ಆಂಧ್ರಪ್ರದೇಶದ ಏಕೈಕ ರಾಜಧಾನಿಯಾಗಿ ‘ಅಮರಾವತಿ’ ಘೋಷಣೆ: ಲೋಕಸಭೆಯಲ್ಲಿ ಐತಿಹಾಸಿಕ ಮಸೂದೆ ಪಾಸ್!

ನವದೆಹಲಿ:ಆಂಧ್ರಪ್ರದೇಶದ ರಾಜಧಾನಿ ವಿವಾದಕ್ಕೆ ಸಂಬಂಧಿಸಿದಂತೆ ಕೇಂದ್ರ ಸರ್ಕಾರವು ದೊಡ್ಡ ನಿರ್ಧಾರವೊಂದನ್ನು ತೆಗೆದುಕೊಂಡಿದೆ. ಆಂಧ್ರಪ್ರದೇಶದ ಏಕೈಕ ಮತ್ತು ಶಾಶ್ವತ ರಾಜಧಾನಿಯಾಗಿ ಅಮರಾವತಿ (Amaravati) ಯನ್ನು ಅಧಿಕೃತವಾಗಿ ಘೋಷಿಸುವ ಮಸೂದೆಯನ್ನು ಲೋಕಸಭೆಯು ಧ್ವನಿಮತದ ಮೂಲಕ ಅಂಗೀಕರಿಸಿದೆ. ಈ ಮೂಲಕ ಈ ಹಿಂದೆ ಚರ್ಚೆಯಲ್ಲಿದ್ದ ‘ಮೂರು ರಾಜಧಾನಿ’ಗಳ ಪ್ರಸ್ತಾವನೆಯು ಈಗ ಇತಿಹಾಸ ಪುಟ ಸೇರಿದೆ.

ಆಂಧ್ರಪ್ರದೇಶದ ವಿಭಜನೆಯ ನಂತರ ರಾಜಧಾನಿ ಆಯ್ಕೆಯ ಬಗ್ಗೆ ಇದ್ದ ದೀರ್ಘಕಾಲದ ಗೊಂದಲವನ್ನು ಈ ಮಸೂದೆ ಕೊನೆಗೊಳಿಸಿದೆ. ಇನ್ನು ಮುಂದೆ ಅಮರಾವತಿಯು ರಾಜ್ಯದ ಶಾಸಕಾಂಗ, ಕಾರ್ಯಾಂಗ ಮತ್ತು ನ್ಯಾಯಾಂಗದ ಕೇಂದ್ರಬಿಂದುವಾಗಿ ಕಾರ್ಯನಿರ್ವಹಿಸಲಿದೆ.

 ಮಸೂದೆಯ ಅಂಗೀಕಾರದೊಂದಿಗೆ ಅಮರಾವತಿಯ ಅಭಿವೃದ್ಧಿಗೆ ಕೇಂದ್ರ ಸರ್ಕಾರದಿಂದ ಹೆಚ್ಚಿನ ಅನುದಾನ ಮತ್ತು ಮೂಲಸೌಕರ್ಯ ನೆರವು ಸಿಗುವುದು ಖಚಿತವಾಗಿದೆ. ವಿಶ್ವದರ್ಜೆಯ ನಗರವಾಗಿ ಅಮರಾವತಿಯನ್ನು ನಿರ್ಮಿಸಲು ಕೇಂದ್ರವು ಬದ್ಧವಾಗಿದೆ ಎಂದು ಗೃಹ ಸಚಿವಾಲಯ ತಿಳಿಸಿದೆ. ಈ ಹಿಂದಿನ ಸರ್ಕಾರವು ವಿಶಾಖಪಟ್ಟಣಂ, ವಿಜಯವಾಡ ಮತ್ತು ಕರ್ನೂಲ್‌ಗಳನ್ನು ಮೂರು ಪ್ರತ್ಯೇಕ ರಾಜಧಾನಿಗಳನ್ನಾಗಿ ಮಾಡುವ ಪ್ರಸ್ತಾವನೆ ಇಟ್ಟಿತ್ತು. ಆದರೆ ಈಗಿನ ಹೊಸ ಮಸೂದೆಯು ಕೇವಲ ಅಮರಾವತಿಯನ್ನು ಮಾತ್ರ ಅಧಿಕೃತ ರಾಜಧಾನಿ ಎಂದು ಗುರುತಿಸಿದೆ.

ಈ ನಿರ್ಧಾರವು ಅಮರಾವತಿ ಭಾಗದ ರೈತರು ಮತ್ತು ಜನರಲ್ಲಿ ಭಾರಿ ಹರ್ಷ ತಂದಿದೆ. ಕಳೆದ ಹಲವು ವರ್ಷಗಳಿಂದ ‘ಏಕೈಕ ರಾಜಧಾನಿ’ಗಾಗಿ ಹೋರಾಟ ನಡೆಸುತ್ತಿದ್ದವರಿಗೆ ಈ ಮಸೂದೆ ಜಯ ತಂದುಕೊಟ್ಟಿದೆ.