ನವದೆಹಲಿ: ಜಾಗತಿಕ ತೈಲ ಸಾಗಣೆಯ ಪ್ರಮುಖ ಮಾರ್ಗವಾದ ಹಾರ್ಮುಜ್ ಜಲಸಂಧಿಯಲ್ಲಿ (Strait of Hormuz) ಇರಾನ್ ಸಂಪರ್ಕ ಹೊಂದಿರುವ ಬೃಹತ್ ಎಲ್ಪಿಜಿ (LPG) ಟ್ಯಾಂಕರ್ ಹಡಗೊಂದು ತಾನು ‘ಭಾರತೀಯ ಮಾಲೀಕತ್ವ’ಕ್ಕೆ ಸೇರಿದ್ದು ಎಂಬ ಸಂಕೇತವನ್ನು ರವಾನಿಸಿರುವುದು ಸಂಚಲನ ಮೂಡಿಸಿದೆ. ಇರಾನ್ ಮತ್ತು ಅಮೆರಿಕ ನಡುವಿನ ಯುದ್ಧದ ಭೀತಿಯ ನಡುವೆ ಹಡಗುಗಳ ಮೇಲೆ ನಡೆಯುತ್ತಿರುವ ದಾಳಿಯಿಂದ ತಪ್ಪಿಸಿಕೊಳ್ಳಲು ಈ ಕ್ರಮ ಕೈಗೊಳ್ಳಲಾಗಿದೆ ಎಂದು ವರದಿಗಳು ತಿಳಿಸಿವೆ.
ಜಾಗತಿಕ ಹಡಗುಗಳ ಸಂಚಾರವನ್ನು ಗಮನಿಸುವ ‘ಮರೈನ್ ಟ್ರಾಫಿಕ್’ ದತ್ತಾಂಶದ ಪ್ರಕಾರ, ಇರಾನ್ನ ಇಂಧನ ಸಾಗಾಟಕ್ಕೆ ಬಳಸಲಾಗುವ ಹಡಗು ಹಾರ್ಮುಜ್ ಜಲಸಂಧಿಯನ್ನು ದಾಟುವಾಗ ತನ್ನ ಐಡೆಂಟಿಫಿಕೇಶನ್ ಸಿಸ್ಟಮ್ (AIS) ನಲ್ಲಿ ತನ್ನ ಮಾಲೀಕತ್ವದ ವಿವರವನ್ನು ಬದಲಾಯಿಸಿದೆ.
ಈ ಜಲಸಂಧಿಯಲ್ಲಿ ಇರಾನ್ ಮೇಲೆ ನಿಗಾ ಇಟ್ಟಿರುವ ಅಮೆರಿಕ ಮತ್ತು ಬ್ರಿಟನ್ ನೌಕಾಪಡೆಗಳಿಂದ ತಪ್ಪಿಸಿಕೊಳ್ಳಲು ಅಥವಾ ಯಾವುದೇ ಸಂಭವನೀಯ ದಾಳಿಯನ್ನು ತಡೆಯಲು ಭಾರತದ ಹೆಸರನ್ನು ಬಳಸಿಕೊಳ್ಳಲಾಗಿದೆ ಎನ್ನಲಾಗಿದೆ.
ಜಾಗತಿಕವಾಗಿ ಭಾರತವು ಎಲ್ಲಾ ದೇಶಗಳೊಂದಿಗೆ ಉತ್ತಮ ಬಾಂಧವ್ಯ ಹೊಂದಿರುವುದರಿಂದ, ‘ಭಾರತದ ಹಡಗು’ ಎಂಬ ಸಂಕೇತವಿದ್ದರೆ ದಾಳಿ ನಡೆಯುವ ಸಾಧ್ಯತೆ ಕಡಿಮೆ ಎಂಬುದು ಹಡಗಿನ ಸಿಬ್ಬಂದಿಯ ಲೆಕ್ಕಾಚಾರವಿರಬಹುದು ಎಂದು ತಜ್ಞರು ವಿಶ್ಲೇಷಿಸಿದ್ದಾರೆ.
ವಿಶ್ವದ ಶೇ. 20 ರಷ್ಟು ತೈಲ ಮತ್ತು ಗ್ಯಾಸ್ ಪೂರೈಕೆಯಾಗುವ ಈ ಮಾರ್ಗದಲ್ಲಿ ಸದ್ಯ ಯುದ್ಧದ ಕಾರಣದಿಂದ ಭಾರಿ ಆತಂಕ ಮನೆಮಾಡಿದೆ.ಇರಾನ್ ಸಂಬಂಧಿತ ಹಡಗುಗಳು ಭಾರತದ ಹೆಸರನ್ನು ಬಳಸಿಕೊಳ್ಳುವುದು ರಾಜತಾಂತ್ರಿಕವಾಗಿ ಸೂಕ್ಷ್ಮ ವಿಚಾರವಾಗಿದ್ದು, ಈ ಬಗ್ಗೆ ಭಾರತದ ವಿದೇಶಾಂಗ ಇಲಾಖೆಯ ಪ್ರತಿಕ್ರಿಯೆಗಾಗಿ ಕಾಯಲಾಗುತ್ತಿದೆ.
ಈ ಪ್ರದೇಶದಲ್ಲಿ ಇತ್ತೀಚೆಗೆ ಹಡಗುಗಳ ಅಪಹರಣ ಮತ್ತು ಡ್ರೋನ್ ದಾಳಿಗಳು ಹೆಚ್ಚಾಗಿರುವುದರಿಂದ ಪ್ರತಿ ಹಡಗು ತನ್ನ ಸುರಕ್ಷತೆಗಾಗಿ ಇಂತಹ ವಿಭಿನ್ನ ದಾರಿಗಳನ್ನು ಹುಡುಕುತ್ತಿದೆ.
