾಗಿ ಬಳಸಲಾಗುತ್ತದೆ.
2. CNG (ಕಂಪ್ರೆಸ್ಡ್ ನ್ಯಾಚುರಲ್ ಗ್ಯಾಸ್):
ತಯಾರಿಕೆ: ನೈಸರ್ಗಿಕ ಅನಿಲವನ್ನು (ಮುಖ್ಯವಾಗಿ ಮೀಥೇನ್) ಅತೀ ಹೆಚ್ಚಿನ ಒತ್ತಡದಲ್ಲಿ ಸಂಕುಚಿತಗೊಳಿಸಿ ಟ್ಯಾಂಕ್ಗಳಲ್ಲಿ ತುಂಬಲಾಗುತ್ತದೆ.
ಬಳಕೆ: ಇದು ಪೆಟ್ರೋಲ್ ಮತ್ತು ಡೀಸೆಲ್ಗಿಂತ ಕಡಿಮೆ ಮಾಲಿನ್ಯಕಾರಕವಾಗಿದೆ. ಆದ್ದರಿಂದ ಕಾರುಗಳು, ಬಸ್ಗಳು ಮತ್ತು ಆಟೋರಿಕ್ಷಾಗಳಲ್ಲಿ ಇಂಧನವಾಗಿ ಬಳಸಲಾಗುತ್ತದೆ.
3. LNG (ಲಿಕ್ವಿಫೈಡ್ ನ್ಯಾಚುರಲ್ ಗ್ಯಾಸ್):
ತಯಾರಿಕೆ: ನೈಸರ್ಗಿಕ ಅನಿಲವನ್ನು -162 ಡಿಗ್ರಿ ಸೆಲ್ಸಿಯಸ್ ತಾಪಮಾನದಲ್ಲಿ ಅತೀಯಾಗಿ ತಂಪುಗೊಳಿಸಿದಾಗ ಅದು ದ್ರವ ರೂಪಕ್ಕೆ ಬದಲಾಗುತ್ತದೆ. ಹೀಗೆ ಮಾಡುವುದರಿಂದ ಅದರ ಗಾತ್ರವು 600 ಪಟ್ಟು ಕಡಿಮೆಯಾಗುತ್ತದೆ.
ಬಳಕೆ: ಪೈಪ್ಲೈನ್ ಇಲ್ಲದ ದೂರದ ದೇಶಗಳಿಗೆ ಬೃಹತ್ ಹಡಗುಗಳ ಮೂಲಕ ಅನಿಲವನ್ನು ರಫ್ತು ಮಾಡಲು ಈ ವಿಧಾನವನ್ನು ಬಳಸಲಾಗುತ್ತದೆ.
4. PNG (ಪೈಪ್ಡ್ ನ್ಯಾಚುರಲ್ ಗ್ಯಾಸ್):
ತಯಾರಿಕೆ: ಇದು ಕೂಡ ನೈಸರ್ಗಿಕ ಅನಿಲವೇ ಆಗಿದೆ. ಆದರೆ ಇದು ಸಿಲಿಂಡರ್ಗಳ ಬದಲಾಗಿ ನೇರವಾಗಿ ಪೈಪ್ಲೈನ್ಗಳ ಮೂಲಕ ಗ್ರಾಹಕರಿಗೆ ತಲುಪುತ್ತದೆ.
ಬಳಕೆ: ಪ್ರಸ್ತುತ ಮೆಟ್ರೋ ನಗರಗಳಲ್ಲಿ ಅಡುಗೆ ಅನಿಲವಾಗಿ ಇದನ್ನು ಬಳಸಲಾಗುತ್ತಿದೆ. ವಿದ್ಯುತ್ ಬಿಲ್ ಮಾದರಿಯಲ್ಲೇ ನೀವು ಬಳಸಿದ ಅನಿಲಕ್ಕೆ ಮಾತ್ರ ಹಣ ಪಾವತಿಸುವ ಸೌಲಭ್ಯ ಇದಕ್ಕಿದೆ.
ಬಯೋಗ್ಯಾಸ್ ಮತ್ತು ಬಯೋ-ಸಿಎನ್ಜಿ
ಭೂಮಿಯ ಒಳಗಿನಿಂದ ಸಿಗುವ ಅನಿಲದಂತೆಯೇ ಪಾರಿಸಾರಿಕ ತ್ಯಾಜ್ಯಗಳಿಂದಲೂ ಇಂಧನವನ್ನು ತಯಾರಿಸಬಹುದು.
ಬಯೋಗ್ಯಾಸ್: ಕೃಷಿ ತ್ಯಾಜ್ಯ ಮತ್ತು ಸಗಣಿಯನ್ನು ಗಾಳಿಯಿಲ್ಲದ ಜಾಗದಲ್ಲಿ ಕೊಳೆಯುವಂತೆ ಮಾಡುವುದರಿಂದ ಇದು ಉತ್ಪತ್ತಿಯಾಗುತ್ತದೆ.
ಬಯೋ-ಸಿಎನ್ಜಿ: ಬಯೋಗ್ಯಾಸ್ ಅನ್ನು ಆಧುನಿಕ ಪದ್ಧತಿಯಲ್ಲಿ ಶುದ್ಧೀಕರಿಸಿ ಅದರಲ್ಲಿರುವ ಮೀಥೇನ್ ಪ್ರಮಾಣವನ್ನು 90% ಕ್ಕಿಂತ ಹೆಚ್ಚು ಮಾಡಿದಾಗ ಅದು ಬಯೋ-ಸಿಎನ್ಜಿ ಆಗುತ್ತದೆ. ಇದನ್ನು ನೈಸರ್ಗಿಕ ಅನಿಲದಂತೆಯೇ ವಾಹನಗಳಲ್ಲಿ ಇಂಧನವಾಗಿ ಬಳಸಬಹುದು.
