ಅತ್ತೆ ಮಗಳ ಜೊತೆ ಸರಸ, ಬೇರೊಬ್ಬಳ ಜೊತೆ ವಿವಾಹ: ಇದು ವಿದ್ಯೆ ಕಲಿಸುವ ಗುರುವಿನ ‘ಅವಿದ್ಯಾವಂತ’ ವರ್ತನೆ

ಕೊಪ್ಪಳ: ಸಮಾಜಕ್ಕೆ ದಾರಿದೀಪವಾಗಬೇಕಾದ ಶಿಕ್ಷಕ ವೃತ್ತಿ ಅತ್ಯಂತ ಪವಿತ್ರವಾದದ್ದು. ಆದರೆ, ಕೊಪ್ಪಳ ಜಿಲ್ಲೆಯ ಕನಕಗಿರಿ ತಾಲೂಕಿನಲ್ಲಿ ಶಿಕ್ಷಕನೊಬ್ಬ ತನ್ನ ನೈತಿಕತೆಯನ್ನು ಗಾಳಿಗೆ ತೂರಿ, ಸ್ವಂತ ಅತ್ತೆ ಮಗಳನ್ನೇ ನಂಬಿಸಿ ಮೋಸ ಮಾಡಿದ ಘಟನೆ ಇಡೀ ಶಿಕ್ಷಕ ಸಮುದಾಯವೇ ತಲೆತಗ್ಗಿಸುವಂತೆ ಮಾಡಿದೆ. ಪ್ರೀತಿ, ದೈಹಿಕ ಬಳಕೆ ಮತ್ತು ನಿಶ್ಚಿತಾರ್ಥದ ನಂತರವೂ ಮತ್ತೊಬ್ಬಳ ಜೊತೆ ಗುಟ್ಟಾಗಿ ಮದುವೆಯಾಗಿ ನಂಬಿಕೆಗೆ ದ್ರೋಹ ಬಗೆದಿದ್ದಾನೆ ಈ ಶಿಕ್ಷಕ.

ಪ್ರೀತಿಯ ಹೆಸರಲ್ಲಿ ಐದು ವರ್ಷಗಳ ಕಾಲ ಶೋಷಣೆ

ಹುಲಸನಟ್ಟಿ ಮೂಲದ ಯುವತಿ ಕರೆಮ್ಮಾ ಕೊಪ್ಪಳದ ಪ್ರಥಮ ದರ್ಜೆ ಕಾಲೇಜಿನಲ್ಲಿ ಬಿಎಸ್ಸಿ ಓದುತ್ತಿದ್ದ ಕಾಲದಿಂದಲೂ ಬಸವರಾಜ ಹರಿಜನ್ ಎಂಬಾತನೊಂದಿಗೆ ಸಂಪರ್ಕದಲ್ಲಿದ್ದಳು. ಬಸವರಾಜ ಆಕೆಗೆ ಸ್ವಂತ ಅತ್ತೆ ಮಗನಾಗಿದ್ದರಿಂದ, ಆತನ ಮೇಲೆ ಯುವತಿಗೆ ಅಪಾರ ನಂಬಿಕೆಯಿತ್ತು. “ಸರ್ಕಾರಿ ಕೆಲಸ ಸಿಕ್ಕ ತಕ್ಷಣ ನಿನ್ನನ್ನೇ ಮದುವೆಯಾಗುತ್ತೇನೆ” ಎಂದು ನಂಬಿಸಿದ್ದ ಬಸವರಾಜ, ಕಳೆದ ಐದು ವರ್ಷಗಳಿಂದ ಆಕೆಯನ್ನು ಪ್ರೀತಿಸುವ ನಾಟಕವಾಡಿ ದೈಹಿಕವಾಗಿ ಬಳಸಿಕೊಂಡಿದ್ದ ಎನ್ನಲಾಗಿದೆ.

ಅದ್ದೂರಿ ನಿಶ್ಚಿತಾರ್ಥದ ನಂತರ ಬದಲಾದ ಬುದ್ಧಿ

ಇವರಿಬ್ಬರ ಸಂಬಂಧ ಕೇವಲ ಪ್ರೀತಿಗೆ ಸೀಮಿತವಾಗಿರಲಿಲ್ಲ. ಹಿರಿಯರ ಸಮ್ಮುಖದಲ್ಲಿ ಕನಕಗಿರಿ ತಾಲೂಕಿನ ಕನ್ನೇರಮಡುವಿನಲ್ಲಿ ಅದ್ದೂರಿಯಾಗಿ ನಿಶ್ಚಿತಾರ್ಥ ಕೂಡ ನೆರವೇರಿತ್ತು. ಆದರೆ, ಯಾವಾಗ ಬಸವರಾಜನಿಗೆ ಸರ್ಕಾರಿ ಶಿಕ್ಷಕನ ನೌಕರಿ ಖಾಯಂ ಆಯಿತೋ, ಅಲ್ಲಿಂದ ಈತನ ಅಸಲಿ ಮುಖ ಬಯಲಾಗಲು ಶುರುವಾಯಿತು. ನೌಕರಿ ಭದ್ರವಾಗುತ್ತಿದ್ದಂತೆ ಪ್ರೀತಿಸಿದ ಹುಡುಗಿ ಬೇಡವಾದಳು, ನೈತಿಕತೆ ಮರೆಯಾಯಿತು.

