ಲಂಡನ್: ಜನನದ ಸಮಯದಲ್ಲಿ ಮಗುವಿನ ತೂಕವು ಕೇವಲ ಆ ಕ್ಷಣದ ಆರೋಗ್ಯವನ್ನಷ್ಟೇ ಅಲ್ಲ, ಭವಿಷ್ಯದ ಗಂಭೀರ ಕಾಯಿಲೆಗಳನ್ನೂ ನಿರ್ಧರಿಸುತ್ತದೆ ಎಂಬ ಆಘಾತಕಾರಿ ವಿಷಯ ಸಂಶೋಧನೆಯಿಂದ ಹೊರಬಂದಿದೆ. ಕಡಿಮೆ ತೂಕದೊಂದಿಗೆ (Low Birthweight) ಜನಿಸಿದ ಮಕ್ಕಳು ಬೆಳೆದು ದೊಡ್ಡವರಾದಾಗ (ಯುವಾವಸ್ಥೆಯಲ್ಲಿ) ಅವರಿಗೆ ಪಾರ್ಶ್ವವಾಯು (Stroke) ಸಂಭವಿಸುವ ಅಪಾಯ ಸಾಮಾನ್ಯರಿಗಿಂತ ಹೆಚ್ಚಿರುತ್ತದೆ ಎಂದು ಹೊಸ ಅಧ್ಯಯನವೊಂದು ತಿಳಿಸಿದೆ.
ಜನನದ ವೇಳೆ 2.5 ಕೆ.ಜಿಗಿಂತ ಕಡಿಮೆ ತೂಕವಿದ್ದವರಲ್ಲಿ, 18 ರಿಂದ 50 ವರ್ಷ ವಯಸ್ಸಿನೊಳಗೆ ಸ್ಟ್ರೋಕ್ ಕಾಣಿಸಿಕೊಳ್ಳುವ ಸಾಧ್ಯತೆ ಶೇ. 25 ರಿಂದ 30ರಷ್ಟು ಹೆಚ್ಚಿದೆ ಎಂದು ಸಂಶೋಧಕರು ಪತ್ತೆಹಚ್ಚಿದ್ದಾರೆ.
ಗರ್ಭಾವಸ್ಥೆಯಲ್ಲಿ ಮಗುವಿಗೆ ಸರಿಯಾದ ಪೋಷಕಾಂಶಗಳು ಸಿಗದಿದ್ದಾಗ ಅಥವಾ ತೂಕ ಕಡಿಮೆಯಾದಾಗ, ಮಗುವಿನ ರಕ್ತನಾಳಗಳು ಮತ್ತು ಹೃದಯದ ಬೆಳವಣಿಗೆಯ ಮೇಲೆ ಪರಿಣಾಮ ಬೀರುತ್ತದೆ. ಇದು ಭವಿಷ್ಯದಲ್ಲಿ ಅಧಿಕ ರಕ್ತದೊತ್ತಡ (BP) ಮತ್ತು ರಕ್ತನಾಳಗಳು ಗಟ್ಟಿಯಾಗುವಿಕೆಗೆ ಕಾರಣವಾಗಬಹುದು.
ಕಡಿಮೆ ತೂಕದೊಂದಿಗೆ ಜನಿಸಿದವರು ಬೆಳೆಯುತ್ತಾ ಹೋದಂತೆ ಧೂಮಪಾನ, ಮಧುಮೇಹ ಅಥವಾ ಅತಿಯಾದ ತೂಕ ಹೊಂದಿದ್ದರೆ, ಅವರಿಗೆ ಸ್ಟ್ರೋಕ್ ಅಪಾಯವು ಸಾಮಾನ್ಯರಿಗಿಂತ ಎರಡು ಪಟ್ಟು ಹೆಚ್ಚಾಗುತ್ತದೆ.
ಮೆದುಳಿಗೆ ರಕ್ತ ಪೂರೈಕೆ ಮಾಡುವ ರಕ್ತನಾಳಗಳಲ್ಲಿ ಅಡೆತಡೆ ಉಂಟಾದಾಗ ಅಥವಾ ರಕ್ತನಾಳ ಒಡೆದಾಗ ಮೆದುಳಿನ ಕೋಶಗಳು ನಾಶವಾಗುತ್ತವೆ. ಇದನ್ನು ‘ಸ್ಟ್ರೋಕ್’ ಅಥವಾ ಪಾರ್ಶ್ವವಾಯು ಎನ್ನಲಾಗುತ್ತದೆ.
