ಬೇಸಿಗೆಯ ಬಿಸಿಲು ಹೆಚ್ಚಾಗುತ್ತಿದ್ದಂತೆ ಕುಡಿಯುವ ನೀರಿನ ಅಗತ್ಯವೂ ಹೆಚ್ಚಾಗುತ್ತದೆ. ಆದರೆ, ನಾವು ಪ್ರತಿದಿನ ಕುಡಿಯುವ ನೀರು ನಿಜವಾಗಿಯೂ ಸುರಕ್ಷಿತವೇ? ಕಲುಷಿತ ನೀರು ಅನೇಕ ಗಂಭೀರ ಕಾಯಿಲೆಗಳಿಗೆ ಕಾರಣವಾಗಬಹುದು. ಪೈಪ್ಲೈನ್, ಟ್ಯಾಂಕ್ ಅಥವಾ ಅಂತರ್ಜಲದ ಮೂಲಕ ಬರುವ ನೀರು ಬ್ಯಾಕ್ಟೀರಿಯಾ ಅಥವಾ ರಾಸಾಯನಿಕಗಳಿಂದ ಕಲುಷಿತಗೊಂಡಿರುವ ಸಾಧ್ಯತೆ ಇರುತ್ತದೆ. ಹಾಗಾಗಿ, ಮನೆಯಲ್ಲೇ ಕುಡಿಯುವ ನೀರಿನ ಗುಣಮಟ್ಟವನ್ನು ಪರೀಕ್ಷಿಸಲು ಕೆಲವು ಸರಳ ಮಾರ್ಗಗಳು ಇಲ್ಲಿವೆ.
1. ಬಣ್ಣ ಮತ್ತು ವಾಸನೆಯ ಮೂಲಕ ಪರೀಕ್ಷೆ
ನೀರಿನ ಶುದ್ಧತೆಯನ್ನು ಗುರುತಿಸಲು ಮೊದಲ ಮತ್ತು ಸುಲಭ ಮಾರ್ಗವೆಂದರೆ ಅದರ ಬಣ್ಣ ಮತ್ತು ವಾಸನೆಯನ್ನು ಗಮನಿಸುವುದು.
ವಾಸನೆ: ಶುದ್ಧ ನೀರಿಗೆ ಯಾವುದೇ ವಾಸನೆ ಇರುವುದಿಲ್ಲ. ಒಂದು ವೇಳೆ ನೀರಿನಲ್ಲಿ ಕೊಳೆತ ಮೊಟ್ಟೆಯ ವಾಸನೆ ಅಥವಾ ಕಬ್ಬಿಣದಂತಹ ವಾಸನೆ ಬರುತ್ತಿದ್ದರೆ, ಆ ನೀರು ಕಲುಷಿತಗೊಂಡಿದೆ ಎಂದರ್ಥ.
ಬಣ್ಣ: ನೀರಿನ ಬಣ್ಣ ತಿಳಿ ಹಳದಿ, ಕಂದು ಅಥವಾ ಮಂಜಿನಂತೆ ಮಸುಕಾಗಿದ್ದರೆ ಅಂತಹ ನೀರನ್ನು ಕುಡಿಯಬೇಡಿ.
2. ಪಾರದರ್ಶಕ ಬಾಟಲಿ ವಿಧಾನ
ಒಂದು ಪಾರದರ್ಶಕ ಗಾಜಿನ ಅಥವಾ ಪ್ಲಾಸ್ಟಿಕ್ ಬಾಟಲಿಯಲ್ಲಿ ನೀರನ್ನು ತುಂಬಿಸಿ ಸ್ವಲ್ಪ ಸಮಯದವರೆಗೆ ಹಾಗೆಯೇ ಇಡಿ. ಸ್ವಲ್ಪ ಸಮಯದ ನಂತರ ಬಾಟಲಿಯ ತಳದಲ್ಲಿ ಸಣ್ಣ ಕಣಗಳು ಅಥವಾ ಕೊಳೆ ಕುಳಿತಿದ್ದರೆ ಅಥವಾ ನೀರು ಮಸುಕಾಗಿ ಕಂಡರೆ, ಆ ನೀರಿನಲ್ಲಿ ಅಶುದ್ಧತೆ ಇದೆ ಎಂದು ತಿಳಿಯಬಹುದು.
3. TDS ಮೀಟರ್ ಬಳಕೆ
ಮನೆಯಲ್ಲಿ ನೀರಿನ ಶುದ್ಧತೆಯನ್ನು ನಿಖರವಾಗಿ ಪರೀಕ್ಷಿಸಲು ‘ಟಿಡಿಎಸ್ (TDS) ಮೀಟರ್’ ಅತ್ಯುತ್ತಮ ಸಾಧನವಾಗಿದೆ. ಇದು ನೀರಿನಲ್ಲಿ ಕರಗಿರುವ ಘನವಸ್ತುಗಳ ಪ್ರಮಾಣವನ್ನು ತಿಳಿಸುತ್ತದೆ.
ಸಾಮಾನ್ಯವಾಗಿ 50 ರಿಂದ 150 TDS ಇರುವ ನೀರು ಕುಡಿಯಲು ತುಂಬಾ ಒಳ್ಳೆಯದು.
500 TDS ವರೆಗಿನ ನೀರನ್ನು ಕುಡಿಯಲು ಬಳಸಬಹುದು. ಆದರೆ ಅದಕ್ಕಿಂತ ಹೆಚ್ಚಿನ ರೀಡಿಂಗ್ ಬಂದರೆ ಆ ನೀರು ಕುಡಿಯಲು ಯೋಗ್ಯವಲ್ಲ.
4. ಲ್ಯಾಬ್ ಪರೀಕ್ಷೆ
ನೀವು ವಾಸಿಸುವ ಪ್ರದೇಶದಲ್ಲಿ ನೀರಿನ ಗುಣಮಟ್ಟ ತೀರಾ ಹದಗೆಟ್ಟಿದೆ ಎಂದು ಅನ್ನಿಸಿದರೆ, ನೀರಿನ ಮಾದರಿಯನ್ನು (Sample) ಅಧಿಕೃತ ಪ್ರಯೋಗಾಲಯಕ್ಕೆ (Lab) ಕಳುಹಿಸಿ ಪರೀಕ್ಷಿಸುವುದು ಉತ್ತಮ. ಇದರಿಂದ ನೀರಿನಲ್ಲಿರುವ ಹಾನಿಕಾರಕ ಅಂಶಗಳ ಬಗ್ಗೆ ಸಂಪೂರ್ಣ ಮಾಹಿತಿ ತಿಳಿಯುತ್ತದೆ.
ಮುನ್ನೆಚ್ಚರಿಕೆ: ಕಲುಷಿತ ನೀರು ಕಾಲರಾ, ಟೈಫಾಯಿಡ್ ಮತ್ತು ಕಾಮಾಲೆಯಂತಹ ರೋಗಗಳಿಗೆ ದಾರಿಯಾಗಬಹುದು. ಆದ್ದರಿಂದ ನೀರಿನ ಗುಣಮಟ್ಟದ ಬಗ್ಗೆ ಸದಾ ಜಾಗರೂಕರಾಗಿರಿ ಮತ್ತು ಆರೋಗ್ಯವಾಗಿರಿ.
