ವಾಷಿಂಗ್ಟನ್:ವಿಶ್ವದ ಬಾಹ್ಯಾಕಾಶ ಸಂಶೋಧನೆಯಲ್ಲಿ ಇಂದು ಸುವರ್ಣಾಕ್ಷರಗಳಲ್ಲಿ ಬರೆದಿಡುವ ದಿನ. ಅಮೆರಿಕದ ಬಾಹ್ಯಾಕಾಶ ಸಂಸ್ಥೆ ನಾಸಾ (NASA) ತನ್ನ ಮಹತ್ವಾಕಾಂಕ್ಷೆಯ ‘ಆರ್ಟೆಮಿಸ್-2’ (Artemis II) ಮಿಷನ್ ಅಡಿಯಲ್ಲಿ ನಾಲ್ವರು ಗಗನಯಾನಿಗಳನ್ನು ಹೊತ್ತ ರಾಕೆಟ್ ಅನ್ನು ಚಂದ್ರನತ್ತ ಯಶಸ್ವಿಯಾಗಿ ಉಡಾವಣೆ ಮಾಡಿದೆ. 1972ರ ಅಪೊಲೊ ಮಿಷನ್ ನಂತರ ಮೊದಲ ಬಾರಿಗೆ ಮಾನವಕುಲವು ಮತ್ತೆ ಚಂದ್ರನ ಅಂಗಳದತ್ತ ಮುಖ ಮಾಡಿದೆ.
ಫ್ಲೋರಿಡಾದ ಕೆನಡಿ ಬಾಹ್ಯಾಕಾಶ ಕೇಂದ್ರದಿಂದ ವಿಶ್ವದ ಅತ್ಯಂತ ಶಕ್ತಿಶಾಲಿ ‘ಸ್ಪೇಸ್ ಲಾಂಚ್ ಸಿಸ್ಟಮ್’ (SLS) ರಾಕೆಟ್, ಗಗನಯಾನಿಗಳನ್ನು ಹೊತ್ತ ‘ಒರಿಯನ್’ ನೌಕೆಯನ್ನು ಬಾಹ್ಯಾಕಾಶಕ್ಕೆ ಯಶಸ್ವಿಯಾಗಿ ತಲುಪಿಸಿದೆ.ಈ ತಂಡದಲ್ಲಿ ಮೊದಲ ಬಾರಿಗೆ ಒಬ್ಬ ಮಹಿಳೆ (ಕ್ರಿಸ್ಟಿನಾ ಕೋಚ್) ಮತ್ತು ಒಬ್ಬ ಕಪ್ಪು ವರ್ಣೀಯ ಗಗನಯಾನಿ (ವಿಕ್ಟರ್ ಗ್ಲೋವರ್) ಸೇರಿದಂತೆ ಒಟ್ಟು ನಾಲ್ವರು ಸದಸ್ಯರಿದ್ದಾರೆ. ಇದು ಬಾಹ್ಯಾಕಾಶ ಸಂಶೋಧನೆಯಲ್ಲಿ ಸಮಾನತೆಯ ಸಂದೇಶ ಸಾರಿದೆ.
ಮಿಷನ್ನ ಉದ್ದೇಶ: ಈ ಗಗನಯಾನಿಗಳು ಸುಮಾರು 10 ದಿನಗಳ ಕಾಲ ಬಾಹ್ಯಾಕಾಶದಲ್ಲಿ ಪ್ರಯಾಣಿಸಲಿದ್ದಾರೆ. ಅವರು ಚಂದ್ರನ ಸುತ್ತ ಪ್ರದಕ್ಷಿಣೆ ಹಾಕಿ, ನೌಕೆಯ ವ್ಯವಸ್ಥೆಗಳನ್ನು ಪರೀಕ್ಷಿಸಿ ಮರಳಿ ಭೂಮಿಗೆ ಬರಲಿದ್ದಾರೆ. ಇದು ಮುಂದಿನ ವರ್ಷಗಳಲ್ಲಿ ಚಂದ್ರನ ಮೇಲೆ ಮಾನವ ವಸತಿ ನಿರ್ಮಿಸುವ ‘ಆರ್ಟೆಮಿಸ್-3’ ಯೋಜನೆಗೆ ಭದ್ರ ಬುನಾದಿಯಾಗಲಿದೆ.
ಈ ಉಡಾವಣೆಯನ್ನು ವಿಶ್ವದಾದ್ಯಂತ ಕೋಟ್ಯಂತರ ಜನರು ಲೈವ್ ಸ್ಟ್ರೀಮಿಂಗ್ ಮೂಲಕ ವೀಕ್ಷಿಸಿದ್ದು, ವಿಜ್ಞಾನಿಗಳ ತಂಡದಲ್ಲಿ ಹರ್ಷೋದ್ಗಾರ ಮುಗಿಲು ಮುಟ್ಟಿದೆ.