ಮದುವೆಯ ಫೋಟೋ ಬದಲು ‘ನೋಂದಣಿ ಪತ್ರ’ ಕಳುಹಿಸಿದ ಕ್ರೌರ್ಯ!

ಬಸವರಾಜ ತಾನು ಪ್ರೀತಿಸಿದ, ನಿಶ್ಚಿತಾರ್ಥ ಮಾಡಿಕೊಂಡ ಯುವತಿಯನ್ನು ಬಿಟ್ಟು ರತ್ನವ್ವ ಎಂಬ ಯುವತಿಯೊಂದಿಗೆ ರಹಸ್ಯವಾಗಿ ಮದುವೆಯಾಗಿದ್ದಾನೆ. ಅಷ್ಟಕ್ಕೇ ನಿಲ್ಲದ ಈತನ ಕ್ರೌರ್ಯ, ತಾನು ಮಾಡಿಕೊಂಡ ಮದುವೆಯ ವಿವಾಹ ನೋಂದಣಿ ಪತ್ರವನ್ನು (Marriage Registration Certificate) ಸಂತ್ರಸ್ತ ಯುವತಿಯ ಮನೆಗೆ ಕಳುಹಿಸಿಕೊಟ್ಟಿದ್ದಾನೆ. ಆ ಮೂಲಕ “ನಾನು ನಿನ್ನನ್ನು ಕೈಬಿಟ್ಟಿದ್ದೇನೆ” ಎಂಬ ಕ್ರೂರ ಸಂದೇಶವನ್ನು ರವಾನಿಸಿದ್ದಾನೆ.

ನ್ಯಾಯಕ್ಕಾಗಿ ಪೊಲೀಸ್ ಠಾಣೆ ಮೆಟ್ಟಿಲೇರಿದ ಸಂತ್ರಸ್ತೆ

ಶಿಕ್ಷಕನ ಈ ಹಠಾತ್ ದ್ರೋಹದಿಂದ ಕಂಗಾಲಾದ ಯುವತಿ ಮತ್ತು ಆಕೆಯ ಪೋಷಕರು ಈಗ ನ್ಯಾಯಕ್ಕಾಗಿ ಕೊಪ್ಪಳ ಮಹಿಳಾ ಪೊಲೀಸ್ ಠಾಣೆಯ ಮೊರೆ ಹೋಗಿದ್ದಾರೆ.

“ಹಿರಿಯರ ಸಮ್ಮುಖದಲ್ಲಿ ನಿಶ್ಚಿತಾರ್ಥ ಮಾಡಿಕೊಂಡು, ಐದು ವರ್ಷಗಳ ಕಾಲ ನನ್ನನ್ನು ಬಳಸಿಕೊಂಡು ಈಗ ಮತ್ತೊಬ್ಬಳನ್ನು ಮದುವೆಯಾಗಿರುವ ಈತನಿಗೆ ಕಠಿಣ ಶಿಕ್ಷೆಯಾಗಬೇಕು” ಎಂದು ಯುವತಿ ಕಣ್ಣೀರಿಟ್ಟಿದ್ದಾಳೆ.

ಸದ್ಯ ಪೊಲೀಸರು ಪ್ರಕರಣ ದಾಖಲಿಸಿಕೊಂಡಿದ್ದು, ತನಿಖೆ ಚುರುಕುಗೊಳಿಸಿದ್ದಾರೆ. ವಿದ್ಯೆ ಕಲಿಸಬೇಕಾದ ಗುರುವೇ ದಾರಿ ತಪ್ಪಿ ಸಮಾಜಕ್ಕೆ ಮಾದರಿಯಾಗುವ ಬದಲು ಮಾರಕವಾಗುತ್ತಿರುವುದು ನಿಜಕ್ಕೂ ಆತಂಕಕಾರಿ ಸಂಗತಿ. ಅಧಿಕಾರ ಮತ್ತು ಉದ್ಯೋಗ ಸಿಕ್ಕಾಗ ಮನುಷ್ಯ ತನ್ನ ಮೂಲವನ್ನೇ ಮರೆಯುತ್ತಾನೆ ಎಂಬುದಕ್ಕೆ ಈ ಘಟನೆ ಜ್ವಲಂತ ಸಾಕ್ಷಿಯಾಗಿದೆ.