ಚೆನ್ನೈ:ತಮಿಳುನಾಡು ವಿಧಾನಸಭಾ ಚುನಾವಣೆಯಲ್ಲಿ ಡಿಎಂಕೆ (DMK) ಸೋಲನ್ನಪ್ಪಿದ ನಂತರ, ಸೂಪರ್ಸ್ಟಾರ್ ರಜನಿಕಾಂತ್ ಅವರು ಬುಧವಾರ (ಮೇ 6, 2026) ಚೆನ್ನೈನ ಆಳ್ವಾರ್ಪೇಟೆಯಲ್ಲಿರುವ ಎಂ.ಕೆ. ಸ್ಟಾಲಿನ್ ಅವರ ನಿವಾಸಕ್ಕೆ ಭೇಟಿ ನೀಡಿದರು. ಚುನಾವಣೆಯಲ್ಲಿ ನಟ ವಿಜಯ್ ನೇತೃತ್ವದ ‘ಟಿವಿಕೆ’ (TVK) ಪಕ್ಷವು ಭರ್ಜರಿ ಜಯಗಳಿಸಿ ಅಧಿಕಾರದ ಹೊಸ್ತಿಲಲ್ಲಿರುವ ಈ ಸಮಯದಲ್ಲಿ, ಇಬ್ಬರು ದಿಗ್ಗಜರ ಭೇಟಿಯು ತಮಿಳುನಾಡಿನ ರಾಜಕೀಯ ಚಿತ್ರಣವನ್ನು ಕುತೂಹಲಕಾರಿಯನ್ನಾಗಿಸಿದೆ.
ಚುನಾವಣಾ ಸೋಲಿನಿಂದ ಕಂಗೆಟ್ಟಿರುವ ಎಂ.ಕೆ. ಸ್ಟಾಲಿನ್ ಅವರಿಗೆ ಸಾಂತ್ವನ ಹೇಳಲು ಮತ್ತು ವೈಯಕ್ತಿಕ ಬೆಂಬಲ ವ್ಯಕ್ತಪಡಿಸಲು ರಜನಿಕಾಂತ್ ಈ ಭೇಟಿ ನೀಡಿದ್ದಾರೆ ಎನ್ನಲಾಗಿದೆ. ಸುಮಾರು ಅರ್ಧ ಗಂಟೆಗೂ ಹೆಚ್ಚು ಕಾಲ ನಡೆದ ಈ ಮಾತುಕತೆಯಲ್ಲಿ ಪ್ರಸ್ತುತ ರಾಜಕೀಯ ಸ್ಥಿತಿಗತಿಗಳ ಬಗ್ಗೆ ಚರ್ಚಿಸಲಾಗಿದೆ.
ಸ್ವತಃ ಎಂ.ಕೆ. ಸ್ಟಾಲಿನ್ ಅವರೇ ತಮ್ಮ ಕ್ಷೇತ್ರವಾದ ಕೊಳತ್ತೂರಿನಲ್ಲಿ ಟಿವಿಕೆ ಅಭ್ಯರ್ಥಿ ಎದುರು ಸುಮಾರು 8,700 ಮತಗಳ ಅಂತರದಿಂದ ಪರಾಭವಗೊಂಡಿದ್ದಾರೆ. ಈ ಆಘಾತಕಾರಿ ಫಲಿತಾಂಶದ ನಂತರ ಹಿರಿಯ ನಟನೊಬ್ಬರು ನೀಡಿದ ಈ ಭೇಟಿ ಸ್ಟಾಲಿನ್ ಅವರಿಗೆ ಆನೆಬಲ ನೀಡಿದೆ.
ರಜನಿಕಾಂತ್ ಅವರು ಈ ಮೊದಲೇ ನಟ ವಿಜಯ್ ಅವರಿಗೆ ಸಾಮಾಜಿಕ ಜಾಲತಾಣದ ಮೂಲಕ ಅಭಿನಂದನೆ ಸಲ್ಲಿಸಿದ್ದರು. ಆದರೂ, ದಶಕಗಳ ಕಾಲ ತಮಿಳುನಾಡನ್ನು ಆಳಿದ ದ್ರಾವಿಡ ಪಕ್ಷಗಳ ಅಸ್ತಿತ್ವಕ್ಕೆ ಈಗ ಧಕ್ಕೆ ಎದುರಾಗಿರುವ ಸಮಯದಲ್ಲಿ ರಜನಿ ಮತ್ತು ಸ್ಟಾಲಿನ್ ಭೇಟಿ ಮಹತ್ವ ಪಡೆದಿದೆ.
ವಿಜಯ್ ಅವರು ಸರ್ಕಾರ ರಚಿಸಲು ಇನ್ನೂ 11 ಶಾಸಕರ ಬೆಂಬಲದ ಅವಶ್ಯಕತೆಯಿದ್ದು, ರಾಜ್ಯದಲ್ಲಿ ಮೈತ್ರಿ ರಾಜಕಾರಣದ ಮಾತುಕತೆಗಳು ನಡೆಯುತ್ತಿವೆ. ಈ ನಡುವೆ ರಜನಿಕಾಂತ್ ಅವರು ಸ್ಟಾಲಿನ್ ಭೇಟಿ ಮಾಡಿರುವುದು ಡಿಎಂಕೆಯ ಮುಂದಿನ ಕಾರ್ಯತಂತ್ರಕ್ಕೆ ಕೈಜೋಡಿಸುವ ಮುನ್ಸೂಚನೆಯೇ ಎಂಬ ಪ್ರಶ್ನೆ ಎದ್ದಿದೆ.
ರಜನಿಕಾಂತ್ ಮತ್ತು ಎಂ.ಕೆ. ಸ್ಟಾಲಿನ್ ಅವರ ನಡುವೆ ಮೊದಲಿನಿಂದಲೂ ಆತ್ಮೀಯ ಸಂಬಂಧವಿದೆ. 1996ರ ಚುನಾವಣೆಯಲ್ಲಿ ರಜನಿಕಾಂತ್ ಅವರು ಡಿಎಂಕೆ ಪರವಾಗಿ ನೀಡಿದ್ದ ಹೇಳಿಕೆಯು ಆ ಪಕ್ಷದ ಗೆಲುವಿನಲ್ಲಿ ಪ್ರಮುಖ ಪಾತ್ರ ವಹಿಸಿತ್ತು. ಈಗಲೂ ಸಂಕಷ್ಟದ ಸಮಯದಲ್ಲಿ ರಜನಿ ಅವರು ಸ್ಟಾಲಿನ್ ಪರವಾಗಿ ನಿಂತಿರುವುದು ದ್ರಾವಿಡ ರಾಜಕಾರಣದ ನಾಯಕರಲ್ಲಿ ಹೊಸ ಭರವಸೆ ಮೂಡಿಸಿದೆ.
