ಬೇಸಿಗೆ ಕಾಲ ಬಂತೆಂದರೆ ಸಾಕು, ಎಷ್ಟೇ ಐಸ್ ನೀರು ಕುಡಿದರೂ ತೃಪ್ತಿ ಸಿಗುವುದಿಲ್ಲ. ಆರೋಗ್ಯದ ದೃಷ್ಟಿಯಿಂದ ಇತ್ತೀಚಿನ ದಿನಗಳಲ್ಲಿ ಅನೇಕರು ಫ್ರಿಜ್ ನೀರಿಗಿಂತ ಮಣ್ಣಿನ ಮಡಕೆಯ ನೀರನ್ನೇ ಹೆಚ್ಚು ಇಷ್ಟಪಡುತ್ತಾರೆ. ಮಡಕೆಯ ನೀರು ಕೇವಲ ತಂಪು ನೀಡುವುದಲ್ಲದೆ, ಆರೋಗ್ಯಕ್ಕೂ ಹಿತಕಾರಿ. ಆದರೆ, ಮಡಕೆಯಲ್ಲಿ ನೀರು ತುಂಬಿಸುವ ಮುನ್ನ ಅದನ್ನು ಸರಿಯಾಗಿ ಸ್ವಚ್ಛಗೊಳಿಸುವುದು ಬಹಳ ಮುಖ್ಯ. ಒಂದು ವೇಳೆ ನೀವು ಮಡಕೆಯನ್ನು ಸರಿಯಾಗಿ ತೊಳೆಯದೆ ಬಳಸುತ್ತಿದ್ದರೆ, ಅದರಿಂದ ಆರೋಗ್ಯದ ಮೇಲೆ ವ್ಯತಿರಿಕ್ತ ಪರಿಣಾಮ ಬೀರಬಹುದು.
ಹಾಗಾದರೆ, ಹಳೆಯ ಅಥವಾ ಹೊಸ ಮಡಕೆಯನ್ನು ಸ್ವಚ್ಛಗೊಳಿಸುವ ಸರಿಯಾದ ವಿಧಾನ ಯಾವುದು? ಇಲ್ಲಿದೆ ನೋಡಿ ಮಾಹಿತಿ:
1. ಉಪ್ಪಿನ ಬಳಕೆಯಿಂದ ಸ್ವಚ್ಛತೆ
ನೀವು ಹೊಸ ಮಡಕೆ ತಂದಿದ್ದರೆ ಅಥವಾ ಕಳೆದ ವರ್ಷದ ಹಳೆಯ ಮಡಕೆಯನ್ನು ಬಳಸಲು ಮುಂದಾಗಿದ್ದರೆ, ಉಪ್ಪು ಅತ್ಯುತ್ತಮ ಆಯ್ಕೆ.
ವಿಧಾನ: 2 ಚಮಚ ಉಪ್ಪನ್ನು 3 ಚಮಚ ನೀರಿನಲ್ಲಿ ಬೆರೆಸಿ ದ್ರಾವಣ ತಯಾರಿಸಿ. ಇದನ್ನು ಮಡಕೆಯೊಳಗೆ ಹಾಕಿ 25–30 ನಿಮಿಷಗಳ ಕಾಲ ಬಿಡಿ. ನಂತರ ಬ್ರಷ್ ಅಥವಾ ಕೈಯಿಂದ ಮಡಕೆಯ ಒಳಭಾಗವನ್ನು ಚೆನ್ನಾಗಿ ಉಜ್ಜಿ ತೊಳೆಯಿರಿ. ಇದು ಮಡಕೆಯಲ್ಲಿರುವ ಬ್ಯಾಕ್ಟೀರಿಯಾಗಳನ್ನು ನಾಶಪಡಿಸಲು ಸಹಾಯ ಮಾಡುತ್ತದೆ.
2. ನಿಂಬೆ ಹಣ್ಣಿನ ರಸ
ಪಾತ್ರೆಗಳ ಮೇಲಿನ ಜಿಡ್ಡು ಅಥವಾ ಕೊಳೆಯನ್ನು ತೆಗೆಯಲು ನಿಂಬೆ ಹಣ್ಣು ಹೇಗೆ ಸಹಕಾರಿಯೋ, ಮಡಕೆಯ ಸ್ವಚ್ಛತೆಗೂ ಇದು ಅಷ್ಟೇ ಪರಿಣಾಮಕಾರಿ.
ವಿಧಾನ: ಮಡಕೆಯೊಳಗೆ ನಿಂಬೆ ರಸ ಅಥವಾ ನಿಂಬೆ ಸಿಪ್ಪೆಯನ್ನು ಹಾಕಿ ಬ್ರಷ್ ಸಹಾಯದಿಂದ ಚೆನ್ನಾಗಿ ಉಜ್ಜುವುದರಿಂದ ಮಡಕೆ ಒಳಗಿನ ಪಾಚು ಮತ್ತು ಬ್ಯಾಕ್ಟೀರಿಯಾಗಳು ದೂರವಾಗುತ್ತವೆ.
3. ಪಟಕದ (Alum) ಬಳಕೆ
ಮಡಕೆಯಲ್ಲಿರುವ ಕೆಟ್ಟ ವಾಸನೆ ಮತ್ತು ಸೂಕ್ಷ್ಮಾಣುಜೀವಿಗಳನ್ನು ಹೋಗಲಾಡಿಸಲು ಪಟಕ ಅಥವಾ ಆಲಂ (Fitkari) ಉತ್ತಮವಾಗಿ ಕೆಲಸ ಮಾಡುತ್ತದೆ.
ವಿಧಾನ: ಪಟಕದ ಪುಡಿಯನ್ನು ನೀರಿಗೆ ಹಾಕಿ ಮಡಕೆಯನ್ನು ತೊಳೆದರೆ, ಅದು ಮಡಕೆಯನ್ನು ಸಂಪೂರ್ಣವಾಗಿ ಶುದ್ಧೀಕರಿಸುತ್ತದೆ ಮತ್ತು ನೀರು ದೀರ್ಘಕಾಲ ತಾಜಾವಾಗಿರುವಂತೆ ಮಾಡುತ್ತದೆ.
ನೆನಪಿರಲಿ: ಮಡಕೆಯನ್ನು ತೊಳೆದ ನಂತರ ಅದನ್ನು ಸ್ವಲ್ಪ ಸಮಯ ಬಿಸಿಲಿನಲ್ಲಿ ಅಥವಾ ಗಾಳಿಯಲ್ಲಿ ಸರಿಯಾಗಿ ಒಣಗಲು ಬಿಡಿ. ಹಸಿ ಇರುವಾಗಲೇ ನೀರು ತುಂಬಿಸುವುದಕ್ಕಿಂತ, ಒಣಗಿದ ನಂತರ ನೀರು ತುಂಬಿಸುವುದು ಹೆಚ್ಚು ಸುರಕ್ಷಿತ.
