ಬ್ಯಾರಕ್ಪೋರ್ (ಪಶ್ಚಿಮ ಬಂಗಾಳ): ಪಶ್ಚಿಮ ಬಂಗಾಳ ವಿಧಾನಸಭಾ ಚುನಾವಣೆಯ ಎರಡನೇ ಹಂತದ ಮತದಾನಕ್ಕೆ ಮುನ್ನ ನಡೆದ ಅಂತಿಮ ಬಹಿರಂಗ ಸಭೆಯಲ್ಲಿ ಪ್ರಧಾನಿ ನರೇಂದ್ರ ಮೋದಿ ಅವರು ಬಂಗಾಳದೊಂದಿಗಿನ ತಮ್ಮ ಒಡನಾಟವನ್ನು ಸ್ಮರಿಸಿದ್ದಾರೆ. ಈ ಬಾರಿಯ ಚುನಾವಣಾ ಪ್ರಚಾರವು ತಮಗೆ ಕೇವಲ ರಾಜಕೀಯ ಕಾರ್ಯಕ್ರಮವಾಗಿರದೆ, ಅದೊಂದು ‘ಆಧ್ಯಾತ್ಮಿಕ ಪಯಣ’ ಅಥವಾ ‘ತೀರ್ಥಯಾತ್ರೆ’ಯಂತೆ ಭಾಸವಾಯಿತು ಎಂದು ಅವರು ಹೇಳಿದ್ದಾರೆ.
“ನನಗೆ ಬಂಗಾಳದ ಮೇಲಿರುವ ಪ್ರೀತಿ ಕೇವಲ ರಾಜಕೀಯವಲ್ಲ, ಅದು ಶಕ್ತಿ ಆರಾಧನೆಯ ಭಕ್ತಿ. ಈ ಭೂಮಿ ನನ್ನ ವೈಯಕ್ತಿಕ ಆಧ್ಯಾತ್ಮಿಕ ಜೀವನದ ಶಕ್ತಿ ಕೇಂದ್ರವಾಗಿದೆ,” ಎಂದು ಮೋದಿ ಬಣ್ಣಿಸಿದರು.
ದಿನವಿಡೀ ಉತ್ಸಾಹ: ತೀವ್ರವಾದ ಬಿಸಿಲು ಮತ್ತು ಸತತ ರ್ಯಾಲಿಗಳ ನಡುವೆಯೂ ತಮಗೆ ಆಯಾಸವಾಗದಿರಲು ಬಂಗಾಳದ ಜನರ ಪ್ರೀತಿ ಮತ್ತು ಮಾ ಕಾಳಿಯ ಆಶೀರ್ವಾದವೇ ಕಾರಣ ಎಂದು ಅವರು ತಿಳಿಸಿದರು.
“ಇದು ಈ ಚುನಾವಣೆಯ ನನ್ನ ಕೊನೆಯ ಸಭೆ. ಬಂಗಾಳದ ಜನರ ಮೂಡ್ ನೋಡಿದರೆ, ಮೇ 4ರ ಫಲಿತಾಂಶದ ನಂತರ ನಾನು ಇಲ್ಲಿಗೆ (ಬಿಜೆಪಿ ಸರ್ಕಾರದ) ಪ್ರಮಾಣವಚನ ಸ್ವೀಕಾರ ಸಮಾರಂಭಕ್ಕೆ ಮತ್ತೆ ಬರುತ್ತೇನೆ,” ಎಂದು ವಿಶ್ವಾಸ ವ್ಯಕ್ತಪಡಿಸಿದರು.
ಪ್ರಚಾರದ ವೇಳೆ ಜನರು ನೀಡಿದ ಪತ್ರಗಳು, ಚಿತ್ರಗಳು ಮತ್ತು ಸಂದೇಶಗಳು ತಮಗೆ ಭಾವನಾತ್ಮಕ ಶಕ್ತಿ ನೀಡಿವೆ ಎಂದು ಅವರು ಈ ಸಂದರ್ಭದಲ್ಲಿ ಹಂಚಿಕೊಂಡರು.
