ಸುಲ್ತಾನ್ಪುರ: ಮದುವೆ ಸಮಾರಂಭಗಳ ಅಬ್ಬರದ ಡಿಜೆ ಸಂಗೀತಕ್ಕೆ ಮನುಷ್ಯರೇ ಹೈರಾಣಾಗುವುದುಂಟು. ಆದರೆ ಉತ್ತರ ಪ್ರದೇಶದಲ್ಲಿ ಈ ಡಿಜೆ ಸೌಂಡ್ ಬರೋಬ್ಬರಿ 140 ಕೋಳಿಗಳ ಪ್ರಾಣವನ್ನೇ ಬಲಿಪಡೆದಿದೆ!
ಏನಿದು ಘಟನೆ?
ಉತ್ತರ ಪ್ರದೇಶದ ಸುಲ್ತಾನ್ಪುರದ ದರಿಯಾಪುರ ಗ್ರಾಮದಲ್ಲಿ ಏಪ್ರಿಲ್ 25 ರಂದು ಈ ಘಟನೆ ನಡೆದಿದೆ. ಮದುವೆ ಮೆರವಣಿಗೆಯೊಂದು ಸಬೀರ್ ಅಲಿ ಎಂಬುವವರಿಗೆ ಸೇರಿದ ಕೋಳಿ ಫಾರಂನ ಮುಂಭಾಗ ಹಾದುಹೋಗುತ್ತಿತ್ತು. ಈ ವೇಳೆ ಡಿಜೆ ಆಪರೇಟರ್ ಕಿವಿಗಡಚಿಕ್ಕುವಂತೆ ಅತಿ ಹೆಚ್ಚಿನ ಶಬ್ದದಲ್ಲಿ ಸಂಗೀತ ಹಾಕಿದ್ದ ಎನ್ನಲಾಗಿದೆ.
ಸಾವಿಗೆ ಕಾರಣವೇನು?
ಡಿಜೆಯ ವಿಪರೀತ ಶಬ್ದ ಹಾಗೂ ಕಂಪನದಿಂದಾಗಿ (Vibration) ಕೋಳಿಗಳು ತೀವ್ರ ಭಯಭೀತಗೊಂಡಿವೆ. ಗಾಬರಿಯಿಂದ ಫಾರಂನ ಒಳಗಡೆ ಒಂದರ ಮೇಲೊಂದು ಬಿದ್ದು ಉಸಿರುಗಟ್ಟಿ ಹಾಗೂ ಆಘಾತದಿಂದ (Heart Attack/Shock) ಸುಮಾರು 140 ಕೋಳಿಗಳು ಸ್ಥಳದಲ್ಲೇ ಮೃತಪಟ್ಟಿವೆ ಎಂದು ಮಾಲೀಕ ಅಳಲು ತೋಡಿಕೊಂಡಿದ್ದಾರೆ.
ಪೊಲೀಸ್ ದೂರು ದಾಖಲು
ಶಬ್ದ ಕಡಿಮೆ ಮಾಡುವಂತೆ ಕೋಳಿ ಫಾರಂ ಮಾಲೀಕರು ವಿನಂತಿಸಿದರೂ, ಡಿಜೆ ಆಪರೇಟರ್ ಸೌಂಡ್ ಕಡಿಮೆ ಮಾಡದೆ ಉದ್ಧಟತನ ತೋರಿದ್ದಾನೆ ಎಂದು ಆರೋಪಿಸಲಾಗಿದೆ. ಇದರಿಂದ ಕಂಗಾಲಾದ ಮಾಲೀಕ ಸಬೀರ್ ಅಲಿ ಈಗ ಬಲ್ದಿರೈ ಪೊಲೀಸ್ ಠಾಣೆಯಲ್ಲಿ ಡಿಜೆ ಆಪರೇಟರ್ ವಿರುದ್ಧ ದೂರು ದಾಖಲಿಸಿದ್ದಾರೆ.
