ವಾಷಿಂಗ್ಟನ್: ಹಾರ್ಮುಜ್ ಜಲಸಂಧಿಯನ್ನು ಮುಕ್ತಗೊಳಿಸಲು ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ನೀಡಿದ್ದ ಅಂತಿಮ ಗಡುವು ಮುಗಿಯಲು ಕೇವಲ ಕ್ಷಣಗಣನೆ ಬಾಕಿ ಇರುವಾಗ, ಇರಾನ್ ಮಹತ್ವದ ನಿರ್ಧಾರವೊಂದನ್ನು ಪ್ರಕಟಿಸಿದೆ. ಅಮೆರಿಕದೊಂದಿಗೆ ಮಾತುಕತೆ ನಡೆಸುತ್ತಿದ್ದ ಎಲ್ಲ ರಾಜತಾಂತ್ರಿಕ ಹಾದಿಗಳನ್ನು (Channels of Talks) ಅಧಿಕೃತವಾಗಿ ಮುಚ್ಚಿರುವುದಾಗಿ ಇರಾನ್ ಘೋಷಿಸಿದೆ.
ಇದುವರೆಗೆ ಮಧ್ಯಸ್ಥಿಕೆ ರಾಷ್ಟ್ರಗಳ ಮೂಲಕ ನಡೆಯುತ್ತಿದ್ದ ಪರೋಕ್ಷ ಮಾತುಕತೆಗಳಿಗೂ ಇರಾನ್ ಬ್ರೇಕ್ ಹಾಕಿದೆ. “ಬೆದರಿಕೆ ಮತ್ತು ಅಂತಿಮ ಗಡುವುಗಳ ನಡುವೆ ಮಾತುಕತೆ ಸಾಧ್ಯವಿಲ್ಲ” ಎಂದು ಇರಾನ್ ಸ್ಪಷ್ಟಪಡಿಸಿದೆ.
ಇಂದು ರಾತ್ರಿ (ಏಪ್ರಿಲ್ 7, 2026) ಗಡುವು ಮುಕ್ತಾಯವಾಗಲಿದ್ದು, ಈ ಅವಧಿಯೊಳಗೆ ಇರಾನ್ ಶರಣಾಗದಿದ್ದರೆ ಭೀಕರ ದಾಳಿ ನಡೆಸುವುದಾಗಿ ಟ್ರಂಪ್ ಎಚ್ಚರಿಸಿದ್ದರು. ಆದರೆ, ಇರಾನ್ ಈ ಗಡುವನ್ನು ತಿರಸ್ಕರಿಸಿದ್ದು, ತನ್ನ ನಿಲುವಿನಲ್ಲಿ ಯಾವುದೇ ಬದಲಾವಣೆ ಇಲ್ಲ ಎಂದು ಸಾರಿದೆ.
ಈ ಹಿಂದೆ ಮಾತುಕತೆ ನಡೆಯುತ್ತಿದ್ದಾಗಲೇ ಅಮೆರಿಕವು ಇರಾನ್ ಮೇಲೆ ಬಾಂಬ್ ದಾಳಿ ನಡೆಸಿದ್ದನ್ನು ಉಲ್ಲೇಖಿಸಿರುವ ಇರಾನ್ ಅಧಿಕಾರಿಗಳು, “ನಾವು ಇನ್ನು ಮುಂದೆ ಟ್ರಂಪ್ ಸರ್ಕಾರವನ್ನು ನಂಬುವುದಿಲ್ಲ” ಎಂದು ತಿಳಿಸಿದ್ದಾರೆ.ಮಾತುಕತೆಯ ಹಾದಿ ಮುಚ್ಚಿದ ಬೆನ್ನಲ್ಲೇ ಇರಾನ್ ತನ್ನ ಸೇನೆಗೆ ‘ಫೈನಲ್ ಆರ್ಡರ್’ ನೀಡಿದೆ ಎನ್ನಲಾಗಿದೆ. ಅಮೆರಿಕ ಏನಾದರೂ ದಾಳಿ ಮಾಡಿದರೆ ಕೇವಲ ರಕ್ಷಣೆಯಲ್ಲ, ಭೀಕರ ಪ್ರತ್ಯಾಕ್ರಮಣ ಮಾಡುವುದಾಗಿ ಇರಾನ್ ಎಚ್ಚರಿಸಿದೆ.
